ZKIZ Archives


中環在線:搶中國頭啖湯冇着數星交所公開認低威 李華華

2008-11-20  AppleDaily

內 地滬、深交易所成日都話會推出指數期貨,但講咗幾年都係只聞樓梯響,到家吓依然影都冇。新加坡交易所就有理冇理,兩年前搶先內地推出「新華富時A50指數 期貨」。不過星交所搶飲頭啖湯,未必一定有着數,星交所市場部副總裁周星前日喺內地出席一個期貨論壇時,首次認低威,話搶先推出A50指數期貨係「錯誤嘅 決定」。

離岸期貨交投疏

周星話,當初星交所如意算盤,係諗住新華富時A50指數期貨推出後,內地會隨即推出滬深300股指期 貨,但等咗兩年幾,依然冇聲氣落實推出;加上爆出上海證券交易所控告新華富時指數公司嘅違約官司,造成負面影響,拖累A50指數期貨嘅流通性同成交量萎 縮。講真,星洲隻A50指數期貨係離岸期貨,內地資金要投資點都唔係咁方便,所以周星都話,如果等中國本地指數期貨先推出,A50指數期貨會有更好發展 喎。話說星交所06年9月5號推出新華富時A50指數期貨交易,即時喺內地掀起一輪A股指數期貨「保衞戰」。

內地掀侵權官司

當 年上交所控告新華富時指數公司違反合約,指新華富時05年同佢哋簽訂合約,未得佢哋許可,唔可以私自用佢哋嘅資料同其他人合作推出衍生產品,結果新華富時 被上海法院判罰2萬銀美金。其實星交所不嬲都快人一步推出離岸指數期貨,唔單止搶飲中國頭啖湯,仲快過日本同台灣,推出當地指數期貨。至於香港嘞喎,港交 所(388)又點敢快過阿爺,推出A股指數期貨咁大逆不道呢?李華華[email protected]
PermaLink: https://articles.zkiz.com/?id=3339

Next Page

ZKIZ Archives @ 2019