ZKIZ Archives


28歲應如何自處(答) Home Blogger

http://www.homebloggerhk.com/?p=5792

答Hi CY,

正所謂心誠則靈,雖然諗樣唔係神仙,不過見到你咁詳盡咁寫個case比我知當然要快覆你。總括來說本樣覺得CY你收入上的不穩令你對自己前途失了信心,其實你身上擁有幾項優勢,慘過你既人大把。希望你學似你父母一樣勤儉力作,將父母現時傳比你既優勢第時留比你子女。

雖說「好仔不論爺田地」,不過就憑你咁講本樣覺得父母都有心將半間鋪同洋樓第時留比你了。而家就當你第時唔能夠獨有間鋪同洋樓,且看你如何改善埋你現時既弱點: 收入不穩,為未來鋪路。

談credibility

諗樣大部份既case都係叫人運用本身既credibility而向銀行借貸,購入提供正現金流既實物而令自己收入倍增。可惜CY你既case就係credibility低既一種,即係你case中講提供唔到糧單比銀行、「谷住谷住」借唔到錢既情況。要提高credibility,其一就係去返design co.打工,一定出糧要比autopay個隻(唔係就咁transfer!),不過你個行係真係少autopay既。其二就係自己做,先搵個事務律師去開間有限或私人公司去接job,再要去銀行開公司戶口同埋整autopay,每個月出糧就要send個excel file比銀行話比佢知點出糧。你呢種小客戶都係去建行問下啦,獅子一腳就掃你出門口。

如唔識律師請在網上search全包宴,收費四至六千。係銀行autopay set番二萬蚊糧比自己。開有限公司就要每年比幾千蚊人地幫你做數,保障就係萬一你既裝修生意引起法律責任都唔使比人告到嘔突。月入萬八幾係一個幾平衡選擇,交些少稅又可以攞番個月入證明。第時生意好再「整大份糧」啦!

談進修

除非你諗住走番出去打工,我諗你讀building degree或design course用處不大。因為廿八歲既人要比錢及時間讀書實在涉及莫大既機會成本,HKXspace猛咁話讀書有前途係呃你的。當然我唔係阻你充實自己,只不過想提出人到三十靠讀書幫手已經越黎越唔見效,請唔好對讀書有太大期望。

你做左野四年,應該同好多人一樣諗緊自己呢行適唔適合自己。其實諗樣想講人人都係「做個行憎個行」,你都係唔好坐係度「坐這山望那山」,小心「一事無成」。趁自己仲係廿幾歲開始利用你所有network幫自己搵生意,用晚上時間part-time進修下design course亦可,比心機用腦去做就算倒垃圾都可以賺到成張台都係錢(真人真事)。對於「廿到尾」既你,請你望更遠睇一睇第時結左婚生埋仔「走唔甩」既景象,你就知道自己仲有幾少時間為自己事業而奮鬥了。

庸才一定要搵人幫

如果想一起共患難,叫你女友搵份正職吧! 兩個人一個搞生意,一個part-time冇咩入息,呢個「組合」銀行係唔會幫你既。都講過庸才一定要搵人幫! 如果銀行成世都幫唔到手,你仲要幫返屋企,再咁落去不太樂觀吧!

好彩父母為你提供一個腹地,就係間洋樓。第時結左婚不妨先屈就,比返$3200蚊屋企人租埋現時租客間房,係舊樓暫住儲錢先。洋樓太舊,按比銀行都唔可以攤長還,但係分十年還又令你負擔太重,按比邦民利息高達6%! 都係用黎自住唔好諗按啦。鋪頭你又沒全部業權,不如當留比自己十幾年後既錢,到時無論自己有幾唔好彩,都可以賣出自己半份換重新機會。

CY請趁呢幾年做好工作,提升自己credibility。現時用家人資產置業及增加收入對你來說太冒險,亦犯不著用父母淨低比你既業權攞出去再投資。你可以努力幾年,用幾千蚊洗費住係洋樓仲慳埋個裝修。每月同女友夾埋儲一萬蚊的話幾年後都可以有三十幾萬。由於你本身有資產係手,每儲到三四十萬就可以出擊買樓。如幾年內月入不增,你就要懲罰自己屈係洋樓度,用儲到既錢買間上車盤(二百萬)七成上會再租比人,再儲到錢又買。你亦可利用本身懂裝修設計優勢,買間爛樓返黎執靚佢賣比人賺十幾廿萬都可以,好多裝修師傅都有同agent拍住做的,或極熱衷將舊樓間房分租比人。裝修行業同樓宇買賣息息相關,只要你執靚「自己盤數」,靠樓宇買賣累積財富,成功個案多的是!

PermaLink: https://articles.zkiz.com/?id=43586

Next Page

ZKIZ Archives @ 2019