ZKIZ Archives


莎莎郭羅桂珍夢想成真

2013-10-10  NM
 
 

 

生意,當然想愈做愈大,要成功,除了靠實幹,有時亦要諗諗計。羅氏針織太子女羅可旋,十年前在巴黎創辦bread n butter這時裝品牌,今日在中、港的門市已過百間,但她依然每季搞搞新意思;而莎莎(178)由做水貨變成化妝品王國,上月他們更在銅鑼灣這發跡地開了間二萬多呎、集美容、髮型、美甲、餐飲等一站式的概念店Sa Sa Supreme,副主席郭羅桂珍說:「係我其中一個理想,好似間百貨公司。」女兒郭詩慧都話:「我成日約朋友喺呢度,食完嘢等佢哋慢慢睇。」金色標記

訪問當日,莎莎老闆娘郭羅桂珍著住Chanel金色套裙前來,平日寡言、少做訪問的她,每次開口只講重點,「今年唔興金色,為間鋪之嘛,唔好誤會。」郭太說。

原來鋪頭用了金、玫瑰金和古銅金三隻顏色,「等人易認,似間高貴華麗的化妝品百貨公司。」身為集團企業策劃及發展總監的女兒郭詩慧(Melody)補充說:「爹哋媽咪對每個產品、鋪頭裝修都親力親為。」

這間樓高兩層、位於禮頓中心的Sa Sa Supreme,地面放最新產品,上了扶手電梯,就開始一站式兩萬多呎的扮靚消閒大本營,郭太說:「因為間間鋪都好逼,我覺得要有一間寬敞嘅店招呼我哋嘅本地客,等本地客買得舒服。」

這裡除可買到平時莎莎有的貨品外,還可以在這裡做facial、身體護理、set頭、修眉、修甲,並有不同國際品牌如BOBBI BROWN、M.A.C及ANNA SUI專櫃,又有最新代理的韓國美容品牌banila co.,郭太說:「呢啲係Melody幫手去搵嘅牌子。」店內還設有caffè HABIT¯U,行到攰可以醫肚,Melody說:「諗揀邊間都要慢慢傾,我哋都試過好多間菜,揀HABIT¯U因為我本身好鍾意飲咖啡。」

朋友聚腳地

在澳洲Monash University讀完Master of International Business的Melody,對這行充滿熱誠,所以畢業後便回港打理家族生意。她喜歡約朋友在這裡嘆茶,八月試業時,林建岳女兒林恬兒、百樂集團主席羅家寶女兒羅穎怡等亦來過,「佢哋覺得好好,有時約朋友喺度食飯都好方便,之前可以早少少喺度扮靚,再過去HABIT¯U,一定唔會遲到。」籌備了大半年的概念店選在銅鑼灣,同郭氏夫婦情意結有關,郭太說:「我自己在銅鑼灣起家。」莎莎之所以誕生,是因為曾當佳麗寶化妝小姐的郭太,在七八年偶然知道總統商場有個莎莎化妝品櫃位放盤,頂手費二萬元,她便靠積蓄及向外家借貸創業。之後生意轉好,丈夫郭少明亦辭去維修咪錶和隧道收費的公務員職位,全職夫妻檔打拚,郭少明憶述:「我當時返夜更,朝早七點放工,鋪頭十點開,我瞓一陣就去幫太太。」三年前總統商場及他們的舊居中央樓,已由豐泰地產以二十八億元購入,將重建商廈。重臨發跡區,郭太披露這重建項目她亦投資了兩成,「對銅鑼灣當然倍有親切感,所以有份 投資。」

 
PermaLink: https://articles.zkiz.com/?id=76739

Next Page

ZKIZ Archives @ 2019