拍拖睇減價傢俬羅天宇湯洛雯好事近
1 :
GS(14)@2017-01-07 07:08:08【飯後節目】■羅天宇和湯鎮業姪女湯洛雯大前日食飯後，被拍到行孖咇睇傢俬。讀者提供圖片
【爆相爆片】現年29歲的08年港男少年組冠軍羅天宇，跟同齡的12年落選港姐、湯鎮業姪女湯洛雯，因為於13年合作無綫處境劇《愛．回家》而被指戲假情真，同一年他們被本報發現孖咇在元朗食酸辣粉斷正，令「洛宇戀」曝光，不過兩人例牌否認戀情。大前日，讀者陳先生透過本報「爆相爆片」分享了羅天宇和湯洛雯在九龍灣MegaBox拍拖睇傢俬的相片，其間二人有商有量，看來對家的要求都有共識，似乎好事近。
打包食物
讀者陳先生大前日撞正「洛宇戀」拍拖睇傢俬，他說：「宜家有減價，佢哋喺度睇儲物櫃，一齊指手劃腳。」陳先生表示羅天宇發現他拿着手機時，警覺性甚高，即時跟湯洛雯分開。當時羅天宇拿着裝着外賣的膠袋，估計是剛與湯洛雯撐完枱腳，惜食把食物打包。問到湯洛雯拍拖睇傢俬是否好事近？她大前晚回覆傳媒時說：「當然唔係啦，哈哈！嗰陣係同啲朋友食完飯，見宜家減價，所以行咗一陣。」和羅天宇是否拍拖？湯洛雯續說：「之前都回應過，我哋係好好嘅朋友，不過多謝關心！」羅天宇也口供一致，他說：「唔係呀，我哋同朋友食完飯，落去行吓咋。」
【警覺性高】■睇傢俬的羅天宇見有人拿手機，即遠離湯洛雯。
■羅天宇和湯洛雯因合演《愛．回家》被傳撻着，更曾被影到拍拖吃酸辣粉。資料圖片
■羅天宇入行以來多女埋身，曾與Coffee有過一段情。資料圖片
緋聞多多
羅天宇入行八年緋聞多多，除了跟《愛．回家》劇中扮演妹妹的蔣家旻和高海寧傳過緋聞外，他的舊愛有苟芸慧，但最激莫過於曾流出跟34D的林芊妤（Coffee）啜爆床照。採訪：唐琛悠
來源:
http://hk.apple.nextmedia.com/entertainment/art/20170107/19888756
湯洛雯羅天宇拍拖 呻山頂冇嘢行
1 :
GS(14)@2017-02-07 05:15:53【扮晒疏遠】■湯洛雯同羅天宇拍拖四年來都唔認。
【爆相爆片】羅天宇同落選港姐、湯鎮業姪女湯洛雯，13年拍劇集《愛．回家》時被指戲假情真，跟住本報披露佢哋行孖咇喺元朗食酸辣粉斷正，「洛宇戀」從此曝光，不過佢哋否認戀情。四年來，佢哋始終如一，依然係孖公仔行街。上月初，兩口子被踢爆拍拖行九龍灣MegaBox睇傢俬，唔夠一個月，日前又有讀者陳小姐透過本報「爆相爆片」，影到佢哋去山頂行街。
男友找數
湯洛雯剪短咗頭髮，仲着住一個月前被影到嘅一模一樣黑白針織冷衫同貼身褲，只係今次冇戴cap帽，換咗副太陽眼鏡掛喺頭上，讀者陳小姐話：「嗰晚差唔多9點幾，商場有唔少舖頭都閂咗門，我見到羅天宇同湯洛雯一齊行街，聽到湯洛雯話舖頭都閂晒冇乜嘢行。」最後佢哋去咗莎莎睇嘢，湯洛雯揀化妝品，由羅天宇負責畀錢。
【睇化妝品】■夜晚山頂舖頭好多都閂晒門，湯洛雯惟有揀去睇化妝品。
■羅天宇同湯洛雯上月先被影到齊齊睇傢俬，湯洛雯都着住同一件衫。資料圖片
讀者陳小姐話當時湯洛雯全程戴住口罩，同羅天宇冇乜親暱動作：「佢哋再去百佳買咗兩袋零食，之後就行咗入一間電子產品舖頭，當時我都喺舖頭裏面，湯洛雯用雙手輕輕打咗羅天宇心口幾下，又見到佢哋有搭住膊頭行，但好快就縮手。」最後羅天宇同湯洛雯去服務台搞免費泊車，再揸車走人。湯洛雯前日接受傳媒訪問，問到佢再次俾人撞正拍拖，佢竟然話：「之前都回應過了，我哋係好好嘅朋友，不過多謝關心。」
來源:
http://hk.apple.nextmedia.com/entertainment/art/20170207/19919876
羅天宇專揀身材好女星 湯洛雯Coffee苟芸慧榜上有名
1 :
GS(14)@2017-02-07 05:15:53羅天宇係08年港男少年組冠軍出身，正所謂「你的樣子如何，你的日子也如何」，梗係多女埋佢身啦！出道8年，同唔少女星都同佢傳過緋聞，有林芊妤（Coffee）、苟芸慧、高海寧等等，全部身材有番咁上下，而現任女友就係「靚湯」湯洛雯，真係令好多男士葡萄。有報道指羅天宇入行冇耐就同Coffee因為拍《四葉草》撻着，仲有咀嘴照流出o添！又有報道指苟芸慧就最得羅媽媽歡心，羅媽媽仲當苟姑娘係契女咁看待。睇番湯洛雯，雖然喺12年港姐選舉五強止步，不過大台好肯畀機會佢，《學是學非》、《愛．回家》等等嘅節目都見到佢，曝光率都算多。
來源:
http://hk.apple.nextmedia.com/entertainment/art/20170207/19920436
撐枱腳醫肚開始 羅天宇湯洛雯緋聞傳足4年
1 :
GS(14)@2017-02-07 05:15:57羅天宇同湯洛雯呢一對……暫且叫同事先，因為合演無綫處境劇《愛‧回家》而傳緋聞，劇中湯洛雯要暗戀羅天宇，估唔到戲假情真，兩人真係撻着。羅天宇同湯洛雯喺2013年10月被《蘋果》拍到一齊喺元朗拍拖食酸辣粉斷正，「洛宇戀」正式曝光，當日羅天宇揸住佢架Audi戰車，載湯洛雯去醫肚，着住黑色情侶裝嘅「洛宇」喺小枱對坐，之後羅天宇車湯洛雯返九龍塘寓所，再傾咗一輪先揸車返自己位於將軍澳嘅屋企。當時，湯洛雯聲稱兩人只係收工一齊食飯，係普通朋友，但就勁讚羅天宇「人好好、好nice，樣樣嘢都好。」被爆戀情斷到正，但當事人唔認，點知湯洛雯位同屆好姊妹朱千雪就不慎爆料「佢話自己係同子仁（羅天宇飾）嘅。」事隔幾年，「洛宇戀」消息冇停過，連去飲都一齊去，但就搵人坐喺中間隔住吓，惟佢哋不時被目擊行孖咇出現，好似上個月初，佢哋被《蘋果》讀者陳先生透過「爆相爆片」喺九龍灣MegaBox拍拖睇傢俬，其間兩人有商有量，但羅天宇見到附近有人拎起手機即警覺地同湯洛雯分開走。「洛宇戀」傳足4年，又有相為證，都仲係「朋友」，呢啲……叫友誼永固？
來源:
http://hk.apple.nextmedia.com/entertainment/art/20170207/19920437
湯洛雯唔畀羅天宇捽腳
1 :
GS(14)@2017-04-17 07:20:12湯洛雯昨日在西環出席「悠遊復活節」，她透露早前拍攝無綫劇集《抱佣情人》一場煞科戲，由於要玩水上活動，拍完後她立即跑去船尾沖身，但一不留神跣腳，整個人跌落海，右腳有多處瘀痕，她表示每晚好勤力捽藥油。問到緋聞男友羅天宇有否為她捽藥油？她說：「呢啲自己捽，我唔會叫人哋幫我捽腳。」及後她講復活節扯開話題。將於下月拍新劇的湯洛雯說：「今次係最重戲份嘅一次。」會否擔心被網民指她未夠班？她說：「唔諗咁多，經理人叫我做好自己先，其實最難受嗰次係參選香港小姐，好多負面新聞，當時已經打晒底。」採訪、攝影：黃曉妍
來源:
http://hk.apple.nextmedia.com/entertainment/art/20170417/19991984
Next Page