ZKIZ Archives


細奀時代:慈父2.0是辣招煉成

1 : GS(14)@2016-11-08 05:40:22

「我住居屋,佢哋就住豪宅,仲要係自己名,又賺咗幾百萬,點叫得佢哋郁?」好記得幾年前一位在大機構工作的朋友在訴苦,管唔掂靠父幹的下屬,搞到樣樣事都親力親為。另外認識一對夫婦,在公營機構上班,穩穩定定幾萬元月薪,在父母協助之下上了車,於是乎便當正自己人生大贏家,一派活在當下的態度,講究工作及生活要平衡,追求飲飲食食,每兩三個月就去一次日本,唔需要擔憂上車,就唔需要升職加薪,咁辛苦為乜。政府加辣,真正一定發生的現象,是全港一班中產家庭被迫提早分身家,印花稅太貴,要幫仔女上車,層樓惟有直接落仔女名。香港大把有錢人,只要在八九十年代的時候識得諗,自住之外,再買多一層樓投資收租,今時今日就有條件升格做慈父,所以慈父是香港特產之一。送首期畀仔女的風險,好多人都知,尤其是見識過兩位小學雞議員丁蟹式的思想行為,肯定更加驚,但骨肉始終情深,慈父點都要做,頂多是工作幾忙都好,也不可以忽略親子關係,所以宣誓風波的最大社會貢獻,其實是加強了家庭教育。政府公佈加辣的時候搬出一堆數據,指投資客比例大升。英國脫歐只是促成這個現象的短期催化劑,從之前的訪問所見,投資客當中,開始出現慈父2.0,即是送一層樓的首期已經不夠,要送夠兩層,一層自住一層收租,還要扣除供款開支之後,租金收入可以夠子女生活。這班慈父2.0已經接受了子女不成材,放棄事業上的拯救,反而選擇將照顧升級。政府淨係睇數據,而不理解數據背後的成因。慈父2.0送樓收租而唔敢送股票收息,因為港股大市唔識升,還要大把老千股,隨時渣都無。對子女前途絕望,是因為香港整體商界無能力創造價值,形成競爭大而上位機會少。強加辣招,不外乎是政府擺明打劫慈父2.0的荷包。只要一日大環境不變,慈父2.0們依然會買樓,最多當收少幾年租,在仔女幾十年漫長人生中,不算是甚麼。香港樓市之所以有投資需求,就是因為營商環境差,打工又無前途,個個淨係識收租。加辣壓抑需求治標不治本,應該做的是化解這些需求。作為金融中心,市民除咗樓之外,唔識投資,年輕人又唔覺有前途,其實都相當諷刺。解決這些問題,就無人想買咁貴嘅樓,又或者咁貴嘅樓已經不是問題。否則辣招再辣,二世祖一樣中產化。阿飛本欄逢周二刊出




來源: http://hk.apple.nextmedia.com/financeestate/art/20161108/19825926
PermaLink: https://articles.zkiz.com/?id=314394

Next Page

ZKIZ Archives @ 2019