ZKIZ Archives


搵米講米 左丁山

2011-10-09  AD

以往要搵工,必定在星期六揸住份南華早報 Classified,逐頁揭,睇吓呢份「搵米報」就可估計香港之失業率,但依家失業率低到 3.2%,南早搵食報唔見有厚咗噃,幾個月都係咁,唔通嗰啲招聘廣告已經上晒網?
呢 日碰到一位公關阿姐,佢話做得好辛苦,搵幫手成日搵唔到,即使有不少人見工,佢都覺得中英文程度不合乎佢嘅奄尖要求。左丁山多口問一句:「搵米報唔見你嘅 招聘廣告嘅?」公關阿姐話:「唉吔,我請助手、手下,冇資格登搵米報呀, HR頭頭唔准我登,話 80後 90後唔睇報紙,只睇網,故此我地嘅招聘廣告通通在互聯網上,不在報紙。 HR規定只有聘請經理級以上,需要較成熟人士應徵嘅職位,先至准在報紙刊登廣告。」
問吓肥仔K呢位 80後是否如此,佢話:「我啲朋友搵工冚扮爛上網搵嘅啦,邊度有睇報紙㗎!」原來如此,經營報紙又少咗一瓣搵銀廣告,要從網上補回,個網唔掂就睇住生意流失。
公 關阿姐所屬集團經營不少生意,老闆私人集團方面,連大米都有入口批發。講開搵米報,就同佢講埋食米價錢不斷升,泰國新總理仁樂競選時應允推高農村收購食米 價格,必然帶動泰國米價上揚,公關阿姐話:「此乃事所必然,泰國農民得益,誰人付鈔,當然係消費者啦,你食泰國米,咪當施恩惠於泰國農民囉。四面佛會保祐 你!」係就好咯,但一般市民、平民捱貴米,唔會當做好事咁輕鬆,負擔唔嚟,點算好?
一位泰國米商後來對左丁山講:「係有平民難捱貴米嘅,市面上已 出現溝米,即泰國米與越南米溝埋一齊,比例係一個秘密,總之愈係便宜嘅泰國米,愈係溝咗不少越南米,最貴泰國米可能就係純正泰國米,內無越南米!或者你已 經食過啦,酒樓食肆多用越南米或泰越米兩溝,你食唔出啫!」咁又係,自問食飯分唔出越南米還是泰國米,不過日本頂級靚米就一定食得出,肥仔K識得日本人入 口純正北海道米,用之煲飯,真係無得彈,但係價錢太貴咯,偶一為之方可。

PermaLink: https://articles.zkiz.com/?id=28516

Next Page

ZKIZ Archives @ 2019