中環在線：11月推微淘 開發社交網 馬雲擸刀開戰
1 :
GS(14)@2013-10-30 11:21:36http://hk.apple.nextmedia.com/financeestate/art/20131030/18485168
網絡世界真係一日都算慢，上星期阿里巴巴創辦人馬雲喺杭州總部形容，挑戰騰訊（700）旗下微信，只係出動小棍子，下月會拿出菜刀。馬雲原來唔係虛張聲勢，阿里日前宣佈，本周五（11月1日）向4億「手機淘寶」用戶開放新頻道「微淘」作公開測試，真係擸刀喎。
微淘係乜東東呢？據了解，大家除咗可以喺微淘買嘢，更重要係可以同朋友share，例如你喺微淘買咗件衫，可以喺平台同買咗同一件衫嘅買家交流，成為一個社交圈子。用戶除咗可以分享購物心得，亦可以like人哋嘅心得。係咪越講越似facebook呢？
連繫淘寶及來往
馬雲上月推出嘅「來往」已經擺明挑機微信，而家推呢個微淘，明顯希望透過推出類似facebook嘅平台，吸客入手機淘寶，呢個平台又可以打通「來往」，總之就希望用戶登入阿里嘅手機平台之後，可以辦晒所有事情。
呢個情況真係似曾相識，香港人買樓、落超市買嘢、打電話、開燈、開冷氣，全部都有機會畀錢長和系主席李嘉誠賺，難怪馬雲封李嘉誠做偶像啦。地產界有「深圳李嘉誠」、「重慶李嘉誠」，睇來馬雲將來可能變成「網絡李嘉誠」喎。
馬雲仲比超人進取，聽聞阿里已經同中移動（941）、聯通（762）傾掂數，兩間電訊商嘅手機用戶用淘寶、「來往」、微淘產生嘅流量資費，一律由阿里包辦，用戶免費，條橋拍得住電訊商畀手機補貼。