職場慧眼：新入職唔熟識 張慧敏
1 :
GS(14)@2013-11-30 16:00:45http://hk.apple.nextmedia.com/financeestate/art/20131129/18529038
「工作咗近十年，轉咗幾份工，近來終於經朋友嘅朋友referral下，入咗一個自己好想做嘅field。Supervisor安排一個senior同事教我，新入職唔熟識，做錯事俾人話，我都正面面對、努力做好、避免犯錯。但最受不了senior同事嘅單打說話，初時以為佢針對我，但原來佢對其他同事都系咁。再觀察，原來佢上司同supervisor都系是非精，上司下屬高矮肥瘦衣著舉動都可以評論一番。自問打過幾份工同同事相處融洽，而家日日都要面對是非精，真系受唔到喺咁嘅工作環境做嘢，有幾次都想辭職（未過probation），但又諗：入到呢個field得來不易、轉工都會有是非精。我該留或走？如果留，我該如何調整心態？」
做好自己別理人
是非是最佳人情這個說法你聽過未？公司其實是社會縮影，每間公司都各有文化及環境生態。一樣米養百樣人，乜人都有才是正常，每個人都各有自家一套生存方法。
講真，是你見識少，不知有幸還是不幸，做過幾份工同事相處一直融洽，所以你天真地以為到處楊梅一樣花，不知道有烏鴉的存在？
多難得可以一償夙願轉入自己好想做嘅行業，只不過遇到小小不順意考驗之嘛，你咁快就打退堂鼓？你究竟有幾認真幾想做？這個踏腳石豈不白踏？你對不對得起自己，以及托上托介紹份工幫你達成心願的所有人？
你是新人又是新入行，大把事等你學要你做，你咁得閒留意周圍的蜚短流長？生在他人身上那把口你管來幹甚麼？最緊要管好自己把口，誰講甚麼是非關你鬼事，切勿扮正義四周圍斥責他人，更千萬不能貪口爽講埋一份。
清者自清，心中有數就得，專心做好你的工作才是正路。
張慧敏