新年流流，拗乜叉呢？ 人在中環
1 :
GS(14)@2014-02-05 00:23:27http://manincentral.blogspot.hk/2014/02/blog-post.html
寫咗咁多年爛文，好明白，有乜嘢topic特別容易挑起情緒，引發罵戰。要我揀頭三位，我會揀政治、宗教、男女關係，排名仲係分先後的。
農曆新年總會讓你有機會同一班好日都唔見下既親戚長輩朋友見下面。之所以係「好日唔見」，好明顯，其實彼此感情肯肯定係麻麻地。面對啲感情一般既人，避免嗌啲無謂既交，剛才所提嘅三個topic，我慳得過都唔會搭嗲。
但係拜年唔係你一個人既事，呢亭惹火話題，總又會有一件半件蛋散拎出嚟發表偉論。而同一時間，又硬係有另一件唔識趣既蛋散駁咀反擊。於是所謂「喜氣洋洋」既gathering，就變成充滿火藥味，但又得唔出結果既辯論。
佔中定係唔應該佔中？普選解唔解決到問題？香港人對自由行係咪應該「包容」？長毛抗議完之後係咪收工？呢堆topic，響一班經歷過「獅子山下奮鬥歲月」既阿叔口中，拗到火紅火綠。我抱住尚未懂事既一對仔女，坐埋一邊，無奈地「觀賞」那一場元老級的舌戰。
我記得，細個既時候，那班長輩會恥笑我地呢啲後生仔，唔關心社會，個人又冇內涵，有時間都淨係掛住溝女打機，.連新聞同報紙都唔肯睇下，搞到自己連個世界發生緊乜嘢事都唔知。家陣我地長大成人了，望見一班「元老」響度疑似好有見地咁「論政」，我心裡面有一種好難形容既感覺…或者應該咁講，我今日終於明白，當日佢地睇住我地呢班「後生仔」既感覺，到底係點樣的了。
那班長輩，我估睇報紙睇新聞呢亭活動，他們每天還是樂此不疲地去做。但佢地所吸收既資訊，總係讓我覺得片面而且偏激。佢地對現今既政治環境，有好多不同既「引述」，但我一聽在耳裡，就知道邏輯錯得出奇。不同既人講出不同既論點，單憑佢地既論述，大概都好肯定分得出，佢地平時到底邊個係睇開邊份報紙。老一輩既人，同我們這些比較年輕的人，其中一個分別係，佢地依然非常相信傳媒。當佢地慣常所接觸到既傳媒，給予佢地一個訊息之後，佢地就不由自主地相信為真實。我在想，「獨立思考」呢個詞語，畢竟係近年先流行起來，在佢地既年代，傳媒所說的話，就是事實。
那場「辯論」，最後有個年輕一輩既醒目表弟走出來打了個完場，好彩沒有釀成罵戰。否則新年流流，真係大吉利事。我望住呢一班，曾經經歷事業成功既長輩，心諗，今日既香港地，其實同類形既人，到底有幾多呢？不論係親建制抑或反政府，佢地既立場都是鮮明得讓人驚訝，但背後支持住佢地信念的理據，卻又薄弱得讓我覺得難以置信。
也許佢地係幸福的，因為他們還是會相信那些表面的東西，門面的說話。
我們這些比較年輕的，老早就不相信了。
祝大家開工大吉。