黃百鳴大爆星爺拍戲秘史
1 :
GS(14)@2016-02-03 14:03:112016-02-02 EW
二十四年前的電影《家有囍事》，肯定是港產片中的經典，幾多場面loop過無限次？幾多對白背到滾瓜爛熟？幾多畫面歷久不衰，更獲封網上cap圖王？
今年賀歲檔期，《家有囍事》將重新上映。舊片新上，除了數碼修復，還加入十分鐘未曝光片段；此外，《家》片的監製兼要角黃百鳴，更親爆拍攝背後，周星馳（星爺）鮮為人知的秘聞逸事！
想夥拍曼玉
原本的《家有囍事》是沒有周星馳（星爺）份兒的，三兄弟角色分別敲定為林子祥、黃百鳴和張國榮（哥哥）。可是，電影開拍前，林子祥在三藩市的寓所發生火警，他未能趕返港演出，黃百鳴惟有臨急抱佛腳找星爺頂上。
黃百鳴憶述：「搵星仔嗰時，佢開好高嘅片酬，急於用人都照畀佢，仲同佢講明錢可以畀，但係三兄弟之中花心細佬個角色唔揀得。星仔係想同張曼玉（Maggie）做對手嘅，唔使問梗係想同靚女做對手啦；但之前已經畀劇本張國榮睇咗，哥哥OK咗（花心細佬個角色）！」黃百鳴任由星爺在餘下兩兄弟中揀一角，當時星爺聲言「打死唔做乸型」，惟有選做不忠丈夫一角。
後來，哥哥約黃百鳴見面傾戲，坐低劈頭一句說：「百鳴，你唔好同我爭，我睇完劇本，我要做cam cam哋嗰個。」而且，哥哥更指明，Tomboy對手要由毛舜筠來演，肯定好睇。黃百鳴覺得張國榮選角是計過度過，但此舉竟誤打誤撞，成全了星爺的心願，能夠跟張曼玉做拍檔。
網上流傳星爺對Maggie有好感，更有追求之意，黃百鳴斬釘截鐵的說：「咁我冇聽過喎，就算追都係拍戲嗰時追，拍完戲Maggie肯定唔睬佢！」
撐珍妹入屋
影壇盛傳，星爺難服侍，黃百鳴眼中卻不是這回事，還力讚對方說：「嗰時佢好好㗎，叫佢做乜都得，同埋好跟劇本做。」其實，星爺也曾就一、兩場戲提出個人意見，當中最神來之筆便是Maggie撞破他和李麗珍（珍妹）偷食一場，黃百鳴娓娓道來：「原本話星仔同珍妹踩到番梘跌落花園，撞正Maggie經過，三人會合偷食就穿煲；但星仔話可以加料，跌落樓嘅過程加。最後大家都應該記得，嗰段戲星仔跌落去見到Maggie就喺下面，擰轉頭又見珍妹喺上面，心諗唔掂嘞，於是雙掌一撐，將珍妹撐番上間屋度，出嚟真係幾好笑，而且得星仔一個諗到，喺跌落樓咁短促嘅時間，都可以玩到啲嘢。」
激勵谷德昭
黃百鳴透露，當日電影分了三個編劇，分別為戲中三條主綫寫劇本，而星爺的跟場編劇正是當年新入行的谷德昭（肥谷），他第一次將寫好的對白交星爺時，星爺睇完只說一句話：「呢個就係劇本喇?!」肥谷自尊心當堂被打沉，並向導演請辭，獲導演勸解：「畀人窒一句就唔撈？以後點喺電影圈生存？」於是他痛定思痛，狂煲星爺曾拍過的戲，重新寫過劇本，之後的劇本星爺亦十分滿意，以後更錫肥谷錫到燶，有戲開都預他做編劇。而《家》中的「鐵拳無敵孫中山」、「巴黎鐵塔反轉再反轉」好大可能是肥谷被星爺逼出來的啜核之作，至於「無定向喪心病狂間歇性全身機能失調症」，更是黃百鳴選為經典中的經典，鍾意它夠「 繞口」。
當年為迎合台灣市場，電影還專登找來識閩南話的人改寫〈相逢何必曾相識〉給星爺唱，網上久不久都會翻hit。黃百鳴指，星爺當日不僅完全冇抗拒、冇詐型，更抵得諗即學閩南歌詞，而且好快上手，當場已經唱到並完成拍攝。
另外，哥哥當年憑《英雄本色》、《縱橫四海》等英雄片在韓國大受歡迎，所以為配合韓國發行商要求，後來加入了一幕，講述吳君如演的大嫂被賊人擄走，常家三兄弟勇救大嫂的槍戰場面，亦即是今次重新上映的加長版十分鐘情節。
三個蒙面賊
話說當年黑社會暴力入侵娛樂圈，《家》的底片在剪接期間，被三個蒙面賊持槍打劫，幸好最終賊人未有得手。所以，後來要補拍的該段荒山野嶺槍戰戲，三兄弟絲襪笠頭的靈感也是來自劫菲林事件；同時，由於案件未破，當年警方高度戒備，更派出警員監場拍攝，以防有人再來搞事。
故此，加長片段絕對得來不易，而且，如今再配廣東話版本，黃百鳴也花盡心思。除請吳君如拔刀相助外，星爺的對白則找來「翻版星爺」溫超代勞；反而要配張國榮的聲音最頭痕，cast過無數人之後，發現譚耀文「聲演」最似，結果由阿譚負責，才卒之大功告成。
撰文☆錢慧 攝影☆梁比利 設計☆吳俊彪