《我瞞》結局玩複製翠如網民轟爛到核爆
1 :
GS(14)@2017-04-04 08:56:01期望越大，失望越大！無綫劇集，成日俾人話膠話爛，最近有套劇，睇觀眾留言，幾乎由頭讚到落尾二嗰集，結果，喺第20集大結局，膠爛程度，比起無綫以往BBQ、打邊爐場面有過之而無不及，臨尾香，難怪有網民鬧爆嗌回水。講緊嘅，就係前晚播出大結局嘅《我瞞結婚了》。前晚《我瞞》大結局，講到有才華專一靚仔有錢嘅黃浩然，患咗絕症，黃翠如就覺得要留喺佢身邊照顧佢，所以決絕同洪永城分手。查實黃浩然角色咁討好，就算翠如BB同佢一齊都不為過，不過無綫出名要大團圓結局嘛，男主角洪永城點可以唔o氹番翠如BB先，不過黃浩然又咁好，冇理由要佢患絕症兼孤獨終老o架，為咗解決呢個三角關係，於是乎，無綫一班天才編劇，竟然諗到複製多個翠如BB──來自四川講普通話嘅小霞出嚟。而病到死死吓嘅黃浩然，就對呢個滿面雀斑、笠住紅色假髮做護士嘅翠如BB一見鍾情、就係咁，造就咗3年後一場池邊婚禮出嚟。仲要莊思敏無啦啦騷胸扮美人魚跳落水！真係爭在班演員未唱句「齊歡唱，同慶賀……」部份網民留言如下：--其實是但搵個女嘅話一見鍾情咪得囉，搞咁多做咩，老竇睇到爆粗。--雖然係搞笑片，都搞笑得過份咗…完全hea做大結局。--老土到核爆！李小霞，仲要係四川嚟嘅！--簡直垃圾劇，結局好爛，爛到核爆！--唔係個樣似就會中意囉，確實牽強。--睇咗，想鬧人，爛得不能再爛！差差差！
來源:
http://hk.apple.nextmedia.com/entertainment/art/20170404/19979677