無綫編劇轟不被尊重胡定欣成嫌疑人
1 :
GS(14)@2016-12-31 01:06:37無綫台慶頒獎禮已經曲終人散，陳展鵬同胡定欣演出嘅劇集《城寨英雄》幾乎由頭帶到尾，囊括咗幾個大獎。不過昨日有周刊報道，頒獎禮嗰晚，兩位主角喺台上講得獎感受，雖然有多謝合作嘅單位，係偏偏冇多謝啲編劇，結果搞到有編劇不滿，喺微博開post揞名炮轟稱不受尊重。查實當晚鄧萃雯喺頒發「最佳劇集」嘅時候，強調呢個獎除咗俾監製之外，一定要頒俾編劇，《城寨》嘅編審黎倩儀喺拎獎嗰一刻已經講過：「多謝支持編審嘅人！」之後曾經擔任《一屋老友記》同《愛回家之八時入席》嘅編劇馬俊縈喺微博留言恭喜同期編劇班同學黎倩儀，佢話：「以你為榮，繼續加油！感謝你一句#多謝支持編劇的人#。最感恩是頒獎嘉賓對編劇的重視，雖然難以理解何以憑編劇塑造出來的角色和筆下的對白獲獎的演員會點名多謝健身教練也不提或者說漏編審名字。不需刻意奉承，只望有基本尊重。#你當我小器##like爆頒獎嘉賓#」當時已經有網民留言，覺得馬俊縈嘅茅頭所指喺人係胡定欣，佢有多謝導演監製、眾演員同PA，不過就真係漏咗編審。馬俊縈已經話多謝教練唔止「她」一人，佢只係有感而發去講呢件事，只係介懷行業現況創作地位卑微。之後有人留言覺得佢只不過係講緊0依家嘅現象，呂慧儀嘅老公黃文迪亦都有留言，佢話做人做事都唔可以忘本，真心多謝同支持編審同編劇。據知馬俊縈完成下月開拍嘅處境劇之後，將會離開無綫，加上創作部一直不重視，相信佢趁離開前夕，為同事出一啖氣！
來源:
http://hk.apple.nextmedia.com/entertainment/art/20161230/19881494