ZKIZ Archives


猴年新娘 熊黛林做郭太董敏莉嫁律師

1 : GS(14)@2016-03-11 00:51:28

■熊黛林日前出席公司春茗,大騷三卡訂婚鑽戒,養眼程度遠勝她的性感低胸。



娛圈多喜事,繼鍾嘉欣下嫁脊醫後,又多兩位做待嫁新娘,熊黛林昨日承認已與坐擁家族資產100億的郭可盈胞弟郭可頌訂婚三個月,更大騷過百萬的三卡鑽戒,甜蜜地讚Mr. Right夠孝順勤力,並揚言婚後一定會生B。另一準新娘董敏莉,昨日被發現將與大她15年的律師男友莊耀金結婚,猴年真的好有愛。

【董敏莉夫大15年】

現年35歲、歌手出身的董敏莉昨日都宣佈結婚,記者在金鐘婚姻登記處發現她與圈外男友莊耀金的擬結婚通知書,準新郎任職律師,比董敏莉大15年。董敏莉昨日在電話中大方承認說:「多謝晒,我哋拍拖兩年幾,半年前開始討論。佢求過婚三次,但過程一啲都唔浪漫,只係好casual咁喺廁所、睡房同客廳問過吓,係有日瞓醒覺得OK,咁佢就問我攞張身份證影印本去搞。」她表示未收求婚戒指,但有收車,而婚禮不會大搞,但卻花心思畫了一幅Q版情侶穿上禮服的背影請柬。



■50歲、任職律師的莊耀金,在董敏莉眼中一點也不老。

■董敏莉學畫畫三個月,親自畫結婚請柬贈親友。



三年內生B

董敏莉否認奉子成婚,笑說:「唔係,我係人馬座,不嬲鍾意快。但都希望38歲前生BB。」問未婚夫有甚麼優點?她甜絲絲說:「佢份人夠成熟,但個樣就後生。」她表示最要多謝紅娘路芙:「我兩年幾前未有拖拍,成日叫路芙穿針引線,佢都算唔話得,最老土嗰種,食食吓飯話『有事走先』,咁就成功咗。」路芙則爆是董敏莉先做主動,大讚準新郎是個不會花言巧語的好人。採訪:羅慧敏、嵐山



【熊黛林騷三卡戒】

熊黛林與郭富城七年情未能開花結果,前年8月戀上郭可盈的失婚胞弟郭可頌,男方除打理家族逾百億生意外,又有個人事業,兩人一拍即合,熊黛林更早已融入郭家。



■前年8月,熊黛林(左)被揭與郭可頌撐枱腳。資料圖片

■心情靚爆的熊黛林,在春茗上與琦琦(左)傾不停。



訂婚逾月

一直有傳38歲的郭可頌已向36歲的熊黛林求婚成功,去年底曾傳出二人在日本沖繩結婚,但遭女方否認,日前熊黛林出席所屬模特兒公司春茗時終於露端倪,身穿黑皮褸及碎花裙,心情靚爆的她與同事selfie時,可見左手中指的巨型鑽戒比deep V性感上圍更為搶鏡。記者昨日致電熊黛林,她在電話哈哈甜笑,直認是求婚鑽戒,目測卡數至少有三卡,相信價值過七位數字,她對此說:「其實都有兩、三個月,只不過我冇特登講。」提到求婚過程,她說:「其實都好簡單,不過好有誠意,乜都齊晒,佢講嘅嘢最緊要,但太細節唔講啦。」


■與郭可頌拍拖一年多,熊黛林早已融入郭家,之前出席「姑奶」郭可盈的家庭生日會。微博圖片


問到婚期會否是今年,以及在香港、南京搞婚宴等細節時,熊黛林說:「會簡簡單單,好多嘢都未傾,而家拍緊戲,要完晒工作先慢慢計劃,佢都明,不過唔好太耐。」她表示二人都愛小朋友:「一定會要小朋友,唔心急,唯一肯定係結咗婚先有,準備好先。」對於未婚夫一家,她讚不絕口:「佢屋企人好好,佢好孝順,真係會計劃我哋以後嘅嘢,睇到佢好有誠意,有努力改變,唔係得把口,好佩服佢,個人真係好嘅時候,唔使諗就講到呢啲嘢。」採訪:唐如、張俊銘





來源: http://hk.apple.nextmedia.com/entertainment/art/20160310/19522772
PermaLink: https://articles.zkiz.com/?id=297504

Next Page

ZKIZ Archives @ 2019