ZKIZ Archives


愛爾蘭殺馬 左丁山

2010-12-28  AD




 

將近一月,馬圈 中人又要計劃到澳洲紐西蘭買馬,一月底至二月初,紐西蘭有大型拍賣會,一月十二至十九日,澳洲昆士蘭省黃金海岸有神奇百萬拍賣會,兩者都係每年澳紐趁住夏 天好天氣而舉行嘅重要拍賣會,不過天氣今年有變,上星期墨爾本竟然有雪,奇哉怪也。

十二月十三日,香港國泰航空國際大賽之後,昆士蘭省駐港 經貿署主管Simon Lee就邀請咗神奇拍賣會董事總經理David Chester與馬主協會會員、練馬師、騎師等等人在蘭桂坊LKF酒店出席酒會,推廣昆士蘭投資環境以及神奇百萬拍賣會。西蒙.李以前係美國銀行亞洲 (BA Asia)嘅經理級人馬,依家就負責宣揚昆士蘭,對左丁山講:「昆士蘭啲蜜糖好有益,芒果特別靚,荔枝都十分美味,當然我地啲純種馬戰績彪炳,買馬不能不 到黃金海岸。」昆士蘭重視馬匹出口,對外來馬主好好招呼,去過就知。

愛馬之人,對馬匹好敏感,呢日馬主C打電話嚟問:「你去唔去紐西蘭買 馬?」左丁山已有一馬,唔去咯,但同日睇IHT講經濟陷入困境嘅愛爾蘭,講到大量馬匹無人照顧,任由餓死、凍死,不禁心酸。愛爾蘭盛產名駒,前輩張福元經 常認為英國愛爾蘭馬好過澳紐馬,而事實上,長途靚馬多數出自愛爾蘭種,例如「爆冷」、「技藝精湛」、「紅杉木」、「締造美麗」等等。

IHT 報導,愛爾蘭首都都柏林市之外幾公里嘅一個填土區,在極寒冷的冬日,有成千上萬隻馬在草地上遊蕩,無人理會,在郊野等死,最瘦弱、捱唔住嘅馬,就受人道毀 滅,用0.32口徑手槍,向頭部開一槍,應聲倒地。兩年前,金融海嘯前後,愛爾蘭地產泡沫爆破,愛爾蘭嘅銀行從此陷入破產邊緣,不斷由政府打救,直到政府 需要歐盟及IMF打救,人民失業率高企,愛爾蘭人自顧不暇嘅時候,誰會照顧馬匹?最好血統嘅純種馬尚有市場價值,次一皮嘅就由得佢地自生自滅,聞者心酸。 同是馬匹,生在昆士蘭與生在愛爾蘭,命運有天淵之別。


PermaLink: https://articles.zkiz.com/?id=20635

Next Page

ZKIZ Archives @ 2019