ZKIZ Archives


飛天朱向準689開火

2016-09-01  NM

在「行李門」事件公然挑機689嘅「飛天朱」,七月份返咗加州,享受佢揸電單車、玩滑翔傘飛天逍遙嘅日子,本來佢話:「California living! Don't want to come back anymore!」

但佢日日睇住香港新聞,如廉署地震,689吹着港獨,又點可以唔返嚟趁吓熱鬧,會喺立法會選舉前一日從印尼趕返香港。飛天朱喺印尼泗水參加射擊比賽,仍不忘「689」,WhatsApp俾小宗,講明「準備開火」。原來佢有個印尼朋友,車牌係S689,呢位仁兄得知「689」為何物後,正考慮轉車牌,飛天朱謂:「你唔轉車牌,你啲香港朋友起碼會少一大半。」

闊太包起廚房佬

恒生總行對面唐樓的順德聯誼會,晚晚座無虛席,唔少會員排住隊訂枱,回味呢度順德風味菜式,如鵝掌柚皮、大良炒牛乳,由於係自置物業,環境實而不華,冇租金壓力,都幾抵食o架,如果同御用鄉里風水師蔡伯勵相熟或容易啲訂到位,只不過負責主理嘅大廚「生哥」已經被闊太私有化咗。小宗聽聞嘉頓麵包新抱張王幼倫,聯同剛上市冇耐嘅Classified Group,即鄭家純女婿龐建貽等人,已在灣仔莊士企業大廈三樓,「包」起「生哥」搞順德菜;想再回味「生哥」手勢,等九月開張啦。

大媽識貨認住Valcambi

人仔有貶值壓力,大媽為走資,不惜人肉搬金走,上週一位走私大媽被羅湖海關截獲腰纏十二公斤,印有「Valcambi Suisse」字樣的金塊,總值近四百萬;估計呢位大媽背後老細非一般大陸佬,識得買Valcambi金條,而唔係周大福,Valcambi係瑞士有名煉金工廠,出產嘅金和銀獲倫敦金市協會(LBMA)認可,各國央行買金都幫襯Valcambi,真係揦住Valcambi金條,去到邊都兌換到現金。

香港會傳出「輪姦」往事

估唔到大劉出巡這花邊新聞,亦成為「Hong Kong Club」入面班鬼佬茶餘飯後嘅話題;當年大劉與一眾華資大戶追擊置地,會所內洋人圈中一提起,依然㷫過辣雞,形容置地當年猶如被班華資佬「輪姦」。話說八七年大劉夥同李嘉誠、鄭裕彤及李兆基等巨頭追擊置地,十月碰上全球股災才鳴金收兵,但數月後班大孖沙聯同十大華資地產佬捲土重來,由李嘉誠做大佬向怡和主席西門凱瑟克提出收購其手頭置地股權,班鬼佬十分勞嘈,甚至打算到北京投訴,叫班華資佬唔好再搞,並賭氣話:「咁搞法,不如叫北京早啲收番香港算喇。」最後怡和斥資擊退華資財閥,八九年置地亦遷冊至百慕達,避之則吉,三十年過後,誠哥亦照辦煮碗,把長和系遷冊至開曼群島。

中環寸嘴

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

霍啟剛真有青春口吻

電視睇到呢個霍啟剛(Kenneth,K仔)講嘢,非常有青春口吻,話最可惜係香港人對運動嘅熱情,只是因為奧運四年先熱一次,怨政府對體育界嘅支持唔足夠,計我話,培育體育人才,最緊要由家長出發啦,你睇吓香港高爾夫球奧運代表Tiffany Chan,如果唔係有父母培育,又點彈到出嚟,喺香港你冇番咁上下銀彈又點去學golf?嗱,美國有個survey,父母希望仔女學打golf,輕鬆愉快啲受傷機會又少,將來做教練事業壽命又夠長,做父母都要考慮仔女下半世點過o架!好似K仔自己咁,佢阿爺霍英東又顯赫,又有國家配給「國寶」做老婆,又有家族慈善基金做後盾,前途一早已鋪好晒;電視訪問佢點解咁有興趣為Tiffany Chan打氣,佢仲話要跟呢位世姪女「學吓嘢」,真係好有家教,慣咗口頭禪,見親人都要喊住「跟人學嘢」,K仔忘記咗佢阿爺八四年喺中山興建中國第一個三十六個洞高爾夫球場喇。K仔唔似得我要「憂柴憂米」,憂咩?憂食得唔夠精,憂捕捉唔到啲時令食材咁啫。所以有時叫各方友好potluck,班啲正嘢大家分享。唔好以為我淨係識窒人,唔識俾solution,入選咗美食車嘅黯然銷魂漢堡,官方英文「BBQ Pork Burger」,容許我獻醜,計我話英文可以譯作Like Heaven, Like Hell Burger,咁先捉到意境,咪好似香港家陣個形勢咯。

PermaLink: https://articles.zkiz.com/?id=213856

Next Page

ZKIZ Archives @ 2019