中環在線：褲王楊釗「入市如接飛刀」 李華華
2008-09-23 AppleDaily
除賭王講大市，褲王楊釗亦湊熱鬧話：「海嘯咪去滑浪囉！」好多人見個市跌到殘，心郁郁想撈底，佢就話，咁等如「拋空接飛刀」──好難！接到都好易損手，所以要睇有冇膽識同技術，楊釗仲好謙咁話：「我冇咁技術，亦都冇膽量。」又話呢個時候賺到錢，心理壓力都好大。梗係啦，個市咁波動，嚇都嚇。
賺10億好濕碎
楊釗仲話，作為旭日企業（393）董事長，佢做生意一向穩陣，風高浪急時要多現金。咦，褲王今年4月先做單大刁，賣長沙灣貿易廣場全幢商廈，賺成10億銀，睇怕家有大把現金手。唔通佢真係睇通後市，沽貨現金？講番呢單刁，褲王係咪賺好多？佢擰晒頭話：「唔係、唔係。」不過，跟住問佢係咪真係袋10億銀，佢又點點頭。其實10億銀對褲王講，原來都好濕碎！