李顯揚與胞妹李瑋玲公開指責大哥李顯龍後，擔心遭兄對付而踏足香港，所謂無情最是帝王家，可理解嘅，李氏家族因拆李光耀故居問題而內訌，亦抖出了李家成員慘遭壓迫的家事。 兩年前李光耀喪禮上，患上白化症的孫兒李鴻鵬出現，實情他才是長子嫡孫，是李顯龍與已故元配黃名揚所生，此媳婦來自吉隆坡並自小接受中文教育，後往劍橋讀醫而與李顯龍相識，但李顯龍母親柯玉芝不諳中文亦睇唔起呢位媳婦，把二人結婚時送上的蛋糕丟到垃圾桶，後來黃名揚誕下兒子，因遺傳基因引致有白化症，三星期後自殺身亡，李家向外公布媳婦因心臟病去世。而李光耀女兒李瑋玲至今仍是單身，其感情道路亦十分崎嶇，她的初戀情人是在新加坡國立大學讀書的印度裔同窗，父親是的士司機，李光耀夫婦極力反對，想唔分手都幾難；及後她避開傷心地遠赴倫敦進修，又與一名非洲裔醫生墮入愛河，還到談婚論嫁階段，但一如李顯揚所說：「老大哥無處不在。」李瑋玲被新加坡方面找到並帶回國。從李家兩個女人的經歷，再推敲下去，李顯龍與弟弟李顯揚之角力，將是一場國際級好戲。 基金佬望住信德流口水 繼誠哥宣布退休後，今年九十六歲的賭王何鴻燊正式把信德（242）執行主席一職交予何超瓊；信德股價過去一個月，由低價二元多升至接近四皮，箇中原因係有基金佬向管理層何家姊妹要求增加派息，又喺嘅，成間信德現金加銀行存款成一百三十億，揸咗貨基金佬又點會唔流口水？但何家姊妹雖有個人權益，但又唔等錢使，又焉會想到加碼派息，咁要睇信德非執董葉家祺（Kelvin Yip）造化，呢位畢業於哈佛嘅基金及私募投資高手，點都會平衡吓雙方（股東及大股東）所求，況且何超瓊坐正做主席，斷估都唔會做得太難睇，所以股價快撲上五十二週高位。 滙豐食屎？何東信託可鑑 昔日香港仍有遺產稅，唔少富豪為咗避稅，生前都成立信託，先驅者非何東莫屬。何東爵士過身前，已由獅子銀行成立信託，資產嘅買賣都由受託人（Trustee）話事，現時中環的盈置大廈，前身是恒生大廈，是昔日恒生總行；實情呢幅地原本由何東持有，一九五六年何東過身後，由獅子銀行於一九五九年以受託人身份把地皮售予恒生銀行；何東嘅後人都冇「say」o架，有辦你睇，即使逼滙豐「食屎」，都改變唔到滙豐受託人之投資決策，除非解散個信託，羅老太睇到唔好嚇親呀。 中環寸嘴冥冥中都注定你富或貧 工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 去低水平國家就要食貴嘅嘢，咁先stretch your dollar；去高水平國家就食實在嘢，睇吓硬掘嘢發揮到咩程度。好多年前去曼谷Inter-Continental地庫食過銀都潮州翅，今次俾我屎忽撞棍去Siam Paragon分店，有啲人食慣翅就有翅食嘅，食慣鮑魚又會有鮑魚食，冥冥中早注定你富或貧，一撞入去大門口就見到「土地公」，仲恭請埋土地娘娘坐鎮，最過癮係副對聯——「年年賺大錢，餐餐食魚翅」。銀都個老闆以前都搵過「陳伯」睇風水，老實講，加埋環保因素，魚翅又係貴重食材，無番啲符弗生意又點會咁興旺？講開陳伯，佢喪禮Charles何、楊受成同埋李嘉誠爭住sponsor帛金，有錢佬又點會死錯人。 點咗個魚翅扒，都可以啦，翅針之間有啲滑嘟嘟鯊魚肉，煙煙韌韌，不過食完之後都係懷念新同樂嘅翅，有鮑魚汁同埋金華火腿汁on the side，任你加，須知道老人家味蕾退化，咁樣就全面啲！ | ||||