2011-4-29 AD
滙豐銀行前主席艾爾敦，喺獅子行做咗37年，05年正式退休兼獲得英皇儲查理斯頒授CBE勳銜。估唔到退休後6年，敦哥再獲舊舖委任，出任中東滙豐非執行主席，下月1號生效。由前大班出任集團附屬公司主席，敦哥呢次都算開創滙豐先河。
難忘運巨款去沙漠
艾爾敦喺賓架界一直享有崇高地位，佢喺滙豐銀行嘅工作生涯由中東展開，佢同太座亦喺中東共譜戀曲，所以應該對呢個地方特別情有獨鍾。
現任杜拜國際金融中心管理局主席嘅艾爾敦，對中東市場非常熟悉，68年加盟滙豐，就喺杜拜開始銀行生涯。退休前佢曾經同華華講過，好多難忘往事都喺中東發生，包括負責替阿曼國兌換新貨幣嘅經歷。
話說1970年，仍相當落後嘅阿曼，全國只有5公里柏油路，當時該國將用開嘅印度盧布兌換成新阿曼貨幣，滙豐獲委任為兌換行，敦哥仲記得當日駕駛住3大架載滿新鈔嘅貨車，喺35名軍人護駕下，出發去沙漠同農村，架起帳篷，為居民兌換貨幣嘅情景。
與太太邂逅之地
當然華華相信，中東最難忘之處，就係佢同太太相識以至共墮愛河嘅甜蜜往事。據聞，當時仲係年華雙十嘅艾太，正任職牙醫護士，敦哥睇牙時，邂逅佳人，繼而共譜戀曲，再娶得美人歸。認真浪漫！
李華華