ZKIZ Archives


十優港姐麥明詩壓力爆煲匿埋喊

1 : GS(14)@2015-06-18 14:34:40

2015-06-18 NM

新一屆香港小姐日前進行面試,女拔十優狀元、劍橋法律系畢業的麥明詩(Louisa)即時彈出!女神連日來被網民大起底,指她曾到美國接受太空人訓練,更有志做「女特首」,亦有讀者報料,指她大學時男友多頻頻換畫。一夜成名,唔係個個頂得順,外表淡定的麥明詩,據知未入圍已壓力爆煲,體重急跌唔夠一百磅,要匿埋喊發洩。有讚亦有彈

去年香港小姐刻意玩神秘,結果選完一年,三甲港姐至今依然面目模糊零人氣;吸取教訓,大台今年轉玩高度透明,將首輪面試的候選佳麗玉照放上官網,成功引起網民熱話。尤其挾住十優狀元,來自英國劍橋法律系的麥明詩,以超班學歷加靚樣獲一面倒激讚,未入圍已經贏民心。但有讚亦有彈,有指麥明詩在英國讀大學期間有一籮男友,幾乎全部是法律系同學。無得輸,但壓力大!據了解,多年來讀書成績標青的麥明詩,正式鬥靚前壓力已大到頂唔順。「Louisa話以前預備公開考試,一日要溫習十幾個鐘咁辛苦都捱得住,佢以前話唔明啲女仔點解選美會有壓力,終於到自己落場,先知道原來咁大鑊!大家唔好俾佢個樣呃到,外表睇好硬淨,其實呢幾日俾人係咁起底,佢都有喺屋企喊。」知情者說。

唔夠一百磅

條路自己揀,麥明詩唯有先集中火力備戰。本週一(六月十五日)下午,記者發現著住碎花裙褲出動的她連踩兩場,第一站是到木星街做中藥美容扮靚,逗留兩粒鐘後,素顏離開。「讀書嗰陣佢有啲baby fat,入U讀law辛苦,呢幾年加加埋埋瘦咗十幾磅,Louisa而家唔夠一百磅,身邊朋友都覺得佢太瘦,不過咁樣上鏡又好似啱啱好。」知情者說。三十四度高溫下,麥明詩著住三吋高踭鞋,由木星街行去炮台山站搭港鐵落中環,做通淋巴,一小時後,身邊多了個女性朋友陪住走,二人行Zara、TopShop,買衫買鞋,麥明詩唔會心大心細,睇中就俾錢,速戰速決。

魔法王過氣女友都選

面試大起底,除了劍橋女神,在元朗開牛雜店的李美琪(Monnie)亦被網民熱捧,理由是牛雜妹自爆「帶住122磅肥胖身軀」面試,雖然重磅拉低入圍機會,卻被大讚夠坦白有勇氣。至於曾參選過珠江小姐的黎褘樂(Natalie),被指曾跟抄橋魔法王甄澤權拍過拖,已經半隻腳入娛圈的她,是順德電視台主持人,在微博晒選美照外,亦有上載自己跟甄澤權的拍拖照。

牛雜妹Monnie

Monnie面試時的打扮別樹一格,甚至不介意露出「小肥腰」。

巨乳Mandy

身材豐滿的Mandy,在Facebook放了一堆晒巨乳的豪放相。

高學歷港姐

標榜智慧與美貌並重的港姐,不過高學歷而又去參選的女仔並不多,歷來最有料應該是91年的「三料冠軍」郭藹明,當年以美國南加州大學機械工程學碩士生參選。而另一高學歷的則是99年冠軍,在西門菲莎大學主修心理及經濟學的郭羡妮,憑住雙學位奪得冠軍、最上鏡小姐以及千禧才智小姐。而97年參選的任葆琳,亦是畢業於哈佛大學,當年被封為「哈佛小甜甜」,不過大熱倒灶未有奪獎。
PermaLink: https://articles.zkiz.com/?id=291084

Next Page

ZKIZ Archives @ 2019