ZKIZ Archives


中環在線:簡文樂十幾歲就鍾意支解 李華華

2008-04-15 AppleDaily



唔 少商界富豪細個都捱過世界,冠軍科技(092)主席簡文樂(圖)係其中一個,咪睇佢家吓身家豐厚,又係大馬主,原來佢細個嗰陣,同好多人一樣都試過喺街度 排隊輪米。佢話喺50年代出世,當時戰後冇耐,糧食短缺,唔係有錢就一定買到嘢食,家家戶戶都要配給,佢細細個就拎住「米票」去買米,屋企有7個兄弟姊 妹,買得米嚟,就冇乜錢買餸,餐餐都係得一兩碟餸咋。

喺咁嘅環境下,當時讀天主教學校嘅簡文樂一心諗住大個做神父打救世人,點知因為朋友嘅幾句說話改變主 意,後尾仲信埋佛教。簡主席話:「朋友知我想做神父,就話我未見識過呢個世界,最緊要係連女仔都未識過,拖又未拍過,第日有人因為感情事要你輔導,咪撞 板!」年少嘅簡主席,聽到呢番話覺得好啱,所以放棄做神父。

到咗十幾歲佢迷上科技,屋企嘅收音機、洗衣機,都逃唔過俾佢「支解」嘅下場。60年代末,佢見 到當時嘅政府請人寫電腦程式,仲有在職培訓,未學過電腦嘅佢,膽粗粗走去報考。佢話:「當時有幾千人考,主要考IQ同計數,我唔單止考到,仲係第二名。」
PermaLink: https://articles.zkiz.com/?id=738

Next Page

ZKIZ Archives @ 2019