ZKIZ Archives


銀行按息加又死唔加仲死


2013-07-18  NM
 
 

 

近日金管局「勸退」銀行減息戰,銀行中人無不感嘆 ;事實上,現時銀行按息已陷入困獸鬥。一直被中銀香港頂住按揭一哥個位嘅滙豐,其實三月份曾試過搶先加息,將P按息率由2.15%加至2.4%,希望補番上升咗嘅資金成本。其他銀行,有啲跟、有啲唔跟;結果生意咪過晒俾無跟加嘅銀行,滙豐最終要還原按息。

靜咗一輪,輪到中銀按捺不住,近日將H按減到近乎1.91%搶生意,之後永亨仲狼死,比中銀再低0.05%!銀行中人話,按揭息率低過兩釐,根本係做一單、蝕一單,金管局驚引發減息戰,表示「關注」,減息戰又告吹,按息再還原。

其實自政府一○年推出樓市辣招後,銀行已少咗一半生意。據金管局數字,今年五月的新批出貸款,僅約一百五十五億元,較兩年半前出招時少四成七;宗數更大鑊,少了五成半,得番近五千八百宗;平均每宗貸款,只是二百六十多萬元而已,少咗豪宅客。靠樓按開飯嘅銀行職員,如今只有食萬幾蚊嘅「老底」維生。 近日多個新盤出籠,樓市叫有番啲起色,不過又因壓力測試嚴謹咗,唔少人借唔到錢。呢個由政府搞成嘅困局,有勞政府自己搞番掂!

Give me a break書展睇趨勢

近排個市反反覆覆,散戶都無從入手。與其盲舂舂入市投資,啲錢不如放喺自己身上,趁住本週三書展開幕,買本書增值自己。一如既往,今年有大量財經書出爐,食正經濟大勢,有關內地經濟問題嘅新書,實為今年至hit:

必睇:「民企之父」張化橋的新書《Inside China's Shadow Banking: The Next Subprime Crisis?》,紅到連《The Economist》都有報導,可想而知全球幾關心(定係擔心?)內地影子銀行的問題。張化橋仲同小宗講,要解決影子銀行問題,唯有中央加息,「中國人要感謝影子銀行,因為影子銀行向大家透露了通脹是多少,市場利率又究竟應該是多少。如中央銀行盡量把官方利率調整到市場利率的附近,影子銀行就沒有太大生存空間。」

內地「錢荒」,亦是今年另一個大勢;有民間經濟學家之稱的楊衞隆
,就寫了本《強國錢債風暴》,探討內地債務問題,更明言內房泡沫爆破的威力,嚴重過美國次按風暴!而石鏡泉亦推出《錢荒‧習李新政的投資策略》,解讀現時中國經濟的危與機、分析習李時代下的啟示。

得閒先睇:除了長出長有、永無過時嘅實戰工具書外,曾被本刊踢爆、專收錢教人炒樓嘅FCI投資策略研究公司,亦出咗本《上車買樓財技實戰天書》,教人上車都要識用財技。而有「商場醫生」之稱、經常搞講座教大家北上投資的沈永年,亦出咗本新書,叫《50萬北上做業主》,教路揀珠海、中山、江門等鐵路沿線的物業。買唔買?睇沈永年嘅往績……就真係「有辦你睇」啦!

本週「重口味」

夏日炎炎,最好嘅消暑活動,莫過於碧波暢泳。小宗就摷到一批舊相,睇番一啲名人舊時嘅泳裝照;嗰種豪邁自然,同平日出席記者會時嘅官仔骨骨,係兩種截然不同嘅味道。

中環新貴貴過福臨門

喺中環都爹利街,最近新開咗間「都爹利會館」,共有兩層,掛滿藝術畫作,仲有幾個老外侍應招呼,非常西化,不過食嘅係中式點心、小菜。呢間餐廳,最近紅爆中環,難book位不在話下,價錢,竟然仲貴過福臨門,一碟炒河要二百四,腸粉亦收八十,不過「工廈大王」楊國佳同已故麗新集團主席林伯個女林明珠,都有來試菜。

會館老闆,係金山工業太子爺羅揚傑、佢太太黃佩茵,加埋「鋼鐵大王」龐鼎元個孫龐建貽。佢哋開呢度,用意係將藝術融入餐廳,即係點?即係明明reception旁有張長櫈,小宗坐喺度等朋友,經理就急急走出來話:「唔好意思,呢張係藝術品,唔坐得o架!」唔坐得,點將藝術融入生活呢又 ?

金牙大狀講嘢人治末路

官府一再出辣招扼殺樓市交投,搞到班地產經紀上街抗議。進而降低按揭上限,以至連銀行都冇啖好食。班賓架無計可施,出到最古老嘅辦法 —— 減息搶客。你估金管局對此又有何取態?仲使問阿桂乎,梗係明裡暗裡向銀行施壓啦。

此又不禁令人要問:香港地,幫人買樓、借錢幫佢哋上車,又唔係去偷去搶,係完全合法嘅行為,點解搞到仲衰過販毒呢?如果啲樓真係咁得人驚,係都唔俾人掂,列之為違禁品吖,笨!否則好似依家咁,做正行生意都好似做賊咁,仲成乜世界呢?

法治係香港嘅核心價值,亦係我哋成功嘅要素。法治可貴之處,係等人可以萌生創意,只要冇明文禁制,乜都做得。而家明明係合法嘅嘢都唔做得,呢個仲係法治乎?人治嘅結果係乜,成個文革有辦俾大家睇矣。班大老爺唔係要香港走上呢條末路吖嗎!


PermaLink: https://articles.zkiz.com/?id=67401

鋪王醫生告父誹謗父:無咗個仔死唔眼閉

2014-01-16  NM
 
 

 

藍田鋪王西醫林傳龍與父親的恩恩怨怨,再次在法庭上演。

幾年前,林傳龍報警指父親到診所亮刀追數,差點送父親入獄。其後父親上訴得直,派傳單控訴兒子「呃錢呃鋪」,結果兒子又把父親告上法庭。

兩父子決裂,皆因錢作怪。父母含辛茹苦供書教學,林傳龍不負所望成為醫生,更因投資有道坐擁藍田廿多個物業。然而,幾百萬的錢銀瓜葛,最終引發兩代反目成仇。

患上抑鬱症的老父,帶淚求饒,卻換來林傳龍厲聲斥責。兩父子的恩怨情仇,沒完沒了。

一一年六月十八日下午,在熙來攘往的港鐵藍田站,七十歲的林成賢手持一疊傳單,一邊派發一邊唸道:「攞張睇吓啦,仔屈老豆啊!」單張上有林成賢上訴得直的報導,再大字標題寫上「藍田林傳龍屈老父坐監」、「呃錢呃鋪」。傳單貼滿藍田的行人路,以及林傳龍子女就讀的旺角、九龍塘名校附近。

對藍田街坊而言,單張的主角並不陌生。藍田鋪王西醫林傳龍與其父親林成賢可謂藍田的「名人」,是因為兩父子不和,鬧到上報章頭版。○九年林傳龍報警指父親在診所亮刀追數,林父事後因刑事恐嚇罪成,判入獄五個月緩刑一年,一一年上訴得直。

正當大家以為兩父子冰釋前嫌,老父卻一直耿耿於懷,事後派傳單控訴兒子不孝,結果遭林傳龍民事控告誹謗,索償八十萬元。

認錯求饒

案件本月七日在高等法院開審,父子在法庭各據一方,互不瞅睬。林伯由太太、四名子女陪同到庭,次子更特意從新加坡回港支持父親,人多勢眾。反觀五十歲的林傳龍只有保鏢相伴,其代表律師問他「人齊未」時,林傳龍不禁自嘲︰「我得一個人,無咁疊馬。」然而林父目光總離不開林傳龍,不斷偷望,對方卻視若無睹。休庭期間林父主動走去與林傳龍攀談,但林傳龍見鬼似的反應甚大,大喊︰「我跪過喺度求你o架啦!」林伯立即淚如雨下。林伯上庭作供,口齒不清,連自己歲數都搞不清楚,但當被律師問及是否仍然疼惜兒子林傳龍時,林伯卻少有地清晰回答:「係,我到而家都仲係好錫佢,我一諗起就好痛苦。法官大人,我唔知去佢診所搵佢就叫做滋擾佢,係佢告我,我先知咁叫滋擾,早知道我就唔會去搵佢啦!」暫委法官陸啟康於是充當「和事老」,「如果只係錢作怪,我會感到十分失望」,希望兩父子可以和解。林伯於是低聲下氣向兒子認錯:「我呢兩年好攰喇,已經睇緊精神科,唔想再諗喇,係我錯喇。」林伯透過律師提出多項和解協議,包括向子道歉、賠償八萬多元,以及支付今次十萬元訟費等,但林傳龍不為所動。案件將於下週二作結案陳詞。

抑鬱焦慮

「其實佢(老公)唔係有心貼街招o架,佢係情緒病發,我唔俾,佢又要喊住跳樓,又話個心好難受,咁我惟有跟佢落去囉,佢一路貼,我一路撕……」林成賢太太慨嘆,丈夫自從○九年被長子林傳龍告上法庭後,食不下嚥又失眠,兩年前患上抑鬱症和焦慮症,要定時到容鳳書精神科中心覆診。「我見到警察好驚啊,驚佢又嚟拉我啊!佢(林傳龍)仲搵個保鏢嚟影我貼街招,我依家仲俾佢搞到成日都好驚,好緊張,好抑鬱。」林成賢說,當日兒子報警指他亮刀指嚇,他被警察用手銬鎖鏈拘捕後留有陰影,現時在街上見到警察「個心噗噗跳」。

溺愛長子

林伯林老太年事已高,家中沒有傭人打點,但仍然把住所打理得井井有條。他們知慳識儉,平時都是清茶淡飯,說罷從雪櫃拿出昨日食剩的烏頭魚,「好又一餐,唔好又一餐,食幾多著幾多整定。」兩老省吃儉用,把積蓄、心機都花在長子林傳龍身上。林成賢與妻子六十年代從潮州來港,林母當年揹着林傳龍偷渡來港的情景,至今仍歷歷在目,「嗰時帶住佢偷渡咗五次,有次仲俾公安拉咗,扣留咗成晚,嚇到我啊!嗰時真係好辛苦,但我攬住個仔,我知我哋點都捱過咗。」當年的揹帶,林母珍而重之,保存至今。他們來港初期住在徙置區,後來獲安排上樓到藍田德田邨。父親賣豬肉,母親穿膠花,生活雖然艱苦,但兩老一手一腳湊大六子一女。七名子女中,兩人不諱言最疼錫長子林傳龍:「佢點都係大仔,又係醫生,佢係最叻嘅,點都係縱佢o架喇。」母親亦指林傳龍被寵壞了,在弟妹面前十足訓導主任,「佢係好霸道o架,啲細佬妹唔啱,要一個一個排喺度俾佢打手板。」她小心翼翼地從抽屜取出她的「心肝椗」,就是多年來一家人的合照,長子林傳龍的照片更是用相架鑲好,「其他(子女)我都無用相架鑲得咁靚,唯獨係佢先有!」

出資置業

林傳龍結果不負所望,九○年於香港大學醫科畢業。林家出了個醫生,林父自然喜上眉梢,給兩萬元林傳龍到美國畢業旅行以作獎勵。初期林傳龍在別人的診所駐診,奔走多間診所,「試過喺的士食飯盒」。九五年底林成賢打本給林傳龍自立門戶,在藍田匯景商場開診所,一直營運至今,每天工作至少十二小時,年中無休,街坊都大讚他勤力細心。就算審訊期間的午休時間,他亦把握時間,由金鐘飛車返藍田診所應診一小時,相當賣力。林傳龍投資有道,在匯景商場買下廿多個物業,成為鋪王醫生。直至現時,林傳龍在匯景花園商場擁有二十五個鋪位、七個住宅單位、四個商業單位和一間西貢獨立屋等,市值二億六千多萬。

為錢反目

林傳龍身家豐厚,卻在物業買賣上與父親出現分歧,終令父子決裂。九八年林傳龍的長子出生,父親出資一百五十萬元作首期及裝修費,買入西貢銀線灣獨立屋,但林傳龍未有還款。而林伯出資以妻子名義購買的藍田匯景商場三個鋪位,林傳龍被指於○六年說服母親轉至其名下,並強行付母親五萬一千元作訂金,又答應會償還日後三個鋪位升值,約二百多萬的差價。同一時間,五弟失業,林伯建議向林傳龍租鋪做飲食生意,正當一切如火如荼之際,林傳龍卻反口,以低價把鋪位租予外人。此舉令林伯深深不忿,想不通兒子為何不念親情,故決心向兒子追討多年舊賬。但林傳龍說,部分欠款早已還清,部分指控不實,總之雙方已經不拖不欠。自此兒子不斷狀告父母,先是林傳龍報警指父親恐嚇,後來又民事入稟要求母親交出所住物業,之後又申請禁制令禁止父親騷擾,現在又因誹謗一事而對簿公堂。「我都願意低頭認錯,佢唔認我都無所謂喇,我都就死。我辛辛苦苦,望子成龍,最後我只想講,一家人有咩唔啱講到啱,點解要為咗個錢字搞成咁,我無咗個仔,我死唔眼閉啊!」自言「嗰頭近」的林伯,日思夜想兒子和孫兒,盼望一家人和好如初。

PermaLink: https://articles.zkiz.com/?id=89353

六合彩之子:感覺死唔眼閉

1 : GS(14)@2016-03-05 01:15:31

見到蔡國威就想起六合彩及亞視,20年亞視生涯真的有陣亞視味,威仔說心情很複雜,「好似一部電影一樣,由我入行第一日啲影像全部一次過番晒出嚟,我入亞視嗰陣係林伯(林百欣)年代,係最輝煌嘅時候,感受到好多製作,就算錢同資源唔多,但係大家都只係有個目的,夾手夾腳做好啲節目,希望可以同無綫爭一爭,成個氣氛都好好」。威仔續道:「不過自從林伯賣盤,每次轉一個老闆,都會諗呢個老闆係咪比之前更加好?雖然每個朝代都有啲代表作,但係好似脫離唔到個魔咒,所有嘢都冇承繼,跟住就一路向下。」



「靠人情味撐落去」


外間有不少人都不明白,何解一間無糧公司,仍然有員工不計較上班,威仔說:「大家仍然基於亞視嘅人情味,好熱愛呢間公司,一路撐落去,喺一個冇得續牌嘅情下況,大家以為司榮彬係另一個白武士,一個新希望,點知拖吓拖吓又唔開(節目),仲去到拖糧、欠薪呢一步,成個感覺真係好欷歔同感慨,點解要用一個咁嘅方式去結束,嗰種痛真係好難形容,有一種死唔眼閉嘅感覺,完成唔到歷史使命。或者對所有員工係一個解脫,大家要努力向前走,可能係一件好事。」■記者何慧斯





來源: http://hk.apple.nextmedia.com/news/art/20160304/19516010
PermaLink: https://articles.zkiz.com/?id=296754

晒千萬支票現金  死唔肯玩完法庭同意重組 亞視再聘160人

1 : GS(14)@2016-03-06 02:15:41

■亞視股東代表昨午舉行記招,展示500萬現金及500萬元支票,證公司財力。許頌明攝


【亞視永恒】【本報訊】亞視提早「熄機」事件峰迴路轉,昨日一度盛傳亞視下午6時停播,但至傍晚6時,《六點鐘新聞》如常播放。亞視股東代表更於昨早召開記者會,公佈未來3年百億大計,又戲劇性展示聲稱裝有500萬現金的行李篋及500萬元支票。惟亞視員工於下午仍陸續接過臨時清盤人德勤的遣散信,連效力逾半世紀的員工也黯然收信離開。至晚上8時,亞視與德勤達成協議,並獲法庭接納。亞視將重新聘請160名員工,並在今日向他們支付3月份薪金,以維持營運至4月1日牌照期滿。記者:伍雅謙 佘錦洪德勤晚上11時半發新聞稿指,昨午中國文化傳媒才展示出有馬上提供實際資金支援亞視3月份營運能力。德勤因此宣佈中國文化傳媒已跟臨時清盤人達成有條件協議,亞視繼續營運,直至其本地免費電視牌照有效日期結束為止。



■行李篋內有大叠千元鈔票及附司榮彬簽名的500萬支票,但底部可見多叠紅色紙幣。

■亞視一度傳於昨晚6時停播,但《六點鐘新聞》仍準時播出。亞視畫面

■德勤職員昨抵達亞視,並在一會議室工作。亞視員工提供圖片




今日須付清3月薪金

協議內容為,中國文化傳媒同意向亞視提供一筆800萬元資金,該資金部份需分批以現金於今日及下周一前向臨時清盤人支付,另一部份以兩份總擔保價值共500萬的銀行保證書,分別於下周五及3月31日向臨時清盤人支付。另一項重要的條款訂明,重新獲聘用的員工將會服務至亞視服務牌照結束為止,而該批員工3月份薪金必須於今日前全部付清。德勤已於昨晚8時向高等法院要求批署協議,並獲得法庭接納。德勤前日宣佈,昨日會遣散亞視全體員工及停播。亞視股東一方昨日即作出連串掙扎,先在凌晨時分向員工發出「留人」短訊,「千萬別收德勤解僱信,靜候司總的好消息」;至中午,亞視股東代表何子慧再舉行記招。



稱未來3年投資百億

記招上,除播放亞視未來3年的百億投資大計宣傳片,稱將會發展8大頻道,又展示一篋報稱有500萬現金及一張500萬元的支票,惟行李篋底部疑以其他物件墊高紙幣,底部紙幣也是紅色,似是100元鈔票,而非表面的「金牛」。不過,一直被拖欠薪金的員工下午已陸續接收德勤的遣散信離開。亞視終身榮譽員工、節目部高級節目執行主任程啟光也有收信,他表示自己在亞視服務53年非常愉快,相信是最後一天上班,心情沉重,但不評論亞視走到今天責任誰屬,僅指出糧是天經地義。製作部編導吳先生則是收到股東司榮彬留守短訊的員工之一,他在亞視斷續工作10年,最終仍決定收信,並批評亞視股東有錢也拒絕出糧予員工,「你要請我都唔會做」。亞視欠薪關注組召集人曾憲國則炮轟說:「係咪真係有500萬?寫1億都得啦,大佬而家唔係拍戲呀!」他表示,昨日前往勞工處申請破欠基金的員工一度逼爆該處。下午亞視一度傳出在傍晚6時「熄機」,亞視發言人黃守東在死線前否認,《六點鐘新聞》亦如常播放。





來源: http://hk.apple.nextmedia.com/news/art/20160305/19517545
PermaLink: https://articles.zkiz.com/?id=296863

【今日笑一笑】老鷹在開餐厚臉皮烏鴉賴死唔走想黐餐

1 : GS(14)@2017-01-14 07:54:28

美國阿拉斯加冬天一片雪地,食物對野生動物來說十分珍貴。網上一條片段可見,一隻發現食物的老鷹,正在大快朵頤之際,一隻烏鴉飛來,裝作沒事,但卻暗中監視老鷹有沒有掉下食物,希望可以「執死雞」。老鷹覺得不耐煩,把牠嚇走。但烏鴉死纏爛打,數度折返,希望老鷹分享食物,老鷹也沒牠法子。




來源: http://hk.apple.nextmedia.com/international/art/20170113/19895656
PermaLink: https://articles.zkiz.com/?id=322500

Next Page

ZKIZ Archives @ 2019