ZKIZ Archives


找數講議價能力 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130607/18287059

話說紐約方面傳來消息,F.T.報導,大企業如P&G在銀紙水浸之時,竟然㩒慢數期,將45天數期延至75天,甚至120天,搞到啲廣告公司怨氣沖天。美國公司,每每兩星期出糧一次,薪酬係廣告公司最大開支,冇人才就冇創意嘅啦,做乜鬼廣告?買原料可以拖數啫,出糧唔拖得嘅噃。P&G此例一開,其他企業話要維持競爭力,紛紛效法嘅話,廣告公司就苦咯。呢樣可能只係第一步,因廣告公司多數冇巨額資金支持,行業內中小企又多,議價能力較低,故此大企業首先搵廣告公司做試驗品,行得通嘅話,其他供應商相信會陸續受壓,P&G係世界上最大嘅廣告客戶,銀紙大把,信貸評級係AA,借錢又平又容易,竟然如此逼迫供應商,實在冇理由。
呢日在喜萬年吃乳豬,以示送別舊店,期待新店在八月中開幕,席間有一位建築界人士,原來專門承接不同工程,即係總承包商,大判嗰類。佢話呢兩年適逢特區政府拚命推出基建項目與加快房屋興建量,令整個建築行業根本唔夠人,有工無人做,訂單接唔切,佢試過一輪為咗唔捨得唔搵錢,接多幾項工程,結果做到頭昏腦脹,幾乎埋唔到尾,累自己血壓上升,幾乎病咗,佢話:「卒之想通咗咯,上星期有五間地產商搵我落標,我只落一間,其他一於唔睬,無謂做死自己吖,無把握搵到咁多工人,中咗標都冇用,況且一啲發展商成日唔找數,拖得就拖,要我動用流動資金出糧俾工人,點搞呀。我現在好揀擇㗎,數期長嘅發展商,我唔落標,拖數出名嘅發展商,我唔落標,做少啲,咪可以嚟喜萬年嘆烤豬囉!」
風水輪流轉,冇工程之時,大判當然要跪地餵豬乸,到現在,建築工人短缺,承判商有大把工程可揀,自然惡番轉頭,與P&G vs廣告商嘅情況相反。自由市場,本是如此,好難講邊個啱,邊個唔啱,但如果講長期關係嘅話,數期準,唔拖數之發展商/大企業即使在供應困難時期仍然會有供應保證。呢位建築商人話,過往有一對夫婦最唔鍾意找數,判頭苦苦哀求,先至叫會計部付部份款項,判頭唔識英文,簽下英文收條,收錢而去,幾個月後,請公司找尾數,公司話:「你簽嗰張收條係借錢欠單,要俾利息,依家要對吓數先!」判頭嬲到破口大駡,日日咀咒老闆不得好死!

PermaLink: https://articles.zkiz.com/?id=57039

Next Page

ZKIZ Archives @ 2019