|
唔少企業都發行人民幣債券，噚日華華收到位金融界朋友嘅電郵，係有關一家叫「Hai Chao Trading Co. Limited」嘅香港公司，發行人債詳情。有公司發人債關華華乜事？玄機在於隻bond個名。
發債公司Hai Chao Trading，中文名海潮貿易有限公司，齋睇冇乜特別，但可能係個市太靜，所以被人惡搞，「Hai Chao Bond」中嘅公司名被人倒轉咗，變成名副其實嘅粗口Bond。
老細係中策前主席
惡搞只係得啖笑，但據公司註冊處資料，呢間海潮貿易有限公司嘅創辦成員叫「杭州中策橡膠有限公司」，華華見到公司名裏面有「中策」兩個字，自然聯想到同新加坡商人、中策前主席黃鴻年有關，果然，喺浙江省企業大全黃頁度查到，呢間杭州中策橡膠嘅法人代表就係黃鴻年。
講開黃鴻年，佢十幾年前喺陽明山莊畀3個匪徒扑濕，之後就返咗去佢認為比較安全嘅新加坡。要數黃鴻年嘅威水史，就要提一提小小超李澤楷，皆因當年黃鴻年將得信佳賣殼畀李澤楷嘅盈科，股價一夜之間狂升，因而贏得股壇金手指稱譽。至於呢間杭州中策橡膠嘅來頭都唔細，係中國最大輪胎生產企業，喺世界輪胎企業排第11位。
李華華
[email protected]
|