📖 ZKIZ Archives

狗吃美國糧 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131101/18487770

S董事長賜飯（此用語並非擦鞋，與銀行前輩世伯L吃飯時，每有人夾餸俾佢，佢一定雙手捧碟來接，並且講番一句：「蒙賜，蒙賜」，最初左丁山不明所以，後來聽清楚，方知是前輩謙遜之詞，以世伯L之地位還要講「蒙賜」，可知係一種「古老教養」，或是「民國遺風」，今人不懂矣），食客有左丁山，評馬Y，律師T等，坐在陸羽二樓之小房間，飲其豬肚湯，啖雲腿鴿脯，牛筋腩撈麵，不亦快哉。原來評馬Y性好甜品，吃鹹點時吃得慢吞吞，還以為佢已經飽到唔郁得，點知一到甜品時刻，佢雙眼發光，好似細路仔咁，猛話：「呢度有麻蓉包，出面酒樓多數只賣蓮蓉包，冇食麻蓉包好耐咯噃！」真材實料麻蓉包送到，一隻大過拳頭，一睇已經飽晒，評馬Y竟可吃了半個，S董事長立即嗌多兩件打包，送俾評馬Y回家再享受。評馬Y話平時好少到陸羽，呢次好似回復孩提時代跟爹哋上茶樓吃得咁過癮，因此處古風猶存也。
律師T寫字樓在電車路，離地鐵站好近，位處上佳地點，律師T話係1989年以呎價二千蚊多啲買入嘅，依家連天水圍住宅都買唔到，講出嚟就令人羨慕，但各有前因莫羨人，無謂得個恨字。吃了少少麻蓉包，電話響起，美國西岸創投基金專家A來了，住在怡東酒店，話人在中環，要上寫字樓找左丁山一聚。於是向S董事長告辭，趕返辦公室，基金A剛剛到，時間真好。佢話來港一天與有興趣投資者見面，詳情不便透露。見佢孭住一個大背囊，幾時髦噃，基金A話：「並非追上時代，只是為女兒孭狗糧上北京而已。」北京冇狗糧咩？基金A話：「女兒結了婚，嫁夫隨夫，到中國闖天下，開發新事業，佢住落一個月箒，話北京啲狗糧唔掂，要我從三藩市帶過去，我明天就飛北京嘅嘞。」A千金愛狗如命，連搭飛機都要捧住隻「約瑟」狗（七磅重）上飛機，入境之時，中國海關要隻狗「檢疫隔離」兩星期，但是，基金A話：「中國是一個偉大國家，萬事有商量，只要有齊所有針紙健康紙，付款4000美元，隻狗由我個女陪埋一齊隔離兩小時，就可以入境！」果真金錢不是萬能，在中國則無錢萬萬不能，美國人行事鬼咁僵化，點會唔俾中國追上呀，不過咯喎，中國狗糧還是遠遠落後啫。

PermaLink: https://articles.zkiz.com/?id=80447

有福同享鸚鵡餵狗吃意粉

1 : GS(14)@2012-02-25 15:55:31

http://hk.apple.nextmedia.com/te ... 335&art_id=16091604

鸚鵡不但會模仿人類說話，還懂得人類的「有福同享」美德。網上流傳一條短片，只見鸚鵡看到廚櫃面有剩餘意粉，竟將意粉叼給狗狗吃（圖），實行分甘同味。
這段名為「雀仔餵狗吃意粉」的短片，一開始已看到鸚鵡站在廚櫃面，將一條短意粉叼給站在地上的狗狗。即使鸚鵡失手，將意粉掉到地上，但狗狗毫不介意，低頭吃掉意粉，然後乖乖站在一旁等着吃。
鸚鵡於是再接再厲，有時在櫃面尋寶，有時則在意粉煲找獵物，狗狗也很識趣，沒用大嘴巴咬傷鸚鵡，反而吃得開心舔脷。
英國《每日郵報》
2 : MCRay(21088)@2012-02-26 22:00:38

Very cute
3 : 龍生(798)@2012-02-27 02:17:03

合作無間呢
4 : GS(14)@2012-02-27 22:48:12

好得意啊
PermaLink: https://articles.zkiz.com/?id=277952
Next Page
ZKIZ Archives @ 2019