ZKIZ Archives


黃金地產扮蟹股市變牛熊賭檔

2011-9-29  NM



相較於○八年海嘯時港股單日大冧價,令股民心臟病發,今次的陰乾式消耗性跌市,一樣令人飽受煎熬。自今年踏 入下半年以來,港股已下跌兩成半,散戶搏反彈撈底,每每低處未算低,「股蟹」你我身邊總有一隻。就連大家炒 開的外匯及藉以避險的黃金,都一樣大瀉無得玩,買樓短炒收租更加唔敢掂。在通脹率高達百分之六點三下,閒錢 無出路,散戶找到了一張賭枱——牛熊證。這兩星期,牛熊證連窩輪的成交,持續佔大市總成交三成,部分牛熊證 單日成交額,更高過中移動等藍籌。牛熊證的玩法,只是單純估恒指升跌,猶如過大海賭大細;然而在市況「無定 向」波動下,小心好友淡友左右開弓,令你手上的牛證或熊證,排隊等打靶。

股市淡薄,不如「賭博」。走進股票行,還以為入了賭場買大細。本週一,在觀塘中國銀行內,人人都在講牛熊 證和窩輪。記者見其中一位師奶講到滙豐摩通三月CW16(11332)時說:「唉呀,我今日一放佢就升!」各人即一呼 百應,然後四、五個師奶圍在一起談論,記者追問下,她們說:「我哋咩都唔識,少少哋玩吓咋!」一名年 約六十,體形肥胖的男子一邊喝着兩公升裝烏龍茶,一邊查看股票機,圍着他約有六、七個師奶,都當他「股神」 吹捧說:「肥仔今日賺到笑,一日賺幾萬,好過做特首。」據師奶說,他今早買了阿里荷合A6月 CW2012(14091),下午開市便立刻放,但堅拒透露賺了多少。另一位李先生又買入了牛熊證,他用一毫七購入五十 萬個單位的恒指瑞信Y12月RP2011(66765),「個期都唔係問題啦,我好快放,最怕俾人『啪』(打靶)咗啫。」 旁邊的股民李先生亦透露,他早前用一毫買入恒指法巴6月PW12(24631),因聽說週一有反彈,在上週四以一毫七 放,覺得自己「賺少咗」不甘心,還反而叮囑記者,要賺錢一定要像他一樣多看投資書籍。一時間銀行內「CW」、「PW」及一大堆五位數的股票編號,如「暗號」般滿天飛,反而說到藍籌,不少人都唉聲嘆氣,「抵抵抵,次次都 話抵買,弊在係『底』完仲有『底』呢!」不少人一邊一邊說:「嘩!穿咗啦!穿咗啦!」

基本分析反成蟹


 在波動市下,玩窩輪及牛熊證,如買大細,有一半機會贏。相反,跟PE、跟息率買股票,卻暫時一定輸。如做設計的陳先生,本來於八月下旬,恒指跌至一萬九千點時,把手頭數十萬元股票套現;本來可以獨善其身,於上週恒指跌至一萬八千點時,他又心思思以二十三元買入友邦(1299),及十九元五角買入中銀香港(2388),怎料股市又再下跌:「今次真係流血不止喇!」不過,陳先生認為中銀及友邦屬藍籌股,故放埋一邊「唔睇」,仍有錢剩的他再以餘下三分一現金,於上週一以一元七角買入旭光高新材料(67),他自言做足功課才買:「我見佢PE得三倍,業績又真係唔錯,佢喺高位四個幾,而家跌番落個幾,仲有中投都有買佢啲股(實為買入可換股債券)。」不過,自陳先生買入後,旭光股價如吃了瀉藥,本週一單日一度下挫百分之十四,收市價一元一角。股價比陳先生買入時,已累跌了超過三成五。陳先生這次「手痕」,令他一個星期之間虧損逾十萬元,記者問他會否止蝕,他說:「唔會,會等佢哋反彈番啲先放。我公司有超過五個同事蝕得甘過我。我諗,我都唔需要太傷心。」

輸贏即日揭盅 基本分析無助賺錢,現時散戶一於少理,如做醫學美容的Esther一向買開正股,最近亦「跟人」買窩輪,她說:「上星期買咗四萬蚊落隻13349度。」記者問13349(建行法巴二零三購)是什麼股票,她說:「我唔知呀,我之前睇電視,有人推介呢隻。我月初已經買過二萬蚊,見佢跌價,咪再溝少少囉。我係一毫買入,不過一買佢又跌到得幾仙。但唔理喇,咁六萬蚊都唔係好多錢啫。」Esther連窩輪都溝貨,可見現時散戶入貨相當不理性。這兩個星期,已多次有牛熊證及窩輪登上十大成交金額榜,於上週一更有兩隻熊證及一隻牛證齊齊上榜,單隻的成交額已與滙豐及中移動相若。牛熊證在這一季的成交額,由每日四十九億元急增至一百五十億元,升幅達兩倍。現時牛熊證連同窩輪成交,佔大市總成交三成,達二、三百億,遠較「過大海」去澳門賭錢、每日當地總投注額約一百八十多億元更高。

渣打認股證銷售董事翁世權指近期的盛況,是自○八年雷曼爆煲後首次,多隻窩輪的成交量甚至多於正股,他說:「咁嘅市況,啲人唔識揀股,純粹睇恒指升跌方向,仲要即日鮮,搏刀仔鋸大樹。仲要超過十倍槓桿都照玩,其實風險真係好高。我見有啲上星期連續三日共有一億元流入牛證,然後係星期四,超過四十隻牛仔被人殺晒,真係好少見。」現時市面有逾萬隻牛熊證,在市況波動下,平均每日有數十隻被「打靶」,本週一恒指跌二百多點,跌穿了一萬七千點水平,一瞬間觸及一萬六千九百九十九點,觸發三十四隻牛證被殺。近排經常單日或數日間殺完牛證再殺熊證,或倒轉,猶如左摑一巴,右摑一巴。但這些牛熊證死後都會推陳出新,任君選擇。翁世權表示牛熊證多人玩,加上市況波動,故衍生工具部門亦已見保守,「而家啲風險管理做到好足,拿好多錢來買期權做對沖,恒指升幾千點,或跌幾千點,我哋都買晒保險o架。」

閒錢無出路現金為王

事實上,現時揸藍籌、三四線細價股,又或樓市、外匯、黃金,全部皆下跌「通殺」,閒錢苦無好出路。近月多
隻藍籌或龍頭股業績差勁,令人失望,如思捷(330)、雨潤(1068)和玖龍紙業(2689)等,股價下挫近七成。另一方面,一向讓股民炒作的新股表現亦未如人意,徐工機械、三一重工和小南國,更因市況差而擱置及延期上市。

藍籌、新股不濟,三、四線股亦被「洗倉」,跌幅可達九成九。在歐債危機下,連一直長升長有,被視為避險工具的黃金,其價格亦每日震盪式下滑,本週一,現貨金單日大挫百分之七至每盎司一千五百多美元,銀價亦跟隨下挫一成多,本週二才稍微反彈。由於市場避險,美元反彈,師奶至愛的澳紙、瑞郎亦無得玩。最無奈的,是上週公布本港通脹率達百分之六點三,口袋內資金須要增值,有鋪「賭癮」的唯有轉向炒窩輪及牛熊證。

不過,玩衍生工具始終有風險,不少資深的分析師,如「基金教父」雷賢達,及中大全球政治經濟社會科學碩士 課程客席講師黃元山,皆勸諭大家短期內「現金為王」,切忌衝動。屬本港第一代證券分析師、人稱「大師」的林 森池,罕有「出山」,透過本刊向各散戶提供意見。

林森池一直是眾多價值投資者的偶像,他近年已退休,甚少公 開露面。記者本週二登門造訪,他一語道破現時股市說:「好亂!冇人可以準確預測!」他堅稱自己用的一套是價 值投資,是長期吸納盈利增長穩定的企業,用股息增長帶來的現金流再投資,並不是炒炒賣賣來賺錢。唯他耐心講 解給記者聽,現時用價值投資予亂市上,未必再適用。「唔同晒玩法啦,以前邊可以借貨沽o架?邊有咁多對沖基金,股價可以兩日內先大升再大跌,咁玩法邊個可以準確預測?」

加上,現時上市公司業務多不勝數,質素參差,「唉!你睇吓補習社又上市,旅行社都可以上市,幾多旅行社最 後執笠呀?就嚟我開間茶餐廳都可以上市啦。(點解會變成咁?)我覺得啲人愈做愈有問題,關乎專業操守同道德。」他表示自己近來沒有買賣股票,以往買落的藍籌如中移動、中人壽,則一直持有,散戶可引為參考。

友邦成散戶新愛股 藍籌無起色,唯獨友邦近日被不少散戶撈底或短炒,愛其抗跌力強;過去數星期已有五個交易日,打入十大成交金額,單日最多時成交額更高達十六億,成交量亦比滙豐高一倍。而友邦窩輪亦已有近一百隻,與其他大型藍籌相若,在今年初以$22買入友邦的阿華,即使股價曾高見$30,亦打算長揸不放,見上週友邦股價下挫至$24,更再買入3000股,「友邦上市嗰時話一年唔派息,但最終都有息派,證明佢財政好穩健。依家隻隻金融股都危危乎,係呢隻抗跌力強啲。」他頭頭是道說。近日經常唱好友邦的股評人鄧聲興,指友邦近期交投活躍,而且其主要業務集中於亞洲區,而非歐美地區,「佢之前公布業績,比市場預期理想,財政情況比內地的金融股亦好。」事實上,大行早前全體看好友邦。高盛雖調低其11至13年盈利預測1%至4%,但維持目標價$37,並維持在「確信買入」名單內。大戶如德意志、瑞信、大摩、里昂等都相繼買入。加上股評人紛紛乘機唱好,令友邦忽然變成散戶新愛股。

股災籠罩樓跌價散

樓市無運行,長實新盤將軍澳日出康城第二期領凱上週五開售,前一日恒指大跌九百多點,一千一百六十八個單位生不逢時,三日只賣出四百多五百伙,未能一Q清袋。上週五接近午夜十二時,尖沙咀港景匯的領凱售樓處,四、五名香港置業經紀圍着一名內地客,肉緊地游說他落票:「先生,你聽我說,不是四十八(樓),這是第九座的四十八,是九四八,在我們廣東話意思是『九世發』,九輩子都發財!」但至凌晨一時,準買家已走得八八九九,與○八年同一場地開售第一期樓盤首都時,揀樓揀天光,一晚沽清二千多個單位的盛況,可謂大相逕庭。這是領凱樓盤開售首天,事前高調公布收到千七張票,長實副主席李澤鉅頭馬之一的執行董事趙國雄,用盡每一道板斧,在公布開售當晚八時出來作最後衝刺,指樓盤開售一小時賣出二百個單位,試圖淡市營造盛況。但據不同地產經紀表示,下午二時已有買家開始揀樓簽約,「買樓造契,閒閒哋都要兩三小時啦,第一位買家七點就行出嚟,你話嘞!」換句話說,實情是六個鐘才賣到二百個單位。

地產減佣求開單 為鼓勵促銷,發展商扭盡六壬,既以低於同區二手開價,又創「一口價」賣樓,樓層不論高低劃一價格,谷客搶貨。長實亦罕有地給予地產代理樓價百分之二點二作佣金,各區代理都來碰運氣,造就近年新盤難得盛況。「買樓有回贈!買樓有回贈!」經紀由港鐵站排到售樓處,有的唸口簧式的以大減百分之二佣金回贈客戶,但求開單。除了直接減佣,亦有經紀以萬元計現金券作利誘。

住在北角、任職公務員的蔡氏夫婦,購入了十一座高層向山千三呎單位作換樓,他們睇過維景灣畔、都會駅二手 樓,「領凱平吖嘛,低過二手樓嘅價可以買到新樓,夠抵!雖然配套未完善,但二○一三年落成,到時配套會好啲。」他們選擇即供,貪有樓價百分之六回贈,「咪當樓價已經掉咗百分之六囉!哈哈。我哋自己住,唔擔心樓價跌,香港地買磚頭唔使驚。股市跌,美國自然會出招,到時大把水救市。」
七大二手盤捧蛋


氣氛看似大好,但開售時發展商聲稱收票千七張的水分卻甚高。本刊記者假扮有意買樓,地產經紀為求入票,將
誠意金由十五萬元大幅減至五千元,餘款由地產代理代出,直至揀樓才付清,並直認:「無所謂啦,啲票得三分一係堅。」新盤低價開售都遇挫,二手交投更趨淡靜。上週末十大屋苑有七個錄得零成交,大圍金獅花園及粉嶺花都廣場都有撻訂個案。本港已進入加息周期,以滙豐銀行為例,三個月內加息兩次達六十五點子,市場預料樓市已步入寒冬,保守估計年底前樓價將下調百分之五。

長遠經濟無運行

「基金教父」雷賢達對香港未來一年的經濟情況亦不樂觀,認為壓力非常大,他說:「歐洲有好多國家都會出現 嚴重的經濟衰退,而美國就睇佢撐得幾耐,香港一直嘅繁榮都係歐美所賜,歐美出現問題,要降低生活水平去減債,香港出口一定會受影響。即使中國崛起,但都要一段時間,唔可以支撐全球經濟。」滙豐銀行月初在巨額盈利下 宣布裁員,觸動業界神經。投資銀行首當其衝,招商證券香港董事總經理溫天納亦看淡經濟情況,指近期生意,包 括上市活動都已暫停,現階段不會擴張。至於裁員,他說:「近來上市嘅生意唔係少咗,係停咗!但吸取海嘯時嘅 經驗,嗰時香港經濟復甦得好快,所以我哋都唔會即時話裁員,但如果去到明年第一季情況都無改善,就可能要行呢一步了。」而地產代理界別,亦指樓市已靜了三、四個月,如果市況繼續再差下去,不排除有細行要裁員關分行。

已經「死剩半條命」的廠佬亦雪上加霜,最近已零星出現三代做廠的廠佬主動放棄,賣盤不做。玩具城董事總經理鄭躬洪則稱,近來歐洲訂單數目按年跌幅逾一成半,很多公司更被拖數期,由原來的三十至六十天拖到九十天
,甚至個別達一百二十天,「今次歐洲債務危機係十級海嘯,影響難以想像,不過上次金融海嘯已經係淘汰賽,留得低都係比較大隻同健康嘅公司,應該暫時唔會有倒閉潮……不過只係到目前為止。」

零售影響逐步浮現 年底舉行的工展會已開始出現退展潮,廠商會副會長施榮懷坦言,今年有十間參展商因周轉不靈要求退展或者遲俾錢,其中包括三間飲食業中小企退出唔玩,數量超過金融海嘯時期,「從未見過有咁多!」施榮懷認為,情況較金融海嘯時期更嚴峻,期望政府在施政報告中提供稅務優惠,幫中小企渡過難關。批發商訂單減少,零售業的影響亦相繼浮現。參茸海味是經濟的寒暑表,香港海味雜貨商會主席麥澄波指,銷量按年下跌七、八成,他指日本海嘯之後日本吉品鮑貴了一倍,加上港元貶值,來貨成本平均貴兩成,花膠、海參等亦貴一倍,「呢啲正一滾水淥豬腸,啲錢就係咁縮,我哋賣名貴海味,無錢嘅又食唔起,有錢嘅,都無心情食啦。依家神仙都救唔番,即係等死。」來年經濟困局將蔓延,影響衣食住行等各個範疇。

PermaLink: https://articles.zkiz.com/?id=28113

周日趣 BLOG BLOG:牛熊賭檔 儍仔樂園

1 : GS(14)@2011-10-23 15:58:58

http://hk.apple.nextmedia.com/te ... 307&art_id=15731073
股市淡薄,不如賭博。全世界最大的賭場喺邊度?去年美國拉斯維加斯博彩收益唔夠 400億元,澳門老早超越 1828億元,是其四倍,但一山還有一山高,單純估恒指升跌的牛熊證,去年成交 1.45萬億元,澳門只是香港七分一,真的小巫見大巫。
香港已公認成為全球最大合法賭場,早排入到證券行,師奶同阿叔爭按股票機冧巴,已非滙豐( 005)、工行( 1398)等傳統藍籌,反而是五位數字的牛熊證,好奇之下,與數位長輩閒聊,得出他們玩牛仔及熊仔的心得,在此與大家分享。
股榮:「點解唔炒股買牛仔熊仔,你唔覺好似賭大細咩。」
阿叔:「當然唔同,過大海賭大細要買船飛,每鋪落注後起碼要等 1分鐘先開盅,輸咗乜都冇……牛仔就唔同,買完幾秒後會跳,快過股票多多聲……想刺激買 200點內打靶的,跳幾格即刻翻一番,保守的就買一千點收回,但跳得慢唔好玩。」
股榮:「唔驚打靶完渣都冇?」
阿叔:「咁係你睇錯市,都慣咗啦,都唔係渣都冇,有時無啦啦會退番百幾蚊畀我,聽講係叫做咩(剩餘)價值,可以飲餐茶唔錯。」
股榮:「慣咗係咪你輸多贏少?你買咗幾多先有百幾蚊退,知唔知點計?」

投資變投機 淪賭大細工具
阿叔:「你就成日輸,只係近排手風唔順,早排跌市買熊仔執好多……買一萬蚊有時都退到幾百,當係安慰獎……佢哋(發行商)解釋過點計咩(剩餘)價值,聽完唔記得,你想知就問隔籬個師奶,佢輸到好熟。」
師奶:「熟你個頭,只係心有不甘,無啦啦打靶完即刻爆上,你話唔激氣,攞返少少買餸都好啦。」
股榮:「有冇計過玩到家,埋單賺定蝕?」
師奶:「有輸有贏啦(通常講呢句九成九輸多),收市前都放,驚第二日會被啪,但係早前放剩幾千股,原來已經升咗成倍,開心咗成日。」
股榮:「咁多隻牛仔熊仔,你用咩方法去揀?」
師奶:「我都係跟大隊買,邊隻成交大就揀邊隻,執二三格就會走人。佢哋話,成交大即係有大戶收貨,發行商唔會嘜價,我覺得都好有道理……唔講住嘞,你睇個市又升,我都係快啲出貨。」
牛熊證起源於歐洲,卻在香港發揚光大,投資者可能自得其樂,但實情卻將投資變投機,甚至淪為賭大細的工具,半日鮮已嫌多。港股除了變成動物園外,也成為儍仔樂園。
股榮
2 : Ben(10970)@2011-10-23 21:01:16

我就是其中一名傻仔。哈。
3 : superkkw(6672)@2011-10-23 21:27:31

身邊好多朋友玩緊
由佢地啦,輸獲金就自然會醒
你左住佢,仲話你左人發達,尤如殺人住家
4 : GS(14)@2011-10-23 22:03:44

有得玩幾好呀
5 : 200(9285)@2011-10-23 22:16:49

把澳門的娛樂場搬到香港來了‧
6 : GS(14)@2011-10-23 22:40:49

5樓提及
把澳門的娛樂場搬到香港來了‧


好玩過老虎機
7 : Ben(10970)@2011-10-23 23:21:35

3樓提及
身邊好多朋友玩緊
由佢地啦,輸獲金就自然會醒
你左住佢,仲話你左人發達,尤如殺人住家


到時就悔不當初了。
8 : tom2288(5941)@2011-10-24 08:16:42

香港的投機賺錢教育, 廣告實在做得太好, 聰明仔都會變傻仔, 變身後的傻仔見到聰明仔, 就會笑佢唔識變身, 賺錢太慢無鬼用!
9 : nodnod_mat(15408)@2011-10-24 08:59:53

1樓提及

http://hk.apple.nextmedia.com/te ... 307&art_id=15731073
股市淡薄,不如賭博。全世界最大的賭場喺邊度?去年美國拉斯維加斯博彩收益唔夠 400億元,澳門老早超越 1828億元,是其四倍,但一山還有一山高,單純估恒指升跌的牛熊證,去年成交 1.45萬億元,澳門只是香港七分一,真的小巫見大巫。
香港已公認成為全球最大合法賭場,早排入到證券行,師奶同阿叔爭按股票機冧巴,已非滙豐( 005)、工行( 1398)等傳統藍籌,反而是五位數字的牛熊證,好奇之下,與數位長輩閒聊,得出他們玩牛仔及熊仔的心得,在此與大家分享。
股榮:「點解唔炒股買牛仔熊仔,你唔覺好似賭大細咩。」
阿叔:「當然唔同,過大海賭大細要買船飛,每鋪落注後起碼要等 1分鐘先開盅,輸咗乜都冇……牛仔就唔同,買完幾秒後會跳,快過股票多多聲……想刺激買 200點內打靶的,跳幾格即刻翻一番,保守的就買一千點收回,但跳得慢唔好玩。」
股榮:「唔驚打靶完渣都冇?」
阿叔:「咁係你睇錯市,都慣咗啦,都唔係渣都冇,有時無啦啦會退番百幾蚊畀我,聽講係叫做咩(剩餘)價值,可以飲餐茶唔錯。」
股榮:「慣咗係咪你輸多贏少?你買咗幾多先有百幾蚊退,知唔知點計?」

投資變投機 淪賭大細工具
阿叔:「你就成日輸,只係近排手風唔順,早排跌市買熊仔執好多……買一萬蚊有時都退到幾百,當係安慰獎……佢哋(發行商)解釋過點計咩(剩餘)價值,聽完唔記得,你想知就問隔籬個師奶,佢輸到好熟。」
師奶:「熟你個頭,只係心有不甘,無啦啦打靶完即刻爆上,你話唔激氣,攞返少少買餸都好啦。」
股榮:「有冇計過玩到家,埋單賺定蝕?」
師奶:「有輸有贏啦(通常講呢句九成九輸多),收市前都放,驚第二日會被啪,但係早前放剩幾千股,原來已經升咗成倍,開心咗成日。」
股榮:「咁多隻牛仔熊仔,你用咩方法去揀?」
師奶:「我都係跟大隊買,邊隻成交大就揀邊隻,執二三格就會走人。佢哋話,成交大即係有大戶收貨,發行商唔會嘜價,我覺得都好有道理……唔講住嘞,你睇個市又升,我都係快啲出貨。」
牛熊證起源於歐洲,卻在香港發揚光大,投資者可能自得其樂,但實情卻將投資變投機,甚至淪為賭大細的工具,半日鮮已嫌多。港股除了變成動物園外,也成為儍仔樂園。
股榮


呢D害人野任意發行, 正正係港苦唔理散戶死活既其中一個鐵証,
10 : superkkw(6672)@2011-10-24 09:23:48

放縱向下炒仲過份啦
11 : kamfaiAthrun(1488)@2011-10-24 10:31:07

agree with "放縱向下炒仲過份"
12 : GS(14)@2011-10-24 21:21:37

8樓提及
香港的投機賺錢教育, 廣告實在做得太好, 聰明仔都會變傻仔, 變身後的傻仔見到聰明仔, 就會笑佢唔識變身, 賺錢太慢無鬼用!


我就是人辨啦,
13 : GS(14)@2011-10-24 21:21:54

11樓提及
agree with "放縱向下炒仲過份"


唔是唔想捉,是無辦法捉
14 : superkkw(6672)@2011-10-24 21:24:30

如果好似大陸咁行 ST 得唔得?
供股返黎的錢就偷晒出街
另外 港交所對發CB或供股嚴D又得唔得
15 : GS(14)@2011-10-24 21:26:54

14樓提及
如果好似大陸咁行 ST 得唔得?
供股返黎的錢就偷晒出街
另外 港交所對發CB或供股嚴D又得唔得


行ST根本無用,只會更引起賭性,反而封死印CB和供股限制更有效
16 : superkkw(6672)@2011-10-24 21:28:22

但供返黎的錢冇咁易偷晒出街
因為連蝕3年就停賽
17 : GS(14)@2011-10-24 21:29:21

16樓提及
但供返黎的錢冇咁易偷晒出街
因為連蝕3年就停賽


馬時亨當年咪搞呢樣囉,結果股價大跌,朱太一出來殺人就...
18 : superkkw(6672)@2011-10-24 21:33:03

不過頭2年勁蝕,第3年做到岩岩平手
你都吹佢唔漲
都係封CB 同供股實際D
而且大把人深受供股之苦
要行應該會多D人支持
19 : GS(14)@2011-10-24 21:35:38

18樓提及
不過頭2年勁蝕,第3年做到岩岩平手
你都吹佢唔漲
都係封CB 同供股實際D
而且大把人深受供股之苦
要行應該會多D人支持


其實股票買賣應該現時都幾好啦,不過有升降板制度更好
20 : superkkw(6672)@2011-10-24 21:37:16

都好
玩得過份,送佢去8字頭
殼價即唔見一半
21 : 200(9285)@2011-10-24 21:39:51

20樓提及
都好
玩得過份,送佢去8字頭
殼價即唔見一半


莊先生,豬太多得你唔少‧
22 : GS(14)@2011-10-24 21:48:18

[realblog]http://realblog.zkiz.com/greatsoup/8866[/realblog]

想起舊作一篇
PermaLink: https://articles.zkiz.com/?id=276357

Next Page

ZKIZ Archives @ 2019