2010-12-01 AD
|
||||||
|
江湖近日盛傳， 國泰航空（293）行政總裁湯彥麟可能離開國泰，過檔國際航空運輸協會（IATA）做其總幹事兼總裁，噚日華華有探子回報，話IATA好大機會喺今個周末 前宣佈新總裁人選，替代現任嘅Giovanni Bisignani。如果真係湯彥麟，最開心嘅人可能係最大機會接掌國泰嘅常務總裁史樂山。 聽講，就算湯彥麟唔係辭職，佢退休之後，史樂山都係國泰行政總裁嘅大熱繼任人選，所以如果湯彥麟真係決定過檔IATA，有機會升職嘅史樂山一定非常高興。 湯彥麟過檔IATA 可做到花甲 航空界人士分析，湯彥麟77年加入太古集團，今年55歲，按國泰內部規定，西人57歲就要退休，即係仲有兩年玩，IATA總幹事兼總裁聽講係5年一個任期，湯彥麟o依家過去就可以做到60歲，如果等到兩年後退休，到時又未必搵到另一份咁有國際地位同聲譽嘅筍工嘞！ 而 且，聽聞IATA總幹事兼總裁一職，年薪有成千萬，湯彥麟舊年喺國泰嘅年薪超過1200萬，即係話兩份工嘅年薪差不多。不過，IATA份工喺日內瓦返工， 當地薪俸稅率高過香港好多，啲錢嘅使法好唔同，有咁多考慮因素，可想而知，湯彥麟的確需要「腦交戰」幾百回合先有決定。 國泰過去十年差唔多隔幾年就換一個行政總裁，陳南祿04年底接替唐寶麟做行政總裁，做咗兩、三年就由湯彥麟頂上，如果佢決定走，咁國泰又要換人。好彩大公司講制度，唔會因為一個人走咗而令到公司政策出現重大變動，否則，長線投資者可能無所適從。 李華華 |
||||||