上市半日就被證監勒令停牌的駿傑（8188），焦點遂落在其保薦人浩德融資老細，即葉劉姪仔葉天賜（Arnold）身上，其父為正興建築創辦人葉正平長子，母親為前軍閥陳維周孫女陳潔麗，貴為名門之後，且畢業於英國劍橋名校，外形討好，是正牌「金融才俊」。 但中環口痕友提出一個非常奧妙問題，何解Arnold相貌好像混血兒，其父葉文山及母親陳潔麗都係中國人面孔，莫非父母有隱性洋人基因？套用死鬼曹仁超一句，木哉羊？只可以講一句，貴為葉家的長孫，葉天賜沒分得家族分毫，全靠自己一雙手，或者重溫任劍輝主演的《此子何來問句妻》或者有些頭緒。 老實三六九 由鄭維志家族控制的永泰地產（369），自從五年前重組以少於六億元取得南聯（現稱萬科（1036））過百億資產，令人刮目相看，369手頭揸住唔少值錢資產，如觀塘Landmark East，倫敦都有多幢商業收租物業，然而管理層「太老實」，股價長期徘徊四、五蚊邊，香港磚頭有價都冇乜上落，即使早排有中資財團睇中其灣仔W. Square全幢，開咗個價俾永泰，只不過管理層無意出售請吃閉門羮便算數，激到揸住369嘅基金佬扎扎跳，又係嘅，出個通告，公告天下有中資財團垂青其資產，股價點都可以刺激一下！ 中環寸嘴工廈小王子復仇記@陸羽 兩個禮拜前睇《信報》專欄，唯靈寫「陸羽」對面間食肆試業，即係以前新同樂個位，嗰度樓底矮都唔係好好坐，唯靈寫話個「杏汁白肺湯」每位要一百二十蚊，嘩，打對台嘅「陸羽」，一鍋夠四人飲都係二百三十蚊，咁啱有老友喺溫哥華返香港，就一齊去「陸羽」叫個「杏汁白肺湯」試真啲味唔係老作，咁就有個bench mark，等我第日去對面間新食肆捧場嘅時候，就比較到佢百二蚊一碗「杏汁白肺湯」值唔值；正所謂唔好聽價唔聽斗！臨走時，打對台間食肆神神秘秘舞獅搞開張儀式，企喺門口睇吓有乜大龍鳳，吖，個揸弗人「阿錢」立即撲埋嚟好「謙遜有禮」咁同我握手，誠懇之程度同我出道時嘅姿勢有得揮。此情此景，證明我仍有市場價值，個揸弗人直頭「生擒陸羽第三代常客」，拉客去佢嗰邊，睇到陸羽啲茶博士眼擎擎；超！唔係有次朝早十點半鐘去陸羽飲茶，揸水煲條友話無位喎，我今鋪上演一齣「沙士髀罅」名著——工廈小王子陸羽復仇記！ 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 拔萃女校友魔咒 拔萃女書院這間百年名校，人才輩出；只不過有才幹有主見嘅女士，要搵到個男人遷就得到也非易事，有云女拔萃校友離婚率偏高，屈指一算，離婚名校友有前環境運輸及工務局局長廖秀冬、前港姐楊寶玲、孫泳恩及藝人傅明憲等等，最近又印證一例，賭王女兒何超鳳也是拔萃女書院校友，去年跟結婚廿三載何志堅離婚，聽講何生脾氣好好，只不過到了忍無可忍的臨界點惟有分開。 | ||