【馮仁昭四圍超】賴新歌難唱忘詞 阿倫生日集「脂」
1 :
GS(14)@2016-08-18 06:04:33譚詠麟（阿倫）、陳小春、蔡瀚億（BabyJohn）同蔡潔，噚日喺奧海城戲院出席電影《江湖悲劇》主題曲〈男人悲劇〉MV首播，呢次仲係阿倫同小春首次攜手合唱。阿倫話首歌好難唱，好難聽到live版，但BabyJohn、蔡潔同談善言現場唱咗一段，阿倫孖小春要拎住貓紙清唱一段難版，戴住黑超嘅阿倫，似乎唔清楚歌詞，中途有少少甩嘴，事後佢哋話應該冇機會再喺現場唱呢首歌。
■阿倫下周二66歲牛一，噚日宣傳時獲送上蛋糕預先慶祝。
收逾30個蛋糕
下周二係阿倫66歲牛一，噚日都有粉絲送上蛋糕，壽星倫話本月11號收到第一個蛋糕，直到而家都切咗超過30個，佢得戚話：「我梗係舔吓就算，食晒就真係集『脂』。呢個月每晚都同朋友食飯慶祝，正日同家人過。」問到阿倫嘅生日願望係咪想攞影帝？佢大笑話：「係啲歌詞咁寫話想拎影帝，不過要由喜劇去到令觀眾沉澱感受內容係有難度，今次部戲以類似漫畫形式去拍，係新嘗試。」此外，王宗堯日前貼出同女友蔡潔喺鏡前梳洗相，暗示同居關係，問蔡潔係咪日日共用洗手間，佢話：「大家有自己私人空間。」問佢見過家長未？來自內地嘅蔡潔話：「我好耐冇返屋企，爸媽都好掛住我，今年冇時間，返都係自己返去先，見家長再遲啲。」撰文：馮仁昭
來源:
http://hk.apple.nextmedia.com/entertainment/art/20160818/19740391