ZKIZ Archives


冰說聰明:港版波指冇人trade

1 : GS(14)@2018-02-21 06:22:07

作為專業少少嘅散戶,你應該知道美股的恐慌指數VIX,經過最近10日的洗禮,你仲了解原來VIX都可以沽空,更加可以用ETP(交易所產品)形式去玩,無論是否今次跌市的源頭,今次的確響晒朵,唔少投資者(包括外國)用血淚認識到,原來這些ETP可以被贖回,只要觸發招股書內規定單日下跌80%的清算條件就KO,感覺猶如買咗牛熊證被打靶呢。另一樣大家未必知的,就係國內也有一個A股版恐慌指數,叫做中國波指(iVIX),代碼係000188,有興趣可以去望吓個走勢。這個指數是在2016年11月發佈,係上證50ETF的波動指數,原理跟標普500的VIX差不多,用來表示市場對該指數未來30日波動率的預期,籠統嚟講,指數越高氣氛就越恐慌,咁個大盤股就即係會跳水囉。中國波指在今浪反應比較慢,2月6日先開始抽升,2月9日見歷史高位38.3點,而上證亦係那天暫時見底。不過現時中國波指係冇得trade,冇期貨亦冇期權,咁都可理解的,個股都未有期權,很難可以推展到波指吧,亦因為咁,市面上都唔會有複雜的產品。香港恒指波幅指數(VHSI)在2011年推出,數據追溯至2001年,推出後最高點係58.6點,係2011年8月美國主權評級被downgrade引發股災的那次,2015年大時代A股7月爆煲時,VHSI係46.8,近兩年的走勢就好似VIX咁,一啲都唔恐慌,長期低於20點,所以近年你去sell波幅,例如沽藍籌的認沽期權,收期權金的確係爽歪歪啊,但最近10日的殺倉,早前收的夠唔夠cover呢,就要睇你的功力了。這個VHSI係有得trade的,港交所有指數期貨,不過成交量就嚇死人,2012至15年加埋有3,443張,2016年有87張,2017年有68張,今年截至昨天只有1張成交。以咁嘅成交量,根本不用談開展期權產品,更加不要旨望會有交易所產品,不過CEO應該會說,我們今年主力係搞同股不同權,未來目標係優化互聯互通,衍生產品嘅嘢,你哋炒番輪證啦,多啲打靶多啲新發行,港交所收入就更加有保證喇。青冰
http://fb.com/chingbing888本欄逢周四刊出



來源: https://hk.finance.appledaily.co ... e/20180215/20306354
PermaLink: https://articles.zkiz.com/?id=348704

Next Page

ZKIZ Archives @ 2019