9月更改合約做高層木村放下包袱晒愛的紋身
1 :
GS(14)@2017-04-04 08:56:03日本組合SMAP出道25周年卻解散收場，木村拓哉被指出賣隊友，據知中居正廣、香取慎吾、稻垣吾郎、草彅剛已決定今年唔會續約尊尼事務所，反觀木村就當然係繼續效力尊尼，究竟係飲水思源定係冇骨氣？咁就真係睇你點樣睇。去年已有消息指木村鋪路成尊尼事務所高層，前日再有報道木村同公司到9月會更新合約，到時會順便更改合約正式成為公司高層，終如「木村嫂」工藤靜香所願。有傳媒列出，喜多川社長同埋副社長Mary目前年收高達8億日圓（約5500萬港元）左右，估計擔任尊尼高層董事，年薪有1億日圓（約680萬港元）進帳，一般董事每年收入至少都有4000萬日圓（約280萬港元），每個月只係參加幾次會議就有豐厚進帳，木村今後可減少幕前演出，避免承受收視及票房壓力，而同門師兄近藤真彥、東山紀之等資深尊尼藝人目前都身兼公司董事。自SMAP解散後，對木村同靜香都帶來唔少變化，靜香早前開設Instagram帳戶，被指有意無意晒家庭幸福，而木村就更加放低多年來嘅萬人迷包袱，對於以前要包腳亮相，最近佢上節目終可光明正大露出左腳腳踝上嘅愛的紋身。
來源:
http://hk.apple.nextmedia.com/entertainment/art/20170404/19979674