2015-11-05 NM
本週日文武廟秋祭來個行大運巡遊，總理們個個長衫上陣；秋祭乃是慶祝秋收而酬神功，觀乎香港好似冇乜收成，政府上下忙於秋後算賬多啲，難怪主祭者黎時煖向文武二帝稟神時，為香港祈福：「化解社會分歧，達至政通人和。」 禮成後在文武廟旁東華三院校舍舉行「胙肉茶會」，以往在酒店舉行，有總理提出不應太奢侈，於是好似學校開茶會咁「到會」，切吓燒豬，排排坐，食番地道香港美食，班董事局成員真係心思縝密，富貴總理平日食得魚翅多，冇乜幾何篤吓魚蛋豬皮蘿蔔碗仔翅；見班總理與眾同樂，食得津津有味，臨尾仲有$100太興燒肉券收，人人笑呵呵！ 金融逍遙客：做人要「換位思考」 游走於中港台併購、私募投資的金融多棲動物，現為多間上市公司主要股東及董事 港股最近成交低迷似活殭屍，咬住雪茄看着財經台，一片死氣沉沉。倉位仍有不少，但彷彿那些股價變動與我無關，對股票的麻木程度自己也覺得有點可怕。最近較為震撼的消息，逍遙客認為非大陸放開一孩政策莫屬。改革初期先要解決十億人民食飯問題，以西方眼中嚴重侵犯人權手法去執行一孩政策，西方「文明之士」因而開始對中國留下不良印象。與解決問題比較，批評同指責他人都是件很簡單且毫不費力的差事，逍遙客真是由心佩服能妥善處理這種兩難局面的能人。強國同胞的土豪農民行徑，其實有一大部分是三十多年的一孩政策造成。由於每個家庭只有一個小孩，在傳統大家庭，萬千寵愛在一身，要培養出一個正常的小孩真是不容易。幾年前逍遙客與祖國富豪們全家在日本旅遊，團中一個八歲小孩飛奔搶先上了朋友的私人飛機，為的就是霸住正中主人家座位。作為受邀乘客的父母，對此情此景異常尷尬，軟硬兼施也未能將小孩勸離座位。八十、九十後的這一代，都生長在沒兄沒弟、沒姊沒妹，以自我為中心的環境，造成種種性格上的缺陷，客觀上是可以理解的。正如六、七十年代獅子山下的香港人，好環境生長在中半山家庭的小孩，不是上了港大就是去了英國，中環的前輩律師醫生都是這樣出來的；貧窮一族出身於寮屋區或慈雲山的小孩，年少無知加入十三太保，以後走的就完全是另一條人生路。現在已事業有成的社會精英，回頭看看自己出身，若切換一下家庭環境，仍會有今日的自己嗎？如今逃離敍利亞戰亂，一家大小逼在愛琴海上的孤舟上，多少是曾經的貴族、受過高等教育的社會精英，只要出生在不幸的國土，一切的個人能力與努力也顯得蒼白無力。逍遙客深感現代人最缺乏的是一個同理心（empathy），做生意也有句名言叫做「換位思考」，能與具備此兩種特質的人交手，即使做不成生意，過程都是非常愉快的，逍遙客最為珍惜及敬重的就是這種智者。能與此種智者為伍，真是一種福報。 中環寸嘴：上SKY 100撐老友場 工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。 上個禮拜特登去咗天際100撐我老友MaBelle老闆場，佢搞咗個Ashoka珠寶展，幾多阿太嚟睇呀，個個哄住個玻璃櫃爭住影相沾吓啲珠光寶氣，唔知道仲以為食自助餐，一盤盤咁推出嚟閃令令。MaBelle老闆同我識咗好耐，佢家族做鑽石珠寶幾十年，以前佢文咸東街嘅鋪位就喺我哋隔籬，我後生嘅時候，冇能力買大大粒嘅鑽石，我呢個老友好識做，錫住我荷包，搵啲細細粒鑽石好好火嘅，用「火數」搭夠。原本訂咗位喺「龍吟」食日本菜，吖，有個股票朋友打嚟話係都要請我食飯，仲幫我取消埋訂枱，我又冇乜所謂嘅，隨遇而安；條友車咗我去佐敦「金山海鮮酒家」，聽講潘迪生都鍾意嚟食，坐喺樓上嘅，我哋幾條友叫到成枱海鮮，又奄仔蟹，又龍蝦、雲英雞，埋單都係二千幾，抵吖，不過唔包條蘇眉，條魚我老友自己班返嚟，魚肉好滑，我都扒咗成碗飯。之前在此欄俾過些少意見中華廚藝學院，估唔到佢寫番封信嚟感謝我，其實我未講晒，食完餐後冇俾comment form我填，所以先無從comment，要進步梗係唔可以自吹自擂，冚埋張棉被，放屁自己聞咩！個外匯基金輸咗納稅人幾百億身家，陳德霖一句話無能為力，醜唔醜o架，睇住跌都唔識亡羊補牢，跌都有跌嘅玩法o架。不過佢叻仔呀，搵到呢個位坐，人工就同金融界top level睇齊，又唔使同表現掛鈎，唔使問責。 獅子怕行長 正所謂敵退我進，呢頭渣打結束香港成個衍生工具業務，嗰頭滙豐有意將衍生產品交易部遷移到港；計小宗話呢個決定同現任英倫銀行行長卡尼（Mark Carney）不無關係，佢老哥係首位加拿大人出任英倫銀行行長；出身於高盛嘅佢，又點會唔知衍生產品嘅把戲，出任加拿大銀行行長時，金融海嘯期間，成功令楓葉國銀行幸免於金融衍生工具毒害，亦因此在世界級金融界響朵，試問喺佢規管下，獅子銀行想玩衍生工具，返香港係咪過癮啲呢？而時興人民幣離岸衍生工具，話晒貼近強國，市場脈搏都緊貼啲吖。 本週線眼 借書系統全面自動化後，圖書館管理員剩下什麼工作？想想每週每月要如此逐頁檢查黏貼外國雜誌，真不知可計出多少工時來。 | ||||