ZKIZ Archives


BoBo跳過男友 湊老細莊友堅

2015-01-08 NM
 
 

 

○七年被前度陳冠希的「艷照事件」搞到一身蟻的陳文媛(BoBo),出事時一直有任職威利國際董事總經理男友金紫耀力撐,○九年,更獲打本百萬開美甲店做老闆娘。早前男友離職,美甲店亦已結業,但過慣闊太生活的BoBo不單未受影響,反而再升呢,跳過男友變身有「細股玩家」之稱的莊友堅得力愛將,繼續湊老細。未婚夫吵大鑊走

遭前度拖累,陳文媛被迫完全退出娛樂圈,其間仍得男友金紫耀照顧,○九年,BoBo開美甲店榮升老闆娘,不過生意麻麻,蝕足四年,結業收場。「嗰陣傳係金紫耀俾錢BoBo搞生意,其實係Eugene(莊友堅)至真!就算嗰次出事(淫照),Eugene都有安排私人飛機喺美國接佢返香港,BoBo男友金紫耀始終係打工仔,幫公司搵到錢就話啫,但聽講前排有單交易蝕大錢,佢同公司吵大鑊走咗,不過Eugene同BoBo關係仲好好。」知情者說。

明星打工仔

莊友堅旗下有多間上巿公司,歷年亦有過不少過氣女藝人及落選港姐,成為旗下員工。據了解,莊友堅對班明星員工相當重用,其中跟他傳過緋聞的前開心少女組成員羅明珠(現改名羅愛過),曾獲安排在上巿公司福方任職,因表現良好,再被欽點入局成為多間公司董事。至於前下屬女友的BoBo,莊友堅亦非常提攜。「美甲店執咗之後,佢叫BoBo入公司,雖然BoBo唔係做開呢瓣,不過之前一直有學股票投資,加上Eugene好體貼,搵咗幾個有年資嘅staff傍住BoBo,等佢可以邊做邊學,聽講而家佢負責睇其中一間公司盤數。」知情者說。日前,記者發現BoBo一身名牌行政人員打扮,坐住七人車,由司機接送返工放工,BoBo一個人,有別於過往做美甲店老闆娘時,有男友金紫耀陪出陪入。

細股玩家

有細價股股神之稱的莊友堅,在股壇無人不識,曾參與金融圈多宗轟動一時的交易,例如電盈(008)種票案、豐德麗(571)配股案等。先後同陳奕詩、羅明珠等女藝人傳過緋聞的莊友堅,跟城中富豪一樣,擁有私人飛機、多間過億物業,而他位於上水御林皇府的一萬七千呎連花園豪宅(13年以一億三千萬賣出,勁賺七千二百萬),當年用四千萬裝修,屋內有明朝椅子、佛頭像、十八羅漢、水晶等古董及風水擺設,更有數百萬音響及名酒,生活奢華。

PermaLink: https://articles.zkiz.com/?id=126662

Next Page

ZKIZ Archives @ 2019