ZKIZ Archives


YouTube教結他 捧紅自己

2012-02-23  NM

不少人為了音樂夢不惜餓肚子,不過中五畢業的劉子瑋(Keith)卻是現實派,只愛彈琴玩結他,將興趣變生意,未成年已膽粗粗租鋪開班教學,二十歲 已進駐港島三個「死場」,開設三間教室Gigabite Plus。但每間賺到盡盈利僅一、兩萬元,為另闢財路,他自拍教學短片上載YouTube,策略性地將自己打造成人氣教師,七個月累積瀏覽人次達百六萬。 網民自動找上門,上月單是經YouTube收生的盈利已達四萬。


「好,我哋今日係要零音樂底子嘅你,四十分鐘就學 識彈《那些年》。首先要用capo(變調夾),夾住結他弦上嘅第五格,食指放去第五線嘅第一格……」Gigabite Plus老闆Keith經常凌晨在旺角好景商場的band房,對着鏡頭自拍教學短片,教的是入門技巧,卻是網上人氣教室。Keith自去年七月開始將教學 短片上載YouTube,至今近三百段短片,已吸引逾一百六十萬人次瀏覽,六千五百個追隨者「訂閱」,其中近期人氣電視劇《天與地》插曲《年少無知》,及 電影《那些年》的短片,觀看人次均超越七萬。 見一些歌曲人氣旺,Keith會漏夜拍片放上網,「無人識我間公司,網民亦唔會搜索公司名,但一搜尋《年少無知》,我條片就會顯示出嚟,咁就識到我。」 Keith笑言,除了以快打快,還會以量取勝,剛開始時,為了打響頭炮,一日內上載二十段片,之後每日增加兩段。初時不慣對鏡頭,他只用iPhone影着 手指拍三分鐘,後來粉絲愈來愈多,訂閱頻道的網民以每日逾三十人增長,並開始有要求,例如留言叫他教按C弦的基本手勢等,他因應意見調校及加強內容,片長 亦增至八至十分鐘,涵蓋電結他、木結他、電子琴、打鼓等。他又會吊觀眾胃口,將歌曲「斬件」上載,例如剛才提到《那些年》他便分成五段短片上載,吸引人訂 閱追看,結果一個月有二萬人點擊。

免費教學引新手
「上網睇YouTube學結他都唔係專業玩家,可能係啲網民用嚟自 娛或者溝女,呢啲對音樂有興趣但無認識嘅人好多。」Keith年僅二十三歲,明白年輕人心態,他將短片主題包裝成「溝死仔冧死女系列」、「必學情歌系 列」,又推出聽起來甚有難度的周杰倫《不能說的秘密》及陳奕迅《單車》速成版,吸引「目標為本」的後生仔注意。針對初學者,Keith會仿效補習天王教 學,「有啲人數唔到拍子,我會改用蝦•蛟•燒•賣•咁打拍子,又會指住結他講,呢嚿嘢有啲回音,係嗡嗡嗡,避開revert、delay等字眼,咁講係專 業,但初學者唔會知你講咩。」 免費教學只是餌,幫教室收生賺錢才實際。Keith見YouTube瀏覽人數近一百萬人時,便在短片加入宣傳字眼,例如斥三千元購買結他作抽獎,鼓勵人加 入公司facebook,「我喺YouTube盡量唔會太hard sell,吸引啲人入facebook先講課程收費,等YouTube保持免費頻道嘅形象。」據記者觀察,Keith課堂上沒有特定教材,學生想學周杰倫 《真的受傷了》,他便即時寫譜教學,遇上難明地方,他會叫學生用iPhone拍下,「拎返去睇,夠你玩一個星期。」上週六,他由早上十時教到晚上七時,以 每半小時收費一百元計,一日收入達二千,認真和味。

死場開教室
Keith力谷YouTube人氣,皆因他深明小店難 以發圍。Keith中學畢業後,在柏斯琴行做銷售員,一年後,和琴行同事阿段在紅磡以八千元租樓上鋪教音樂,「我未夠十八歲,由阿段去簽約。」開業半年, 僅收到三個學生,月入二千元,根本交不起租。Keith徹夜度「橋」,派傳單、聯絡舊同事轉介客人、流行曲速成班等,又試過整三文治,揹箱檸檬茶,到樓下 賣十元,吸客上樓學結他,「當然無人嚟,盤三文治食咗一星期。」他還試過在音樂討論區、論壇識朋友,每日返公司開MSN明為「吹水」實為吸客,「同三百個 人傾偈,得三個肯試堂,諗橋諗到人都迷失咗。」Keith笑言,沒收入時,在沙發底找散銀湊夠十元買叉燒飯。「自己捱無所謂,但阿媽經常鬧我唔知喺度做 咩。我好硬頸,雖然無概念點做生意,但深信肯諗辦法就會得。」 拍檔阿段較Keith年紀大,人脈廣,有替唱片公司作幕後彈結他,又認識黃子華《棟篤笑》的音樂總監羅金榮,便帶同Keith拍住上出席賑災慈善騷,替新 人幕後彈樂器,「夾band一日坐足六、七個鐘,呢啲騷都係無錢,當攞經驗,話俾人知十九歲做咗咁多嘢,會有說服力啲。」他獲黃子華賞識作配樂,四場騷每 場收五千元,○八年紅磡樓上鋪滿約,拍檔向作曲事業發展,他則堅持再開店教樂器賺錢。 過去三年,他先後在筲箕灣、柴灣及銅鑼灣開音樂教室,由於資本有限,只選擇租金數千元的「死場」。○九年在筲箕灣天悅廣場開首間教室,他形容時裝店、美容 院逢開必執,惟獨琴行生意例外,「我諗起中學被老師罰抄,有個名詞叫地區專業化,即係特定地區做特定行業,好似波鞋街咁。」趁暑假檔期,他以三千三百元租 下約八十呎的鋪位,為慳錢自己裝修,門面是落地玻璃,他一有空便在店內打鼓,吸引年輕人圍觀。暑期旺季,他以九百八十元共十堂收生,「好多阿媽逼個仔學 嘢,收十幾個學生唔難。」他奉行「慳家」開鋪原則,每一間鋪剛儲夠數萬元,便再找其他死場再開鋪,成功進駐柴灣及銅鑼灣的銅鑼坊。

爛出騷攞經驗
去 年初,他欲擴展至九龍區,以二千元租下尖沙咀尖東堡一個約八十呎鋪位,「點知商場完全無人流,生意死到仆直。」他每次資金是僅夠開鋪,一次挫敗,不敢再 搏。那時他檢視教室的生意,發現三間分店才賺四萬元,遇上考試季節便手停口停,「平均一間先賺萬幾蚊,我好勝,想壯大盤生意。」於是他請了六個兼職導師看 鋪,自己抽身找機會發圍。他不斷參加坊間的結他、作曲比賽,增加名氣。去年五月,參加歌唱節目《超級巨聲》卻在初賽已出局。他心有不甘,「我係有料到,唔 靠電視都可以出名。」兩個月後,自己拍片上載到YouTube成功闖出名堂。 他初時在旺角唐樓租band房收YouTube學生,兩個月賺夠兩萬元,才開設目前旺角好景商業中心的 YouTube網民學校,去年十月,首輪收生已達八十人,收費比其他分店貴一至兩成,「梗係收貴啲,我自己教嘛。」 YouTube收生成功,Keith照辦煮碗打本給女朋友在銅鑼坊分店替新娘化妝紮髻,先拍片上載到YouTube,並想出近七十種自選速成課程,分韓 式、日式髮髻,校園淡妝、十五分鐘極速化妝等,內容變化不大,名堂卻很多,「音樂頻道多人睇,都帶挈到化妝生意。」

窮苦生自學音樂
Keith 兩歲時父母離異,揸的士的爸爸離家時沒扔下分毫。媽媽做文員六千元月薪,要撫養Keith兩兄弟,還因聯名物業被釘契惹上官司,變得性格暴躁,「我同哥哥 有時睇電視睇得夜,佢走出嚟大鬧,有次仲攞埋菜刀。」大哥後來離家出走,從此沒音訊。Keith讀書時做兼職賺錢學琴,十七歲在琴行任職,請教琴行老師, 再自學。媽媽捱到崩潰,希望Keith打工有穩定收入,「我每開一間鋪,佢就鬧我,我唔敢返屋企,日日自己喺鋪頭錄音上網。」他表示,現在屬興趣班淡季, 每月營業額達四萬元算不俗,計劃年中在觀塘開一個二千呎錄音室,可夾band同出租,「好多人都用YouTube,但唔夠魄力,上載幾段就斷咗,依家我夠 人氣,要繼續食住呢條水。」Keith自信地說。

開業資料(10/2011,旺角店)
租金*:$16,800 裝修:$3,000 雜費#:$20,000 總投資:$39,800 *兩個月上期,一個月按金 #包括拍攝器材

營業資料(01/2011,旺角店)
總營業額:$49,300 租金:$5,600 宣傳:$3,000 人工^:$0 雜費:$700 盈利:$40,000 ^未計老闆人工

一點意見
在旺角西洋菜街賣唱的羅金榮(Wing)兩年前曾接受本欄目訪問,他身兼黃子華《棟篤笑》音 樂總監,自資出唱片街頭出售,月入一萬五千元。Wing ○七年認識Keith,認為他是一個識得用音樂搵食的人,「好多音樂人性格固執,覺得學生無天分唔教,但Keith會收咗錢先算,商業頭腦成熟。」他謂香 港不重視藝術創作,音樂人路難行,不出名的音樂人收入很少。 Wing指自己間中都會上載影片到YouTube,但看完Keith的頻道,覺得自己缺乏組織和計劃,「我有時叫自己Wing Lo、羅金榮、Wing,又沒將影片集中一齊,啲人睇完都唔記得我係邊個。」他暗嘆自己「郁得好慢」,沒積極宣傳,「間中網民搜尋黃子華的《藍天》先會搵 到我。」不過音樂造詣方面,Wing則認為Keith有待提升,皆因夾band有時走音、「甩嘴」,「不過佢後生,個人又有自我要求,應該可以進步更 多。」 Keith回應,「做音樂都要搵食,買支靚嘅結他都要使好多錢。」他敬佩Wing對音樂的執着,但他方向不同,會以發展公司賺錢為目標。 ####

PermaLink: https://articles.zkiz.com/?id=31432

Next Page

ZKIZ Archives @ 2019