同謝安琪指腹為婚蘇永康老來得子
1 :
GS(14)@2016-12-01 08:06:42■康仔與老婆結婚兩年，老婆成功懷孕，明年4月預產期。資料圖片
現年49歲的蘇永康宣佈老婆馮翠珊陀五個多月B仔，預產期是明年4月2日，康仔昨在電話開心說：「老來得子，試咗兩年仲以為冇，老婆都四條嘢，之前成年放假都試唔到，冇啦啦上天跌畀我，仔女都殺！」
幫老婆掃背
問到是否自然受孕？康仔說：「我哋其實係意外，佢嫁畀我都30有8，係高齡，我哋撞時辰計日子，等咗兩年終於中咗，過三個月話畀阿媽知堅有咗，我媽咪80歲，而家好似後生20年，每朝問老婆想食乜煲畀佢。」快為人父的康仔都好緊張，有感冒即衝去睇醫生：「如果孕婦感冒好麻煩，唔可以傳染佢，所以要工人戴晒口罩，真係要小心啲，而家屋企好似打仗。」老婆懷胎滿三個月，康仔陸續通知好友：「有日我飛東京，收到謝安琪嘅WhatsApp：『我搞掂啦，三個月！』我主動第一個同佢講：『我都有咗，你個女，我個仔嚟！』我同阿聰講笑，不如玩指腹為婚！好感謝朋友守口如瓶，原因老婆始終高齡產婦，驚有意外，呢胎頭幾個月幾舒服，但呢兩朝見佢食完早餐嘔番出嚟，自己盡老公責任幫佢掃背清理，女人洗完頭成地頭髮，以前呢啲我留工人做，而家我想屋企清潔啲，自己低頭執，唔等工人。」
■謝安琪與康仔的老婆差不多時候懷孕，一個陀女一個陀仔。資料圖片
■趙勁皓宣佈盧頌之有咗，等女友生完會結婚。資料圖片
盧頌之陀B
之前康仔還向狄波拉請教教兒之道，他說：「霆鋒係幾反叛僆仔，但佢見到前輩包括我九十度鞠躬，問佢點教到咁有禮貌。」他笑言對囝囝只有一個期望：「我唔想個仔似我，似我醜到阿媽都認唔到。而家必須要做嘅嘢，就係唔好為社會製造多個造反嘅人，我唔想生個梁頌恆，我唔想生個游蕙禎，你可以反叛，但絕對唔可以做啲背祖忘忠分裂國家嘅事情。」此外，趙勁皓都宣佈女友盧頌之懷胎五個月，等B女出世後才結婚，他在社交網向女友許諾：「如果你唔係預備好任何時間都講對唔住，千萬唔好諗住結婚，but I m ready@dadaloooo一生一世。」採訪：皓騫
來源:
http://hk.apple.nextmedia.com/entertainment/art/20161201/19850709