| ||||||
前 獅子行中國要員Eddie王浵世,自06年起獲民生銀行招聘為行長,一時間成為內地銀行羅致海外賓架專才嘅典範。不過,噚日內地《財經網》傳出消息,話 Eddie因屆退休年齡,可能不久就退下火線。傳聞民生現任副行長、曾經喺人行工作嘅洪崎會接任行長。報道又話,高層換班工作已經啓動喎。 曾任滙豐中國區總裁 講 番Eddie,佢喺滙豐歷練多年,由新界區經理,做到中國區總裁,又曾經派調加拿大及美國,對大江南北同美加市場都好熟。當年佢過檔民生做舵手,外界諗住 憑佢多年市場經驗,可以協助民生來港上市。點知一心以為搶灘成功,喺05年6月,諗住飲H股銀行股掛牌頭啖湯嘅民生,連上市聆訊都通過埋,但埋門一腳,俾 交行(3328)捷足先登,後嚟民生礙於市況,上市一拖再拖,到今日仍音訊杳然,相信Eddie都冇癮再做落去。 |
2010-11-10 AD
| ||||||
前滙豐中國大班兼民生銀行 (1988)前行長王浵世自從退休後就積極寫書,同大家分享吓佢喺大陸發展嘅經驗,話晒喺大陸做咗咁耐哨兵,唔多唔少都會知道新一代大陸人究竟點睇香港人,佢除咗出書之外,噚日就上咗總商會同商界分享。 人質事件改觀 聽小王講(王總自己話退休之後唔係叫王總,所以華華都改一改對王總嘅稱呼),原來喺大陸人心目中,香港人都有唔少缺點,包括講嘢成日「唔中唔英」扮晒嘢;仲有呀,原來大陸人眼中嘅香港人係無「吉士」(膽量),做嘢有方法無辦法,聽到華華自信心低落呀。 不過,早幾個月前菲律賓人質事件之後,8萬人喺周日上街悼念死難者,就令大陸人對香港人改觀,小王話,上街當日佢唔喺香港,佢有個大陸朋友知道8萬人上街之後走去問佢:「你哋上街係咪有津貼o架?」小王話,當然大家都知答案啦,但係咁樣同時證明香港人係有團結嘅力量。 小王仲話:「嗰時我簡直想衝出街用唔鹹唔淡嘅普通話大嗌『鍋斯生果忍』(我是香港人)。」呢個時候,主持人就問小王:「咁有冇時候,你唔想做香港人?」小王即刻話:「無!我覺得香港人好威猛!」全場即刻鼓掌!小王就補充句:「掌聲係畀香港人嘅!」 李華華 | ||||||