八婆聲成名VS教舞老師火雞姐Yanki獨腳互數專長
1 :
GS(14)@2016-08-07 01:48:20■Yanki以八婆聲化身火雞姐拍片放上網，成功上位。
【《蘋果》專訪】短片「火雞姐搭巴士好X嬲」近日在網上瘋傳，3日已有逾百萬點擊的火雞姐，原來是狄易達師妹丁可欣（Yanki），火雞姐在片中用高音八婆聲，鬧爆搭巴士的四大惡行：污糟腳放對面椅、被鄰座乘客乞嗤噴大髀、開大speaker睇戲、大聲講電話，連鄭秀文（Sammi）都share短片讚：「Haha，火雞姐好搞笑！」現年22歲的火雞姐是屋村妹，曾獲2011年Yes校花冠軍，現職是舞蹈員，昨日她在九龍灣接受《蘋果》專訪，大跳性感電臀舞，又一人分飾「火雞姐」和真身「Yanki」兩角，自問自答笑到噴飯。
■Yanki一人分飾火雞姐（左）和真身Yanki兩角，自問自答笑到噴飯。設計圖片
■短片「火雞姐搭巴士好X嬲」3日已勁吸逾百萬點擊。互聯網圖片
■現職舞蹈員的火雞姐昨日大跳性感電臀舞。
Y：Yanki 火：火雞姐
Y：點解你叫火雞姐？火：咁靚嘅女仔打機好少有，打機裏面我個名叫雙刀火雞，我都知唔會悶，不過想拍啲新嘢囉，我呢啲性格咁吸引，都想多啲人知道，所以用咗火雞姐嚟拍囉。
男士代出頭
Y：突然間咁多人share你啲片，你覺得原因係乜？火：因為我靚囉，因為我正囉，因為我講嘢好笑又有point，大家都好有共鳴，仲有一樣嘢囉，我勁嘛，啲人咪share我啲片囉。
Y：有冇試過喺街上咁鬧人？火：試過喺街心裏面鬧人，你知啦，同人有爭執好煩㗎，阻住晒我啲時間，我日理萬機好忙㗎，仲有人哋見到我咁靚，又唔好意思鬧我喎，搞到人哋咁尷尬為乜箒，每次都有正義男士為我出聲。
Y：Sammi都share你條片話你好搞笑。火：好開心，但係唔覺得出奇囉，因為我就係一個咁吸引人嘅人，人人見到我啲嘢都忍唔住share。之後，輪到火雞姐問真身Yanki，原來Yanki父母已離婚，她自細跟公公婆婆長大，中五未畢業已到無綫做兼職舞蹈員，之後認識了狄易達開始到天水圍、屯門教跳舞。
遭大叔抽水
火：有冇拍過拖呀？扮乜嘢箒？講啦。
Y：5至7次，每次都認真，中學生對於愛係乜嘢都未知，所以中學時拍拖次數比較多，而家就穩定啲。火：我成日搭巴士遇到好憎嘅人，你有冇試過俾人非禮呀？
Y：有次旺角做完嘢好夜兩三點，搭泥鯭的返屋企，自己坐前面中間位，隔籬係一個叔叔，佢不停挨落嚟，越挨越近真係成個掂落嚟，我好驚，好惡咁篤佢：「你可唔可以小心啲？」真係好嬲，佢一定係扮瞓，自己俾人抽水好激氣。採訪：皓騫 攝影：陳志嵐場地提供：Dancekingdom
來源:
http://hk.apple.nextmedia.com/entertainment/art/20160804/19721975