ZKIZ Archives


4大女主角加埋159歲無綫狂拍續集

1 : GS(14)@2016-10-29 13:20:32

加一個字破壞一套戲名?無綫係專家。簡單加個數目字/「再」字,如《使徒行者2》、《再創世紀》,已經搞掂。睇無綫劇,就好似永劫輪迴咁,同一個劇,一係翻拍,一係開續集,而開續集嗰啲,大多數都唔係原班人馬,《學警》系列都已經算係比較「一脈相承」,《潛行狙擊》唔算,因為已經由《學警》變成Laughing哥嘅故仔。《溏心風暴》系列呢,第一同第二輯故仔完全唔同,但卡士又差唔多,但角色性情大變,又關係複雜,第一輯係親人第二輯變情侶嗰種,睇到傻。不得不提,當然仲有四位女主角加埋百幾歲嘅《深宮計》,梅小青回歸之作(《溏心》係佢老公劉家豪得意之作),四大女角平均年齡40歲:35歲劉心悠、31歲周秀娜、42歲陳煒同51歲羅霖,又係食《宮心計》條水。男主角呢?回巢幫拖嘅馬浚偉、大台力捧嘅蕭正楠,同埋成日俾監製迫佢扮cute或超齡MK嘅馬國明。至於麥明詩都有份拍嘅《使徒行者2》,冇爆seed哥林峯,又冇釘姐佘詩曼。林峯係因為同無綫約滿,激嬲方丈,所以《使徒》電影版都唔預佢;至於釘姐,聽聞係因為佢開個價太高,所以即使有得拍電影版,劇集版續集依然被飛。冇釘姐,但有余詠珊愛將黃翠如,仲有麥明詩,而卓Sir苗僑偉同歡喜哥許紹雄都喺度,加入咗宣萱、周柏豪同大奸角陳豪。港視回巢嘅蘇萬聰將會擔任監製,取代第一輯嘅文偉鴻。留意番,呢套劇係前傳,仲係同愛奇藝簽署合作協議,中港合拍。而另一套中港合拍劇,將會係依家重播緊嘅香港人經典劇《創世紀》續集——《再創世紀》。幕前幕後班底唔同晒,套劇集拍好剪好後,擺上騰訊首播,就連首曝光嘅宣傳片,都係簡體字。無綫董事局加入咗幾多「紅色背景」人士,大家心照。中國梅鐸兼無綫大股東黎瑞剛,冇耐之前先被委任為大台副主席,依家更加坐正,做埋早排邵氏兄弟主席兼非執董,仲搵埋安樂影片前高層兼大陸編劇姜偉幫手。今年8月,行政長官和行政會議批准TVB申請,准許黎瑞剛、陳國強、許濤同李寶安以《廣播條例》下「不符合持牌資格人士」之身份,對TVB行使或繼續行使控制。咁《使徒2》仲敢唔敢講黑警?




來源: http://hk.apple.nextmedia.com/entertainment/art/20161029/19816014
PermaLink: https://articles.zkiz.com/?id=313993

財經評論:40歲無樓男睇樓市

1 : GS(14)@2017-10-09 00:02:04

■按目前樓市去向,除非爆發金融風暴,否則難阻樓市升勢。資料圖片





一對「80後」準新婚大學生自稱月入六至七萬元也難買樓,聽落諷刺,又嘲諷現時大學生月入中位數僅萬多元,「唔知讀咁多書做乜」。金管局總裁陳德霖指市民預期樓市只升不跌的看法並不理性,但事實是樓價已連升17個月,期間累升25%;市民有這種想法,又不能完全怪責他們,只是基於環境所逼,不信都要信下去。世上有兩類人,一種是怕死,另一種是不怕死。套用於樓市,就是不怕死的人存在,即使比例不高,但在目前樓市流通量居不高下,足以令樓價只升不跌。怕死又不是罪,人之常情,世界那有資產能只升不跌,但要等到樓市爆煲的一天,時間而已,可能是聽日、出年、或者十年之後。我的一名已婚朋友,屬100%大淡友,由30歲講到40歲都未買樓,他結婚後一家四口黐住屋企住,該七百呎四房單位連工人住了11人。這類年輕人在結婚後買不起樓仍黐住屋企人的個案,大有人在。說回這位老友,去年初大跌市本應有一次入市機會,睇中大埔區一個居屋單位,當時由200萬跌到百多萬元,他仍覺未見底。近日與這名老友見面,提到當日無買,單位已升值至300萬元,看他難言的表情,肯定揼心口揼到裂埋。他唉聲嘆氣,仍堅信政府即將公佈的施政報告會有「辣招」,樓價必定大跌,到時一定不怕無樓買。年輕人對樓市怨氣日漸加深,下周在施政報告中公佈的「首置上車盤」,就是為了他們而推出的資助房屋政策。過往政府在最非常時期才推出非常措施;美國縮表、加息逼近、土地供應增加,財金官員近期也多次發出預警,形容樓市前景極不明朗,政府此時推出「首置上車盤」,係幫你定靠害,拭目以待。不過,按目前樓市去向,除非爆發金融風暴,或環球政局影響,沒有人會阻到樓市升勢。記者:朱連峰




來源: http://hk.apple.nextmedia.com/financeestate/art/20171006/20173943
PermaLink: https://articles.zkiz.com/?id=341808

Next Page

ZKIZ Archives @ 2019