ZKIZ Archives


男神賣西裝潮著要「露肌」

2014-11-27  NM
 

警報!一股韓流襲港!男人穿西裝、要夠緊身;西褲、要有吊腳。身為兼職模特兒的李家駒(Nick,廿六歲)及黃致源(Kyle,廿二歲),把韓仔西裝再改良,配合港仔身形,「韓國係用女裝嘅辦去做,香港男仔唔夠瘦,著落太緊身,我哋會改鬆啲,並剪裁到無胸肌都好似有胸肌!」兩人說。

二人中五畢業後,在Tom Ford賣西裝,今年初齊齊下海創業,開設網店Hiatus Fashion。今個月正式在尖沙咀百利商場開鋪,賣每套二千元、潮得來又復古的西裝。Hiatus這個字的意思,是「裂縫」,「我哋想客人入我哋間鋪時,好似入咗條裂縫,跌番入第一次世界大戰時嘅英國紳士文化……」的確係,好扮嘢。

老闆Nick和Kyle,擁有model身形,頭髮蠟到風都吹唔郁,絕對貪靚。即使是中學時穿校服,二人亦十分講究,恤衫要「攝」到有泡泡哋的感覺,學生皮鞋要著英國品牌Clarks。為了凸顯fit爆身形,學校毛衣也要挑剛剛貼身的尺碼。Nick說:「我俾女朋友話,裝身太耐,出門口嘅時間仲慢過佢!」Kyle則笑說:「如果無洗頭,我一定戴帽出街。而家我留緊長頭髮,型吖嘛!」

二人穿上自己設計的西裝,都有一點「韓仔味」。Kyle說:「好多情侶拍拖行我哋鋪,啲女仔見自己男友著完,話好似韓星,男友即刻笑到飄飄然!」情侶入到鋪,往往是女方滿懷期望地俾意見,「我哋會分頭一個同男仔度身、一個同女仔吹水,減少sell緊嘢嘅感覺。」

款式:無肌變有肌

Nick和Kyle都認為,現時興的「韓仔西裝」太窄身,不夠大體,故把其改良並加點英倫復古味。Nick說:「韓仔西裝係有slim cut效果,但西裝邊位唔夠闊,手袖鈕釦又開唔到,完全無detail位可言。」市面上的西裝連鎖店,如G2000,千多元便可執齊一套西裝,更提供改褲腳服務,前後一星期搞掂。相比之下,Hiatus一套西裝的最低消費為二千元,度身訂做要二十日才能完成,競爭力成疑。要和大牌子競爭,Nick及Kyle從剪裁入手。令二人最自豪的,是其立體「顯肌」剪裁法。「一般西裝嘅肩膀位,係會縫成水平線,但我哋會將肩膀位打斜、伸展到背部兩至三厘米,令西裝更加挺身。明明無胸肌,睇落都好似有胸肌!」Nick說。而恤衫則在腰間加一個褶位,令著起來更筆挺。他們認為這種設計比「韓仔西裝」更能凸顯身材,「韓仔成套都收身,但我哋覺得應收身嘅部分就收身,應突出嘅部分就突出,咁先可以凸顯男性健碩嘅胸肌!」另外,男士著恤衫時,時常摺高衫袖,他們考慮到這點,於是仿效名牌,在恤衫手袖內加上花邊。並在領內加上花紋,與衫袖的花邊相呼應,增加「嫵媚」。二人在Tom Ford打工時,一邊學名牌的設計意念,一邊自學如何畫設計圖做辦。Nick說:「喺Tom Ford打工時,靜靜雞拎啲靚嘢穿上身試,大概知道好嘅西裝cutting係點。好似腰圍要收啲,胸膛可以闊啲。每季公司都會派小冊子俾我哋,教我哋嗰季興咩,學咗唔少。開始設計時,我哋用自己著得舒服嘅西裝做藍本,照鏡用繡花針,喺覺得要收身嘅地方做記錄,成為自己品牌嘅款式。」

定價:平價Tom Ford

總結在Tom Ford打工的經驗,他們指靚西裝有三個要素:夠挺、夠slim、以及夠man。Nick說:「一套靚西裝,Tom Ford起步價都要二萬幾。雖然剪裁質量好,但唔係每個人都負擔到。」二人創業前,已決定主攻市場上缺乏的中價「靚」西裝市場。二人當初為尋找心水布疋,竟由深水埗搵到首爾。Kyle說:「不同國家嘅布疋都有不同特質,例如意大利布疋羊毛成分較高,做出來的效果也挺身,但一米長就要八十蚊。日本布疋的款式就特別啲,數量都比較少及短,可能只有三十米長,每種花色只出一次,所以我們可以把布疋買斷,成為獨家款式。」一套男裝所需布料約六至八米,故單是布料成本便要六百多元。兩人把設計好的款式,交由市面上一些裁縫師傅縫製。據知,一套西裝,縫製成本要約一千多元,毛利三至四成,定價二千元已「無乜肉食」。

客路:四成gay客

當初他們只開網店,都是靠facebook及Instagram宣傳,但為了更「吸睛」,兩人親自上陣,穿起自己設計的西裝行catwalk。為了找靚景襯托西裝,他們更不時要凌晨出動,「我哋荃灣workshop出面有道門幾有復古味,但日頭好多人行,要等到夜晚才出去影。點知夜晚落咗閘,又要等到第二朝,哈哈。」

現時有了鋪頭,他們更能把以往在Tom Ford學到的sale客招應用。「當客人一行入嚟,睇客人拎起咩色同咩款嘅衫,都大約知個客嘅風格。到時會再埋去八卦吓個客買嚟做咩。」兩人發現,來買西裝的客人主要有三類:第一是結婚做禮服:「佢哋最鍾意復古同誇張嘅款式。」第二是上班族。「他們注重細節,所以sell客時會講解多啲鳳眼(袖口的釦洞)嘅顏色選擇,及袖口花邊款式,令佢哋套西裝更個人化。」Nick說。第三類,竟然是同性戀客人:「佔咗生意四成。佢哋好大膽的,好有自己風格,唔使太多意見。」由於怕客人被標籤,說起這些Nick和Kyle便顯得避忌。當客人堅持己見時,阿Nick亦有他們對潮流的執着,「好似而家興恤衫袖長過西裝袖,我哋都會盡力說服客人跟番個潮流。但如果客人嘅要求會破壞我哋設計,我哋寧願唔接呢單生意,以免影響品牌。」

Hiatus Fashion門市開了廿多日,已做了八萬元生意。他們亦對未來半年的生意寄予厚望,「冬天應該會多啲人買西裝,加上今年好年,年尾會有好多人趕結婚,未來半年真係好重要!」Kyle說。興奮的同時,他們亦意識到,穿在他們身上「出show」般的西裝,未必是普通客人那杯茶,所以亦開始發展非西裝系列,「除咗已經賣緊嘅恤衫外,我哋都設計緊一啲歐式大衣同西褲,希望可以提供多啲選擇俾客人,吸多啲客。」Nick說。問及生意展望,身為時裝迷的二人,不是說要開幾多間店,或賣多少件西裝,而是雙眼發光說:「最想我哋啲衫入到Harvey Nichols!」

開業資料

(3/14)‧租金‧$18,000^ ‧裝修‧$42,000‧入貨‧$150,000‧雜費‧$10,000‧總投資‧$220,000^三按一上(荃灣工廈租金)

營業資料

(10/14)‧營業額‧$120,000 ‧租金‧$19,500* ‧入貨‧$24,000‧人工‧$20,000#‧雜費‧$4,000‧盈利‧$52,500*荃灣工廈及尖沙嘴店租金#老闆二人各一萬元人工

一點意見

郭子鋒(Kay Kwok)時裝設計師,曾為容祖兒、張惠妹等明星設計演唱會服裝,個人品牌「Kay Kwok」於今年春夏倫敦男裝周亮相,曾於意大利Mittelmoda時尚大賞獲全場總冠軍,是二十年來首名得此獎項的香港人。1. 設計欠靈魂「其實不用出名亦可入Harvey Nichols,但服飾設計上一定要夠個人特色。依家嘅作品無靈魂,太大眾化。要花多啲功夫改善設計能力,亦可考慮玩味較重嘅設計方式,如拼布。」2. 加強飾物設計「建議可於每個系列加入三至四款較大膽的設計,另外仲可以玩吓飾物,如扣針、領帶,亦可於飾物上玩吓印花,要注重設計上嘅細節。」3. 兩條線難應付「應付兩條Line的設計吃力之餘,開支亦會大。如果摸不清兩條line的設計定位,會有反效果。」

 
PermaLink: https://articles.zkiz.com/?id=120987

80後改裝旗袍變潮著搵真銀


2015-07-16  NM

如果說藝術家做生意一定蝕錢的話,那麼Janko(林春菊)的「新裝如初」是個異數。Janko有典型藝術家脾氣,問她經營數字也「模模糊糊」;而她這家專門改裝旗袍的鋪頭,還要開在被指「人流不似預期」的PMQ商場。這樣計數,預期一年內應可執笠。偏偏Janko卻在擴充,她想到以牛仔布設計「牛仔旗袍」,深受八、九十後歡迎。進而在今年六月,於柴灣開班教授長衫製作,讓學生做出獨一無二、自己的旗袍。這樣雙線發展,月賺近四萬元。

Janko對錢銀不算看重,她說:「出份糧夠自己使就得,加上平時都冇咩時間去旅行,所以無咩所謂。」Janko每次生意變陣,都因「迫不得已」。她於○八年在明愛白英奇專業學校畢業,後加入TVB做時裝設計,誤打誤撞做古裝,曾負責電視劇《巴不得爸爸》的戲服。雖然電視上的古裝都分不到朝代,而且設計好似件件一樣,但Janko卻很滿足:「好充實!因為人手唔夠咩都要做。設計、選料同製作等每個工序都要跟。」不過Janko不甘心在TVB無發揮,離開後她想創業,發現一般時裝市場的競爭太大,國際品牌分店度度都有,「我哋本土嘅無論價錢或質素都比不上,好難脫穎而出。」Janko曾於一一年的設計比賽中獲獎,一二年又被邀展覽時裝作品。該作品展以環保為主題,Janko靈機一觸,認為有「賣點」就有生存空間。她找了一位香港的旗袍老師傅學藝,並以傳統手藝、配以環保回收布料設計旗袍,令她終於找到自己「化舊立新」的方向。

第一階段分租減成本

有了設計方向,Janko起初用了一年時間,在不同市集中擺檔,測試市場反應。「新裝如初」鎖定設計現代感較重的時裝、並以牛仔布、麻質等為布料,Janko希望客人穿了旗袍也可有型有款地走出來、身穿企領背心配長裙,亦可優雅上班。初步反應良好,兼且旗袍需有地方試穿、度身和改尺寸,並要有鋪頭儲「翻頭客」,她因此膽粗粗和另兩位分別是眼鏡和紙品的設計師,一同申請進駐PMQ,成功成為首批租客,開設了「三匠」。「我哋本金唔多,分租可以分擔開業成本。」第一步算是「落了地」,但做一門生意遠比當一個設計師有更多要顧慮,衣服由Janko設計後須出去找師傅幫忙生產,每次也要四圍奔波,還要不停監督師傅手工,過程花耗了不少時間和精力。是故開店九個月後,Janko「再一次」膽粗粗,在觀塘找來四位車衣女工自設工場,望能訓練出自己的「左右手」。經過不斷的嘗試和配合,最後正式聘用了其中兩位。現時工場有一名師傅負責紙樣出品,另兩位女工專注車衣。在設計師眼中,此絕對是件好事,因為可以僱有自己專屬班子,一切放心又方便了;但在經營生意的角度,這意味人工要出多三份,生產成本又上升了。因此,Janko的生意行入下一階段。

第二階段教班增收入

Janko設計的旗袍或長衫,一式只有一件,一個尺碼,顧客著後唔啱身便要改尺碼,或要度身重做一件,每件售千多二千元。太寬鬆的話還可以改,但太窄太小的話就沒法子了。而且不是每名客人也願意花多一點時間和金錢做衫。故此Janko索性讓顧客自己學做一件:「而且好多人唔明一件旗袍或長衫嘅定價,點解咁高。通過上堂、親自學做,佢哋就可以理解每個細節嘅用心。」開班亦是一個低成本、高回報的捷徑。以每堂三小時的長衫體驗班為例,總共有十名學生,每位收費四百八十元,上個月這類班開了六次,扣除布料及租金成本,利潤萬多元,即利潤率達五成。這類班經宣傳推廣,自然可多啲來、密啲手。記者見上堂的學生,有青春少艾、中年太太甚至是和媽媽來一起上堂的男生都有。由於教的是「體驗班」,製作出來的尺碼很細不是給成人穿著,Janko引申再拓展「自己的衫自己做」的長衫製作班,讓生意再進入下一個階段。

第三階段穩守再突擊

顧名思義,長衫製作班讓學生製作啱自己size的長衫,製作後可著出街。Janko於本月將正式推出此製作班,每班要上足四天,每天六小時共二十四小時,價錢為三千二百元,由畫樣、剪裁、車衫等,自己一手搞掂。教班最大的支出是Janko個人時間,但對比賣衫確是較可觀和穩定。雖然試水溫的反應不錯,但香港人貪新鮮已不是新鮮事,她坦言起碼要觀察半年,才可決定長遠發展和肯定開班的價值。這生意還有另一隱憂,就是Janko為保持特色及減低入貨成本,大部分布料都是回收而來。由一一年的環保時裝比賽、接收朋友一批回收牛仔布開始,她就定立了以棄置布碎做衫的方向。「我們的回收布,不是指什麼有問題不乾淨的布,而是一些可能是貨辦,或因面積太細碎而廠家不用的布。」不同的香港服裝開發公司工廠,也一直為Janko提供回收布料。因為他們是開發公司的關係,研究完的布料通常也比較細而碎,不能拿回自己在大陸的工廠生產,所以也願意免費給予Janko。「我哋回收佢哋嘅布,其實變相幫佢哋減省咗工序,大家都有得着。」Janko從布料開發公司「執布」,成本是零,但因每塊布料的大小也不同,大的可以做旗袍,小的可能只做到袋。由於貨源不算穩定,每次也不知拿到什麼布料,Janko的「下一個階段」,可能也要從這個方向諗諗了!

開業資料(14年7月)

營業資料(15年6月)

 


PermaLink: https://articles.zkiz.com/?id=153340

「錄音著平底鞋是常識吧!」鄭秀文潮著Ferragamo

1 : GS(14)@2016-05-22 12:16:13

鄭秀文(Sammi)身為潮流指標,着衫當然緊貼潮流。最近幾季平底鞋可謂大行其道,今年春夏亦繼續hit,話明Sammi貼潮,就當然有着埋一份。
Sammi日前分別在ig及微博與大家share造型照,穿上ruffle牛仔上衣再襯貼身爛牛,時尚有型,腳踩一對Salvatore Ferragamo的平底鞋,粉紅色夠突出,而且極富夏日氣息,Sammi更大讚對鞋舒服,仲話「錄音著平底鞋是常識吧!」更多時尚新聞,即上:http://add.appledaily.com





來源: http://hk.apple.nextmedia.com/entertainment/art/20160522/19622723
PermaLink: https://articles.zkiz.com/?id=301097

梁浸浸潮着Yeezy Boost狂踩媽咪塊面

1 : GS(14)@2016-09-01 06:12:28

鄭希怡(Yumiko)前日在Ig po短片,見她高舉囡囡梁子柔(梁浸浸),梁浸浸先揈揈腳仔,再由媽咪腰間一直向上行,最後一腳踩落媽咪面上,Yumiko避無可避,食晒梁浸浸的無影腳,認真搞笑。
Yumiko留言:「可憐天下父母心」外,還鬼馬地hashtag「佛山無影腳」、「功夫bb」、「好彩係新鞋」等字眼,原來梁浸浸所穿的新鞋仔是由契媽鍾欣潼(阿嬌)送贈,是大前日才正式開賣的adidas Originals x Kanye West潮鞋Yeezy Boost350童裝版,鞋底用了品牌Boost技術,輕盈舒適,加上梁浸浸不太重,相信Yumiko不算被踩得太痛。更多時尚、美容新聞,即上:http://add.appledaily.com




來源: http://hk.apple.nextmedia.com/entertainment/art/20160831/19754817
PermaLink: https://articles.zkiz.com/?id=306925

大熱闊腳褲高鼻徐子淇潮着Red Valentino

1 : GS(14)@2016-09-28 05:04:32

「千億新抱」徐子淇近月深居簡出,她前日和甄子丹一齊出席救助兒童會活動,潮着今期大熱的闊腳褲。不過,未知是否化妝有變,徐子淇看來鼻高了好多!今個秋冬季,闊腳褲當打,Victoria Beckham在紐約時裝周著鬆身濶褲謝幕後,更推波助瀾。各大時裝店狂推wide pants,徐子淇前日也穿了Red Valentino的闊腳長褲,再搭配白恤衫,時尚斯文不失潮味。徐子淇雖然已經精明眼,揀了高腰款,拉長雙腿線條,不過,一排金鈕的設計,強調了腰臀部分,令她看來有點微胖。更多時尚、美容新聞,即上:http://add.appledaily.com




來源: http://hk.apple.nextmedia.com/entertainment/art/20160928/19783985
PermaLink: https://articles.zkiz.com/?id=310443

【全靠楊千嬅】潮着褂王人人跟風 無香港無裙褂

1 : GS(14)@2016-10-28 06:24:19

原來千嬅係裙褂業嘅救星,2009年佢身穿褂王同丁子高影結婚相,令好多人重新留意裙褂。(資料圖片)



今年娛圈喜事重重,藝人鍾嘉欣、楊怡、林心如、陳妍希等紛紛出嫁,有冇發現佢哋除咗着靚靚婚紗,都有跟返中國傳統着褂或者繡和服呢?原來喺90年代,個個對婚紗趨之若鶩,十個都無一個着褂,搞到裙褂業差啲沒落!全靠楊千嬅喺2009年結婚嗰陣,着褂王影婚紗相,先救返裙褂業!



黃師傅第一份工作就係造褂,直到o依家仲非常有熱情。(受訪者提供照片)

不經不覺,師傅造褂已有45年,喺佢眼中,裙褂絕對係藝術品。(受訪者提供照片)

「嘩!原來褂咁靚o架喎!」鴻運繡莊老闆黃國興師傅話,楊千嬅著褂王就畀外界有呢種感覺。除咗千嬅本身個人靚,褂王亦靚在手工。黃師傅話褂王係要人手每針每線咁繡,至少整一年半,因為褂上嘅金銀線冇穿過塊布,而係靠唔同顏色嘅繡花線定住,叫盤金手藝!造裙褂造咗45年,接近半世紀,原來呢份係黃師傅一生中暫時做過嘅唯一工作。喺佢眼中,無論工藝或者設計上,每件褂都係一件藝術品。佢話褂上每針、每線、每幅圖都充滿無限祝福,「好似牡丹代表牡丹富貴,龍鳳就係龍鳳呈祥,五隻蝠鼠即係五福臨門,其實每位新娘着嘅褂一啲都唔簡單!」以前,裙褂仲有傳承嘅意義,媽媽會將自己嘅裙褂好好保存,送畀個女,代表將祝福傳落去。



以前媽媽會親手為女兒繡裙褂,送上溫暖心意。(受訪者提供照片)

黃師傅緊貼潮流,千禧年代已首創水晶褂。

師傅亦係將金魚元素加入裙褂嘅第一人,每套褂有十尾金魚,喻意十全十美。

黃師傅希望呢份情唔好消失,唔好因為傳統同老套而令裙褂沒落,又參考婚紗可以不斷有新款,覺得裙褂都唔可以一成不變,所以力求創新。除咗諗到Hello Kitty褂,黃師傅早喺09年就設計水晶褂,攞埋專利,仲新增咗金魚呢個元素。佢話最初好簡單咁諗咗四個字「十全十美」,所以就繡十尾金魚喺褂,祝新人十全十美!從開頭對裙褂冇咩興趣,到後來愈做愈起勁,黃師傅對褂充滿熱情,仲申請將裙褂納入非物質文化遺產。佢話香港人喺保存裙褂方面,具有重大意義,如果冇香港,裙褂就會失傳。故事要講到60年代文化大革命嗰陣,黃師傅話:「當時裙褂因為繡咗條龍而畀內地禁制,所以其實上海、北京等地,之前係未接觸過裙褂係咩嚟!」佢話慶幸香港係一個特區,能夠一路保存裙褂文化,「我要話畀人聽,裙褂真真正正係香港嘅褂!」



裙褂上的大小圖案各有特別意思,代表着對新娘的祝福。(受訪者提供照片)

如果冇香港呢個地方,裙褂今日未必會出現喺我哋眼前。(資料圖片)

採訪:何宛珊(表妹)攝影:馮峰、Neo後期:Roy編審:Kaman、仙




來源: http://hk.apple.nextmedia.com/entertainment/art/20161028/19814218
PermaLink: https://articles.zkiz.com/?id=313842

阿菲DNA就是型竇靖童潮着Prada早春新裝

1 : GS(14)@2016-12-07 08:01:05

天后王菲有型有style,女兒竇靖童亦得真傳。童童出道做歌手形象中性,不時穿西裝或boyish形象示人。日前她在內地出席《音樂盛典咪咕匯》時,就選穿了Prada的2017早春度假系列,繼續走中性風格,黑色外套配黑色長褲好cool,褲邊與袖邊一道粉紅色又有highlight效果,鮮明的撞色亦很young,童童配了對長靴都carry得剛剛好。




來源: http://hk.apple.nextmedia.com/entertainment/art/20161207/19857347
PermaLink: https://articles.zkiz.com/?id=318632

胡杏兒潮着韓牌新裝 紅撞金sharp爆應節

1 : GS(14)@2017-02-05 10:48:31

胡杏兒與鍾嘉欣日前一同現身銅鑼灣出席活動,二人都相當應節,穿上一身紅噹噹造型,非常搶眼。杏兒率先換季,揀穿了韓國潮牌PUSHBUTTON的2017春夏系列,超sharp的紅色上衣,搭配金色閃粉闊褲,又紅又金的配色可謂一絕,猶如利是封一般,非常富農曆新年氣息,加上亮麗妝容,顯得非常明艷照人。更多時尚、美容新聞,即上:http://add.appledaily.com




來源: http://hk.apple.nextmedia.com/entertainment/art/20170204/19917744
PermaLink: https://articles.zkiz.com/?id=325438

坐月Baby素顏照曝光潮着大熱logo tee

1 : GS(14)@2017-02-08 22:31:38

Angelababy上月17日在港順產誕下「小海綿」,小休兩日就快快穿短裙出院,還打破閉關坐月的禁忌,生完8日就被發現戴口罩低調現身旺角,偕奶奶買年花,月底才踏入28歲的Baby復原速度認真是超快,不禁令人慨嘆年少多好。日前,網上流出Baby與老公黃曉明開心過節的家庭大合照,素顏Baby穿上喜慶紅褸,氣息顯得不錯。坐月Baby不失潮流觸覺,紅褸內襯上今年大熱的logo tee,Baby所揀的白tee出自Dolce& Gabbana,屬2017春夏系列,印上消失多時的副線D&G字樣,繡有bling bling花卉,正中還印「我在那裡」的意大利文。更多時尚、美容新聞,即上:http://add.appledaily.com




來源: http://hk.apple.nextmedia.com/entertainment/art/20170208/19921683
PermaLink: https://articles.zkiz.com/?id=326009

潮著名模至愛波鞋將歐美街頭時尚風帶到香港

1 : GS(14)@2017-03-24 17:08:06

【特約報道】擁有一雙標誌性酒窩的澳洲超模Miranda Kerr是很多女性的理想指標,向來敢愛敢言的她,去年與比自己小7歲的Snapchat創辦人Evan Spiegel訂婚,更曾於訪問中向Facebook開火,批評對方抄襲其未婚夫的創意。
Miranda Kerr除了直率的言論引起很多人關注,她平日優閒而又極具時尚的衣著配搭也是很多女生的模仿對像。Miranda Kerr一向是美國紐約品牌Kenneth Cole Kam sneaker系列的支持者,而該系列亦已推出第三季,繼續引領女裝波鞋的潮流!為了打造出型格同時能夠散發女人味的女士專屬波鞋,有別於一般運動鞋過於「運動」的款式,除適合週末的簡約造型外,要襯出型格搭配也是Kam sneaker的獨到之處。只要到銅鑼灣SOGO6樓Kenneth Cole專門店便可輕易找到最潮款式,女士們,今個春夏即管將街頭成為自己的時尚舞台吧!



名模Olivia Palermo也是Kam sneaker的支持者。

Kam sneaker以修腳纖巧的鞋型,鞋踭後罕有綴以金色條子。

加入色彩繽紛的大自然動植物元素,以細緻的刺繡,一針一線勾劃出自然界花卉、雀鳥及昆蟲的完美構圖。


延續時裝界的刺繡潮流,除了Kam sneaker系列推出Embroidery款式外,Kenneth Cole今個春夏季其他款式例如平底sandal及高踭wedges也繡上花卉刺繡,為整個Embroidery系列錦上添花。了解更多︰http://www.kennethcole.hk




來源: http://hk.apple.nextmedia.com/entertainment/art/20170324/19968245
PermaLink: https://articles.zkiz.com/?id=328663

Next Page

ZKIZ Archives @ 2019