ZKIZ Archives


【汽車籽】阿仔22年車手路 阿爸一架爛鐵成全

1 : GS(14)@2017-06-16 01:59:49

興仔哥(左)是Dream Workshop HK車房老闆,現在不時會跟Andy研究客人的改裝車。



【汽車籽:軸芯人物】爸爸眼中的子女永遠是最好的,相信58歲的甄子興(人稱興仔哥),心中最好的車手一定是他:甄卓偉(Andy)。由車房學師、業餘賽車,到一步一步引領兒子Andy走上全職車手路,興仔哥沾沾自喜地說:「他每一場賽事也是那麼精采,至今亦然。」



甄卓偉Profile·香港職業賽車手·2011/2013/2015年中國房車錦標賽年度總冠軍·2014年澳門電訊盃冠軍·現兼任AMG、法拉利及瑪莎拉蒂中國駕駛學校教練



現年33歲的香港車手甄卓偉,由11歲開始玩小型賽車比賽,走過22年的車手路,從小到大於家境一般的環境下成長,所以自小就明白一個道理,「睇餸食飯,有幾多便用幾多。」甄爸爸14歲開始便跑到車房做學師,經歷由英國車演變成日本車雄霸市場的歲月,從此愛上賽車,儲到錢就業餘落場玩小型賽車及房車比賽,全憑他的堅持和熱誠,成就了仔仔Andy的職業車手夢。興仔哥話:「Andy5歲時,我帶他去維園睇國際小型賽車比賽,佢已經問我幾時可以揸呢啲車?」本着應承了便要做的理念,興仔哥便帶當年只有11歲的Andy到深圳香蜜湖開展車手之路。見他在小型賽車有一點成績,等到他18歲考到車牌後,就鼓勵他嘗試參加房車賽,「那時我有一部舊賽車放在車房,便叫他不如拎去試玩。」Andy人生第一場參加的房車賽事,資金欠奉,整車都由爸爸親自負責,揸架N組車去鬥A組車的賽事,就連熱身圈時車轆都要問人借舊胎。「人人都看不起呢名車手呢架車,怎知當佢試完練習圈排位,三十幾架車中排第四。說起也激動,俾人彈到一文不值的爛鐵,一排位就排第四。」


「唔好埋怨架車」

由2003年開始正式鬥房車賽,第一次落場參與澳門賽事都是揸住爸爸6年前同一部的Civic賽車,Andy說:「當時心態是旨在參與,有得參賽已經很開心。」持續8年用土炮車鬥廠車的生涯,2009年才得到長安福特車隊(FRD)賞識,透過FRD老闆Kenneth Ma給予他一個試車的機會,出戰CTCC中國房車錦標賽。年輕時真係冇介意揸住爛鐵鬥車?「冇介意,爸爸喺呢方面教育得好,我們表明手頭上只有咁多,換一個想法是鍛煉自己技術。加上爸爸自己賽車都係咁,細個睇佢都係將啲舊零件湊埋一齊就去鬥。落得場總會想贏,你可以選擇唔跑,但你跑得就要盡力去跑。」興仔哥的健談,做人樂觀的平常心於訪問中不難感受,他最愛跟後輩說:「唔好埋怨架車,唔好比較你有幾多,但每一場比賽,你要知贏係贏乜,輸係輸乜,咁樣先會進步。」興仔哥近年已經少有到賽場看Andy比賽,那天捉他一齊到肇慶廣東國際賽車場現場打氣,出賽前後兩父子甚少交流,碰面時的舉動也不會太親密,但甄爸爸對Andy的影響卻是一生一世。問到算是跟爸爸有交代嗎?Andy尷尬地說:「我希望係!佢影響我最深係佢技術咁好,卻從來都冇好車揸,我好佩服佢唔會輕易放棄,係一個好有毅力的人。」



興仔哥近年少有到現場打氣,但他仍會在網上留意兒子每一場賽事。

大堆獎盃擱置一旁,Andy話有時望着都有不少回憶。

兩父子從沒有想過放棄賽車夢,Andy18歲時立刻由小型賽車轉戰房車。


即使參加小型賽車,爸爸在資源上都是有限度支持,在精神上卻無限。

5歲時去維園睇國際小型賽車已想當小車手。

20年前在賽車場上跟郭富城合照,今年更有機會代表城城的車隊出賽。


含住奶嘴已經去睇爸爸比賽,難怪Andy會想成為車手。

1997年時興仔哥揸住呢部Civic落場鬥澳門賽,可惜排位時已經有意外。

2003年Andy揸住同一部車第一次鬥澳門賽,賽車拉花如字海,全部都是世叔伯的贊助。

記者:許維雅攝影:許先煜、蕭志南編輯:馮秀珍美術:孔文彬



2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170615/20055836
PermaLink: https://articles.zkiz.com/?id=335630

Next Page

ZKIZ Archives @ 2019