|
||||||
|
舊年尾，新世界發展（017）開國功臣梁志堅（堅叔）宣佈榮休，多年嚟同堅叔並肩作戰，幫「彤叔」鄭裕彤打天下嘅售樓部總司令何伍燕榆（何太）亦宣佈今個月底榮休，離開奉獻咗31年青春嘅新世界。 最難忘當年負責賣美孚 其實自堅叔舊年宣佈退休之後，市場已經不斷傳何太亦會退休，呢個消息，噚日終於得到何太親自證實。 何太話，暫時未有時間諗退休後做咩，但起碼會做司機先，皆因佢有6個孫女，最細只得1歲，退休後會全職湊孫。何太笑說：「可能仲辛苦過返工。」梗係啦，要車班乖孫周圍去玩噃。除咗弄孫為樂，何太話，平時得閒都會細細哋玩吓台灣牌，遲啲退休唔使做，日日打都唔怕。 何太畢業後，第一份工就係加入荔枝角美孚新邨嘅發展商美孚油庫，後生一輩應該唔識呢間公司，美孚油庫後嚟俾新世界收購，何太亦跟住加盟新世界。 何 太話喺呢31年，最印象深刻係美孚新邨，除咗因為呢個盤係佢入行第一個負責賣嘅樓盤，美孚亦係全港首個賣樓花、有示範單位嘅大型屋苑。何太話，發展商以前 賣樓，示範單位只求實際，「冇o依家咁豪」。佢人生第一個物業，都係美孚新邨，佢仲記得，當年公司唔畀員工買自己公司物業，所以佢都係接二手貨，「我買番 嚟係6萬蚊，但賣畀我嗰個人只係用3萬零蚊買入。」 |
||||||