ZKIZ Archives


師奶低成本開班 教影得意B

2012-04-05  NM

三十歲的梁家宜(Jenny), 年紀輕輕已有一個歲半的兒子。兒子出生後,她即辭去電訊公司工作做「湊仔婆」。為減輕丈夫養家負擔,Jenny度出一份既可「湊仔」又可賺外快的副業。她曾經「秘撈」在觀塘工廈開設影樓,幫大肚婆及兒童派對影相,一個月前決定「摺埋」影樓,轉型以包堂形式開班,教媽媽影BB相。這次,Jenny盡師奶「慳家」本色,用零租金的流動教室開班,同時落足嘴頭找商戶送贈品。過去一個月開了三班、共六堂,有充裕時間陪兒子之餘,還有二萬元落袋。


上週五晚,十九個透過討論區「親子王國」認識的年輕媽咪,來到佐敦儉德大廈約一千呎的樓上鋪,包堂上「開心派對攝影班」。導師Jenny先逐一點評學生事先寄來的BB相片,「嘩,呢張大頭相捕捉到BB嘅可愛樣,但敗筆係構圖剪咗個頭。」兩小時的課堂,用了一個小時點評相片和講「湊仔經」,一眾媽媽講講笑笑,像開派對多於上堂。她們都是十月媽咪會「小圈子」的成員,子女只有四、五個月大。搞手阿珊在雜誌看見Kidssha的介紹,便在討論區召集媽咪包堂。「開頭得七、八個人,我話十個人有九折,十五人送迷你心意卡,結果佢哋越叫越多人。」Jenny笑道。其實,Jenny並非專業攝影師,但中學時已喜歡玩菲林相機,曾到曬相鋪打工學曬相等,自學攝影技巧。據本刊攝影師觀察,Jenny講解快門光圈、調校光暗度等入門知識時,解釋得較清楚,但一講「Pan鏡」等較專業的名詞,就略為吃力。不過,媽媽們就算不明白都很少發問。「由auto學識轉用manual(手動)已經夠啦,千萬唔好教我太專業嘅嘢,我唔想知。」學生沈小姐說。是次攝影班分兩堂,每人收費三百六十五元,九折後共六千多元。第一堂教攝影須知,第二堂在四月中,Jenny以一千元租下一間畫室,包場開派對予家長實習。若帶爸爸、工人陪同,每人額外再收五十元,預計可再有一千元收入,剛好幫補場租。

零租金流動課室
Jenny是次教班場地由網站「攝影札記」(Photoblog)的老闆陳偉諾(Terry)免費借用,因此學費扣除畫室的租金後,已可全數落袋。零租金正是Jenny的撒手鐧,兩年前她「秘撈」在觀塘廠廈租單位開影樓,月租一萬五千元,於週末時接生意影相,怎知辛苦賺來不夠交租,一年要蝕四萬元。今年二月租約期滿,遇上打算開店的Photoblog老闆Terry上來睇鋪,對方後來在佐敦設店,並邀請Jenny開班,免租半年,「依家多咗女士買專業相機,Jenny的市場係媽咪,她開班可吸引到客人認識我間公司,我哋佐敦店賣好多攝影器材。」Terry說。由於Terry公司不適合予媽咪帶同BB來上堂,若另租影樓開實習班,不但位置不就腳,更要花錢布置,於是她想到租畫室包場開派對。「最緊要有噱頭,好像派對攝影、相冊製作等。」Jenny指另一免費課室是屋苑會所,甚至公園等。萬一要租場,亦有農莊等選擇,既好玩又有噱頭。「搵一啲媽咪都會帶BB去嘅地方,佢哋更加有投入感,我又唔使俾租金同租約綁實。」Jenny笑說。

主攻媽媽會
最難是搵客,Jenny指要先鎖定坊間不同的嬰兒網站及嬰兒用品公司,媽媽會員最集中。三年前準備開影樓時,她已在「親子王國」鋪路搵客,「網站有好多不同年份及月份的媽媽會,佢哋會組成不同的小圈子,分享湊仔經,或搞生日派對,而搞手通常登出電郵地址,叫人報名。我就寄電郵自薦幫佢哋免費影相,好多媽咪都會落疊。」Jenny得意地說,這類「義工」,斷續地做了兩年,儲下大量媽媽的聯絡資料。每次搞完派對,她都會定期寄電郵作宣傳。另外,在太子賣BB用品的BB Care,有個由會員組成的媽媽會,「佢哋起碼有二萬個會員。」Jenny曾自薦開班教影BB相。身為師奶的Jenny知道師奶喜歡「攞着數」。早前,她說服相冊公司UBabyBaby老闆,以七折為其相冊班印製相簿,「原價二百三十蚊一本,我用一百五十蚊入貨,四百元一堂包相簿,媽咪都覺得抵。」結果該堂有十多人參加,賺約二千元。最近,有間天然嬰兒軟膏公司見到Kidssha在荷花集團旗下雜誌的訪問,主動贊助贈品予攝影班媽媽,「我以前試過隻軟膏好用,跟住搵佢哋送贈品,點知佢嫌我公司細唔睬我,依家就主動搵我話做主要贊助商。」這次到Jenny反客為主,「我未應承呀,上次做義工時識到美國護膚品名牌Kiehl's市場部嘅人,我想試吓同大公司傾吓先。」

狂做義工打關係
半途出家做攝影師的Jenny,知道家長最看重「學歷」,即工作經驗。為省靚招牌,Jenny狂做義工儲履歷。兩年前,她無意見著名攝影師葉青霖的攝影義工隊於網上招募義工,便寄信報名,「佢哋一年招募一次,面試要交三張以愛為主題嘅相片,面試時每十個人一組答問題,我好想加入,不時舉手搶答,結果揀中我。」義工隊規定隊員每年至少出席三次活動,Jenny做夠十次。由於Jenny活躍於義工隊,其他慈善機構如愛滋寧養會、善導會、奧迪搞活動須找義工拍照時,都會找她,Jenny後期索性以公司名義做義工。做義工除了儲經驗,還有是可以「黐」明星。上週日愛滋寧養會在山頂搞步行籌款,明星如方力申、湯盈盈、錢嘉樂等,Jenny一有空檔就走上前和明星拍照,之後再把活動及與明星的合照放上Facebook及公司網頁。最近,明星姚嘉妮透過朋友介紹,認識了Jenny,請她四月中替女兒生日派對影相,姚嘉妮在電話訪問中說:「我請咗方中信、郭晉安等嘅仔女來開派對,想搵個信得過嘅人,唔會洩露我哋啲相。Jenny冇收我錢,佢第日有咩幫手宣傳,我都會出席。」Jenny回應時指,她看中的是長遠客路,「今次就算收都係幾百蚊嘅友情價,寧願唔賺住,攞個好印象先。況且咁多明星去,話唔埋方中信個女下次開派對,又請我去影呢。」Jenny雀躍道。

單靠影相難鬥賤價
Jenny教班的想法源於一次去playgroup,見到很多媽媽拿着單反相機狂影BB,但用的卻是自動模式。「我都係媽咪,知道影小朋友有咩難度,例如佢哋唔望鏡頭,我就教媽咪係鏡頭上綁個公仔同啷啷,吸引BB。」IT出身的Jenny,自己寫網頁、寫blog,並在YouTube開設頻道,拍片作網上教學,三百六十五元任看一年,每月更新,兼送一堂真人教學。之前做影樓,有時更要拿積蓄來貼租金。現在教班的工作較影相更輕鬆,只做了一個月,已穩賺二萬元。Jenny希望將盈利儲下,日後有穩定的客源後再考慮開鋪及請員工幫手開班,另外亦希望發展公關生意。「我最大本錢係人際網絡,除了不同攝影團體,仲識咗好多慈善團體,依家大公司鍾意搞義工隊同關懷社會嘅活動,我可以做公關,幫佢哋搞活動,賺大機構嘅錢。」 ####


PermaLink: https://articles.zkiz.com/?id=32367

Next Page

ZKIZ Archives @ 2019