自家劇《瑪嘉烈與大衛》贏口碑ViuTV破格大膽愛 正視同性戀
1 :
GS(14)@2016-04-13 17:08:59■ViuTV自家製作劇集《瑪嘉烈》前晚首播，透過林保怡接載的兩名男同志講述戀愛困難。電視圖片
【電視執位】林保怡與周家怡為ViuTV主演的新劇《瑪嘉烈與大衛系列綠豆》前晚首播，最矚目的除了兩位主角自然流露的演技外，還有劇中破格出現男同性戀者拖手和攬抱劇情，有別過去無綫隱晦交代同性戀者的手法，ViuTV今次大膽創新，連電影人舒琪也大讚說：「起碼是香港電視史上難得一見的處理。」逢周一、二晚上11時播映過往無綫劇集對同性戀者感情戲總刻意迴避，或是以另類隱晦手法交代，不過，在全新免費電視ViuTV中，卻勇於面對。林保怡與周家怡主演的ViuTV《瑪》劇前晚首播，劇中飾演的士司機大衛的保怡，接載了一對男同志情侶，二人在車上為同居問題爭吵，落車時其中一人捉實另一方的手，繼而在街頭相擁，劇情表達全不矯揉造作，一新觀眾耳目。不少網民看後大讚手法破格創新，就連電影人舒琪昨日凌晨也在facebook讚說：「《大衛與瑪嘉烈》（編按：該是《瑪嘉烈與大衛》）有啲偽中產吧，但中間一段用一對同志的感情來映照直couple主角的關係，卻起碼是香港電視史上難得一見（如果不是第一次的話）的處理。」被該劇易角的邵仲衡前晚也有捧場，並於fb大讚保怡靚仔。
■兩名男同志落車後在街頭攬抱，大膽手法獲網民讚賞。電視圖片
■兩名男同志在車上雖沒親密舉動，但言語間已明示交代同性戀問題。電視圖片
■周家怡讚《瑪》劇寫實貼地，有更多空間讓觀眾感受劇情。
■邵仲衡雖然被易角，但前晚首播時他也有捧場。資料圖片
家怡：吸引年輕觀眾
對於今次新劇被網民讚破格，周家怡昨在電話中回應說：「呢個戲同我以往拍嘅劇好唔同，因為個拍法好唔同，佢哋好講求個演員節奏，好寫實、好貼地，我希望大家睇嘅時候有共鳴。其實我哋同TVB劇唔係target緊同一班觀眾，呢個劇係吸引啲年輕啲觀眾睇，多啲空間畀大家去諗，個個睇嘅感覺好唔同。」問劇中可有大膽劇情時，家怡笑說：「有㗎！呢個戲寫實，都露骨㗎！但電視尺度去得邊吖，係個感覺囉！」莫非劇情有她與保怡之間的性趣？家怡笑說：「暫時冇去到咁入，但嗰場戲係女仔大膽，我挑起先嘅，又唔係叫挑逗，只不過係我開口先！」
保怡：加好多嘢表達
保怡則回覆說：「我哋都有好多床戲、好親密接觸，互相即同撩腳，其實劇本冇寫，我哋感覺劇本應該要加，先會表現嗰場戲兩個人關係。我哋加好多嘢，但我唔希望用床戲去吸引觀眾，我反而希望觀眾去感受一吓男朋友同女朋友真係有呢啲嘢。」《瑪》劇改編自新晉作家「南方舞廳」的系列小說，劇中飾演保怡好友的潘燦良，原來中學時對保怡曾有hehe感覺（游學修和林耀聲分別飾演年輕版潘燦良和林保怡），惟保怡一直只當他是好友。長大後，潘燦良覺得保怡女友周家怡並沒有真正愛上保怡，於是嘗試追求家怡來測試她的真心，結果卻令家怡深深愛上自己。採訪：魯吉
來源:
http://hk.apple.nextmedia.com/entertainment/art/20160413/19568447
【神級演技】《瑪嘉烈與大衞》林保怡崩潰solo 網民like爆
1 :
GS(14)@2016-07-06 08:01:23第二十四集結尾，林保怡的演出細緻到可以做教材，網民一致激讚。他還多了個外號，叫「帽兒」，因為網民戲稱他戴了綠帽。
「求影帝演技GIF」、「solo內心戲好正」。用一場三分鐘的崩潰戲震驚全球網民的，是林保怡。林保怡係令我開心嘅男人。杯葛TVB多年，對於他，我的記憶仍停留在他唱的神曲「男人心一字馬」。想起他，哼番句「讓女人艷麗也暗啞」，總是笑到腰都彎。但林保怡最近令我好揪心。
因為ViuTV劇集《瑪嘉烈與大衞系列綠豆》，第二十四集（28/6播出）最後一幕，他飾演的大衞收到同居女友瑪嘉烈的訊息趕回家，卻發現對方已收拾離開，他那種悵然，欲哭無淚，唔知應該行定企定坐，然後黯然關門，坐下，抽泣，痛哭，拭淚，致電，失望，那份心酸流出銀幕之外。約林保怡做專訪，身邊朋友大為興奮，甚至有鍾意套劇鍾意到已在翻看的女同事自薦要來幫忙，可見《綠豆》真的牽起了熱潮。「各位高登哥哥，高登姐姐，我還有很多東西要學。」他笑說。我追問：「其實嗰場戲有冇NG？」「只拍咗一次，多一次都唔得。老實講，我睇咗三次，三次都有喊，有流淚。」自己給自己演技感動，都應該係演技最高境界啦啩？「我唔敢講係演技，我根本冇演『大衞』。嗰段日子我就係大衞，無論發生咩事，我都係大衞，拍拍下外面爆炸，我都仲係大衞，唔會變番林保怡。你看《珠光寶氣》高長勝就是高長勝；《金枝玉孽》孫白揚就是孫白颺。」冇得NG，因為那一刻的情緒是堅的，堅過石堅。「其實每次拍新劇，我都好驚，開頭要『執藥』，逐啲逐啲了解角色，慢慢就知要帶咩武器去做。」投入每次演出的他，看電影會仔細留意走位、對白、燈光，更會研究演員的細緻演出，對表演藝術絕對尊重。我提到大台玩浮誇無聊的所謂「演技節目」《Sunday好戲王》，他答得很妙。「我突然諗係將高倉健同占基利擺埋一齊。」過了兩秒，他笑說：「都可以食餐飯嘅。」得體！運鏡、燈光、敍事、場景、演出，《綠豆》都跟大台製作很不同。他認為劇作貼近生活，好逼真。「我哋唔係一開機就講對白，會做吓其他嘢先。自然啲。其實有啲似佢哋擺咗部機响度偷拍我哋。」大台電視劇真身係廣播劇，幾乎沒一秒沒對白，好怕觀眾唔明，會特寫物件、演員表情交代劇情，搞到演員擠眉弄眼，再送上幾分鐘前才播過的回憶片段，觀眾在電視台眼中到底有幾冇記性？「我們的觀眾不蠢，但當我們經常把他們當蠢仔蠢妹，佢哋就真係變成蠢仔蠢妹。大家太習慣所有嘢都講到好白。有啲位我哋希望讓觀眾自己領會。以前拍劇好趕，一開機就要將對白講完。『夠鐘收工啦，我哋剪接就得，觀眾都會睇，冇問題』。」但這次他與幕後都寧願花時間好好討論才roll機，未諗通寧願先擱置。「唔想粗製濫造。」神級演技除了源自林保怡個人造詣，還由於有時間讓情緒蘊釀。流水作業，演員戲都未入到，配備最鋒利嘅刀，都擺到生鏽。「我記得《珠光寶氣》有場喊戲我拍咗三次，但我真係喊唔出，因為戲根本令我哭唔出。」對於《綠豆》兩位新晉導演Fatball和25，他讚不絕口。「我拍咗20幾年電視劇，首次遇上咁鍾意的導演。我同佢哋講『唔好理我係邊個，我唔係咩視帝。你要話我知，場戲有咩要加減。』如果我覺得自己係大牌，唔使聽人話，我就蝕啦，戲都唔會咁好睇。」劇中有有關同志愛的劇情，有觀眾覺得破格，也有人覺得敏感。「我可唔可以試下扮高登仔？『嘟嘟嘟嘟嘟』。唔使大驚小怪囉，我一直都覺得啲角色根本沒性別，只係講愛情，瑪嘉烈同大衞可以係同一個性別。」係囉，都2016年了，有禁忌的劇集，誰還想演，誰還要看？記者：葉青霞攝影：鄧鴻欣
很多網民唔明林保怡只係的士司機，點解戲中間屋咁靚。他笑說：「一個的士牌好貴，要七百幾萬。大衞以前高薪厚職的，駕的士，係因為佢鍾意自由。」
林保怡與周家怡都十分入戲。林保怡說現在周家怡打電話給他，他仍會用大衞tone跟她說話。
高登網民真心like林保怡演出，睇到好肉緊。
來源:
http://hk.apple.nextmedia.com/su ... t/20160705/19681436