ZKIZ Archives


演唱會自揭追仔50歲陳慧嫻想拗直攣男

1 : GS(14)@2016-03-06 16:12:11

■陳慧嫻在演唱會分享媾仔經歷,找到目標卻撞板遇上攣男。


陳慧嫻一連4場的演唱會前晚在紅館開鑼,她將場館打造成紅磨坊佈局,更罕有地性感出場。少有談及愛情的陳慧嫻談到最近打算主動出擊追男仔,可惜卻遇上不可能的任務,原來對方是一名男同志。以百變形象示人的陳慧嫻,先後有阿拉伯造型、天使造型及百老匯舞台服亮相,更在台上表演極速換衫。唱到中段時表演嘉賓李克勤出場,兩人對唱克勤的名曲《月半小夜曲》,之後在台上擁抱。接着陳慧嫻再唱出陳奕迅的《重口味》及欣宜的《你瘦夠了嗎?》,但當唱到自己的首本名曲《儍女》時,台上放出煙花,受到煙霧所嗆,令到她少有地甩嘴。在台上跟fans的讀白中,陳慧嫻提到合作已久的監製病重時,一度感觸落淚,要由工作人員遞上紙巾。



■克勤成為首場嘉賓,與陳慧嫻合唱《月半小夜曲》。

■陳慧嫻形象百變,換了多套舞衣。

■提到病重的監製,陳慧嫻一時感觸落淚。


■(左起)李克勤、盧淑儀及陳奕迅等到場支持,起身拍掌場面熱鬧。

主動出擊撞板

不過陳慧嫻亦有輕鬆一面,她提到近日有「新對象」,她說:「對上一次分手已經係10年前嘅事,呢10年冇搵到過鍾意嘅人。近幾個月卒之見到個有感覺嘅靚仔,佢嘅類型就係我12歲時鍾意嗰種,陽光男孩好貴氣,好似陳百強嘅公子哥兒,又有才華。」自言已經50歲的陳慧嫻表示要主動出擊,在一次約會中大膽問到對方有沒有女朋友,她說:「佢話冇女朋友,不過有男朋友。估唔到10年冇開齋,一開齋就遇到個mission impossible。」表現豁達的陳慧嫻笑言今年51歲生日,不會再像往年般避忌只點一支生日蠟燭。採訪:張俊銘 攝影:沈健程





來源: http://hk.apple.nextmedia.com/entertainment/art/20160306/19518162
PermaLink: https://articles.zkiz.com/?id=297023

慧嫻個唱揭戀上攣男鄺祖德衝出嚟認

1 : GS(14)@2017-03-23 06:27:23

現年51歲嘅陳慧嫻,有學識、有唱功,眼大大又靚女,事業很OK,但情路硬係多波折,眾所周知,喺佢仲做緊歌手嘅年代,戀上唱片監製歐丁玉,可惜慧嫻於1990年要去美國讀書,同歐丁玉分手收場,結束6年情。畢業後回流返香港嘅慧嫻,喺1995年戀上因工作關係認識嘅形象設計師張卓文,可惜呢段情又係拍咗6年後劃上句號。慧嫻後來喺受訪時提到同張卓文分手後,試過患上焦慮症。有指慧嫻因焦慮症求診時,認識主診醫生謝國麟,其後共墮愛河,但到06年兩人決定斬斷5年情絲,慧嫻甩拖後一度情緒不穩兼暴肥。到前年6月,慧嫻參演填詞人潘源良「最愛潘源良是誰作品展」時向對方自爆:「我80年代係暗戀過你。」嚇到潘Sir譁然:「80年代上世紀。你早響嘛!」不過,要數慧嫻最「出位」嘅一段「戀情」,係佢舊年喺紅館舉行個唱時,自揭dry足10年終遇上心儀對象,已屆半百嘅佢鼓起勇氣直接向對方求愛,點知遇上攣男,慧嫻當時直言:「聽到嗰一刻猶如晴天霹靂!10年冇開齋,一開齋就遇到Mr. Impossible!」原本慧嫻冇開估,都冇咁快有人知道Mr. Impossible嘅身份,點知男歌手鄺祖德就衝出嚟「自首」,佢喺自己個fb打破沉默,以大篇幅回應,並直認與慧嫻拍過拖,但有感雙方年齡相距太大(鄺祖德細過慧嫻12年),加上家人有意見,所以決定分手。仲講到慧嫻開騷期間,佢亦特意同家人去法國滑雪,似係避開女方。不過鄺祖德呢番回應,換嚟慧嫻話佢「無厘頭」,網民亦批評鄺祖德冇口德,更加人指鄺祖德喺戀情「曝光」之前,仲喺社交網交貼佢去探慧嫻班嘅相,擺明係借女方宣傳。




來源: http://hk.apple.nextmedia.com/entertainment/art/20170322/19966338
PermaLink: https://articles.zkiz.com/?id=328387

Next Page

ZKIZ Archives @ 2019