ZKIZ Archives


【科技籽】我們的芒亨時代  「面連」識朋友 「改機」玩老翻

1 : GS(14)@2017-08-02 06:16:06

【科技籽:玩物達人】有打機的,一定聽過《Monster Hunter》這遊戲。沒有打機的,也應該記得十年前開始有一段長時間,去到麥記除了見到人食薯條外,還常見四個年輕人圍埋一枱,每人一部PSP打機的日子。那就是「芒亨」的黃金年代!現在《Monster Hunter: World》回到PS陣營,那個年代的獵龍戰友可還有聚頭?



在這個online打機的年代,就算不常見面的朋友都可以晚晚有交流,踢波又好,射爆頭又好,總之不用相約於麥當勞。係方便,係更容易集齊人,但那個需要「面連」,即面對面連線的年代,始終令老機迷懷念。未講新遊戲之前,兩位屠龍友先緬懷十年前。


麥記三缺一 主動參戰 

《Monster Hunter》第一集於2004年3月11日在PlayStation2推出,不過未掀起熱潮。當年已經有玩的機迷Bill說:「嗰陣仲要用電話線嚟連線,啲連線質素極差,而且啲怪血量設定過強,可能兩三個鐘先殺到一隻怪,又冇血量表睇到,好多人打打吓都放棄。所以第一集係反應麻麻嘅。」引爆點是PSP的《Monster Hunter Portable》,更爆的是2007年2月22日推出的《Monster Hunter Portable2nd》。另一位機迷Johnson說:「PSP嘅Portable第一集都改良咗好多,不過最勁都係《Monster Hunter Portable2nd》,我記得係去到第二集推出一段時間之後,熱潮開始爆起。」爆起熱潮,除了遊戲好玩外,也不得不提PSP的黑歷史,就是玩老翻遊戲,當時「1000機」可以改機,之後上網下載遊戲去玩,雖然不合法,也無視版權,但不能否認的是這邪道玩法令PSP以及這遊戲更爆人氣。當時可以四人面對面連線,而且無論你係玩正版UMD(Universal Media Disc)或老翻,都可以一齊連線玩。「嗰陣開始興去麥當勞玩,因為開得夜,雖然嗰陣仲未有24小時,但有啲收夜晚11、12點,收咗店之後仲會坐喺門口玩。去麥記玩除咗因為方便之外,仲係你嗌個餐食飽就可以無限時間玩,嗰陣有啲人叫杯嘢飲都玩半日,冇人趕又唔會唔好意思嘛。」而且可以認識新朋友,「嗰陣如果自己一個人落麥記,見到人哋『三缺一』,就會自己行埋去問可唔可以摻埋呀,不過有時對方未必啱level一齊玩,咁玩一個鐘咪扮約咗人行開囉。」Bill說記得那個時候都已經有尿袋(流動充電器),不過未有現在的普及,「當時個個都會帶多幾嚿後備電。」所以個人相信,手提遊戲機有史以來最好賣的電池,一定是PSP的電池。除了麥當勞,上樓cafe也是屠龍聚腳地,Johnson說:「因為上樓cafe有得插電掣,嗰陣好多上樓cafe都標榜有得插電,宣傳都叫人組隊上去屠龍,不過有啲設最低消費,比起麥記會貴啲。」


回歸PS陣營 讚多過彈

訪問那天拍照的遊戲,多由Bill帶來,他一向都玩正版遊戲,不過……「當年都為咗呢隻遊戲而改機玩老翻,我都有買正版遊戲,當年老翻有人改到可以睇隻怪嘅血量,即係可以睇到隻怪邊個位係最勁嘅弱點,令當年嘅玩家玩得更勁,成隻遊戲嘅效率都提升咗,簡單講就係更加好玩。之後Capcom出啲『磚頭書』都係為呢樣嘢,講明邊度係弱點。」還有一些叫「自製任」,「玩到後期,啲怪太易打,可能幾分鐘就玩完一次,有啲人就覺得唔夠滿足,所以老翻又有啲自製任務,一次過打好多隻怪,啲怪嘅血量又可以set得高啲,襟玩啲。」在PS陣營爆起,不過之後轉會到任天堂陣營,主要在3DS推出,上年出了《Monster Hunter XX》,今年亦會移植至新機Switch。不計online玩、收月費的作品,《Monster Hunter: World》成為多年後正式回歸PS陣營的正傳作品。「3DS我都有玩,不過有好多朋友都冇出機,所以冇玩,加上成日有啲傳聞話會喺PS出番,所以好多人都等緊。」對於新一集《World》,Bill說:「晨早要大革新啦!最好啲怪嘅設定多啲新意。」Johnson亦同意,「期待嘅,見到新遊戲嘅系統有啲唔同,可能冇咗『過區食藥』呢啲舊玩法(舊作地圖分為不同區域,怪物不會追過區,新作地圖一體化不再分區),更講求技術。」



Johnson由《Monster Hunter Portable2》開始玩,到最新的《Monster Hunter XX》也有買。

Bill由PS2的第一集開始已經接觸這個系列遊戲,對於新作有期待:「我啲朋友全部都係讚嘅。」

Bill有買《Monster Hunter》所有正版遊戲,不過當年也有玩過老翻。


當年還有這些改裝小物可加裝,令操控性更佳。

當年翻版當道,可能很多芒亨迷也未擁有過UMD。

Johnson擁有的特別版《Monster Hunter X》3DS主機。

早前製作人辻本良三(右)及總監德田優也到港宣傳新遊戲,並宣佈會有繁體中文版可免費更新。

新game製作人:暫無意推VR版

《Monster Hunter: World》下年於PS4推出,剛過去的香港動漫遊戲展中,PS請來遊戲製作人辻本良三及總監德田優也到場,除了宣佈會有繁體中文版以下載更新型式推出外,兩人還接受香港傳媒訪問。問:今集會加入甚麼新裝備?答:今集會有好多新裝備幫獵人狩獵,系統中會多咗一種特別裝備,着上之後可以隱藏自己行蹤,又或者有啲着咗會吸引敵人,又可能會加強攻擊力,不過唔會係無限使用。問:睇過之前影片,打怪噴血效果消失了?會硬性顯示血量?答:今次會以打甩獸皮、鱗片、羽毛為主,放心,唔會影響攻擊嘅快感,而血量顯示則可以喺設定關閉。問:打開地圖時會唔會受到怪獸攻擊?答:打開地圖時係唔會受到攻擊嘅。問:會同時出現多隻大型怪物?玩家會怎樣應對?答:係會有呢個機會,玩家點樣避免呢個情況發生,都係今集嘅重點。另外啲怪物會做出逃走等反應,所以怪物長時間亂鬥嘅機會唔多。問:有考慮推出VR《Monster Hunter》?會加入電競元素?答:VR暫時未有考慮。電競元素方面,其實日本一直也有《Monster Hunter》嘅鬥技大會,不過不會像格鬥遊戲般對戰。問:新作公佈以嚟,聽到fans有甚麼意見嗎?答:佢哋都對遊戲嘅新元素好有興趣,不過同時我想強調,大家唔使擔心有新元素就會減卻系列作嘅風格,我哋一定會保留遊戲系列嘅風格,有玩開嘅一定感受到原作嘅風味。問:免費更新中文字幕,會於遊戲推出時同步?中文版只有PS4版本?能否跨平台連線?答:盡力趕工希望可以同步。中文版係PS4獨佔嘅,唔可以跨平台連線。



採訪:陳孝義攝影:陳孝義、鄧鴻欣編輯:馮秀珍美術:黃創泰




來源: http://hk.apple.nextmedia.com/su ... t/20170802/20108507
PermaLink: https://articles.zkiz.com/?id=339425

Next Page

ZKIZ Archives @ 2019