ZKIZ Archives


【堅過星爺】街頭人肉風火輪 63歲鄭叔有心有力

1 : GS(14)@2016-08-21 08:11:06

鄭叔連續轉咗12圈,真係睇見都覺得暈呀



「熱血」嘅嘢唔係好多人會明,就好似電影《激戰》入面,當張家輝決定再上擂台打MMA,佢老死黑仔(姜皓文)即爆晒青筋問「你癲夠未?!我都唔明你打嚟做乜?!」無錯,我哋見到「熱血」嘅人和事,第一個反應都可能會問「為乜?」不過,學戲中嘅張家輝話齋「我同你呢個年紀,仲有嘢需要人明咩?」



年屆63歲嘅鄭叔,柔軟度認真驚人,超輕鬆就擺咗隻腳去棵樹度!

玩咗街頭健身幾十年,鄭叔話最開心係識到呢班後生仔

呢招「人旗」(human flag),真係少啲臂力都做唔到呀

目測擁有44吋胸肌嘅鄭叔,今年已經63歲,咪睇佢o依家咁「勇武」,原來鄭叔細個嗰時身體好弱,所以佢就開始做運動強身健體。初初只係跑步游水,但天生跳跳紮嘅佢覺得跑步游水太悶喇,於是就開始周圍爬,點知爬吓爬吓,喺桿上做啲體操動作,咁佢就由十幾歲開始成為咗o依家喺外國好興嘅街頭健身(Street Workout)運動員喇。



鄭叔話自己最滿意自己個胸肌喎,目測起碼44吋,大家點睇?

天秀路公園係鄭叔放工必「蒲」嘅地方

倒立呢啲基本嘢點會難到鄭叔呀

本身做電工嘅鄭叔,一放工就會落屋企樓下嘅天秀公園同啲鋼架玩遊戲。除咗一般嘅街頭健身動作,好似「人旗」(human flag),即係兩手緊握垂直柱,將身體凌空90度;同「龍旗」(dragon flag),呢個動作由李小龍發明嘅一個腹部健身動作之外,鄭叔仲自創咗個絕技「風火輪」,就係呢個勁度十足嘅「風火輪」,感染到一班人哋眼中嘅「廢青」去跟鄭叔學嘢。幾年前,佢仲聯同兩個後生仔一齊創立咗 Barkids(街頭極限健身學校),身體力行推廣呢項運動。到目前為止,鄭叔嘅師兄弟已經超過100人。其中一位學員Zach驚歎:「我依家好有熱誠,但到我60幾歲一定冇鄭叔咁勁啦,有時玩到攰,見到佢仲轉風火輪,就好有能量。」



雖然鄭叔擁有一身好武功,但始終都唔係「十八廿二」,屋企人又點會唔擔心佢受傷呢?不過擔心還擔心,佢哋都好支持鄭叔繼續玩,只係間唔中「囉唆」幾句,太太得閒仲會陪佢一齊到天秀公園添。可能好多人會覺得鄭叔都一把年紀,不如玩番啲「輕擎啲」、又安全啲嘅運動,但鄭叔就話會玩到玩唔到為止,仲話運動冇講幾多歲:「生命在於運動吖嘛!」佢對街頭健身嘅「熱血」程度,真係勁過唔少後生仔!



街頭健身呢種極限運動先由東歐興起,雖然未列為奧運項目,但已經引起國際注目。2011年喺拉脫維亞首都里加、舉行首屆街頭健身世界錦標賽。佢係糅合健身、體操以及多人合作嘅運動,玩家會喺公園或街頭,利用公共設施練習。近呢兩、三年,本港有唔少青少年藉住睇一啲網上片段自學練習,現時香港都有大約百幾人玩呢種運動,主要年齡介乎喺16至30歲。除咗天水圍嘅天秀公園設有健身站,維園、屯門、將軍澳等都會見到一班街頭極限健身運動員。【Sam哥x林丹】屋邨仔進化機長憑羽毛球衝上雲霄 http://bit.ly/2aNJGfF採訪:植詠珊(Cathy)編審:懷鈺編導:Kaman拍攝:Neo、Kaman剪接:Roy




來源: http://hk.apple.nextmedia.com/entertainment/art/20160821/19744469
PermaLink: https://articles.zkiz.com/?id=306749

Next Page

ZKIZ Archives @ 2019