ZKIZ Archives


冰說聰明:波動市最講紀律

1 : GS(14)@2018-02-13 03:17:03

在股票市場,熊市揀股一定要有眼光,牛市跟衝一定要有勇氣,現時是否由牛轉熊,言之尚早,但在過去幾天的波動市中,你最需要的不是眼光及勇氣,而是紀律。青冰常同戰友分享,在逆市況時,最好就是去執倉,去重新部署。其實執倉有很多方法,但萬變不離其宗,就是汰弱留強。只要你能夠對自己坦白一點,分辨強弱是很易的事,有好消息時升得多,市況急跌時又跌得少,點計都係強啦。又或者,你買咗之後幾乎沒有潛過水,大漲小回全部都在你的入貨價上面發生,仲唔強?弱股者,就係升市升得少,跌市一定有份,你睇吓隻中移動(941)一定明白,佢貴為恒指第五大比重的股份,去年只跑贏中石油(857)及聯想(992),執筆之時,今年仍跌2%,昨天大市一度反彈,佢未到午市已經倒跌,買佢已經錯,繼續持有就更令人氣餒。好喇,當你懂分辨強弱,最難的就是執行,相信很多人明白止蝕的重要性,亦有很多人嗤之以鼻,認為應該十上十落,或者很容易左一巴右一巴,當中的假設,即是大市方向未變,但請留意自己的倉,自己是應該最清楚的,你問專家,答案也是根據他自己的倉位及判斷,坐住三成盈利,當然不介意現時震一震,即使再跌一成要調整策略,贏緊錢take profit心理壓力也細啲,但你的情況可能是淺潛變深潛,未必斬得落手。散戶的優點係靈活,先避其鋒,再謀後動並無不妥,別忘記了下星期二北水便會暫停,屆時購買力又少一截。可能北水也這樣想,下星期冇得沽喎,都唔知這兩星期外圍市況會點,不如現階段先行獲利啦,所以昨天看到罕見的北水淨流出,除非你覺得短期內會急彈番上33000點,否則酌量減倉減心理壓力,未為晚也,如果你相信牛市未完,今年仲有大把機會呢!青冰
http://fb.com/chingbing888本欄逢周四刊出



來源: https://hk.finance.appledaily.co ... e/20180208/20299099
PermaLink: https://articles.zkiz.com/?id=348330

Next Page

ZKIZ Archives @ 2019