ZKIZ Archives


嚴磊輝呻「搵唔夠」


2013-04-18  NM
 
 

 

貴為HIT董事總經理嘅嚴磊輝,年薪千五萬,一個水上姑爺要做一百年先有咁嘅薪水,但佢老哥仲同老友呻,家陣搵嘅錢唔及以前咁和味。嚴磊輝咁值錢係有原因嘅;九十年代,佢喺Jardine Fleming跟羅慧娟老公,來自新加坡嘅劉志敏學師時,正值怡和系內公司大重組,繼遷冊百慕達之後,怡和再分別轉到倫敦同新加坡作第一及第二上市,從九四年起怡和撤銷香港上市地位。當時金融市場上搞遷冊,到海外上市嘅人才唔多,就係咁嚴磊輝成為搶手貨。

和黃港口信託前年喺新加坡上市,公司即從希慎翻兜嚴磊輝坐鎮,除咗睇中佢熟悉新加坡金融市場,會唔會仲貪佢來自Jardine Fleming呢?在新加坡掛牌的置地,九七年曾一度獲誠哥垂青,掃貨至4%;如果誠哥對置地未死心,嚴磊輝應該仲有運行喎。

Give me a break最豪廁 「去」得奔放

香港高級食府唔少,但肯揼本整靚個廁所卻唔多。好多中環人去食飯嘅尖沙咀半島酒店廿八樓Felix Bar,可以話係全港最豪華嘅廁所,呢個出自法國設計師手筆嘅男廁,尿兜由雲石打造,小宗站於落地玻璃前如廁,可俯瞰九龍景觀,實在有「大地在我腳下」嘅氣派,仲有「飛流直下三千尺」嘅暢快之感。不過酒店都有考慮客人私隱,所以加番高身少少嘅板遮擋。英國作家Luke Barclay寫咗本《廁所景觀大全》,世界第一廁係美國華盛頓北喀斯特國家公園,用家喺開放型馬桶上如廁,同時欣賞巍峨雪山嘅山脈。香港嘅Felix Bar有幸排第六,難怪小宗方便時,見到有遊客係咁影,鬼死咁尷尬。廁所級數有番咁上下,所以酒店規定,如廁者,拖鞋背心免進!

永泰廿億賣祖屋

永泰去年賣殼予萬科後,令市場譁一聲。近來又有傑作,鄭家三公子鄭維強叫天價三億坡紙(約廿億港元)放售鄭氏祖屋。永泰亞洲創辦人鄭翼雄,喺深水埗做製衣起家,後來到星洲發展地產,離世前一直住在這大屋,直至○四年在家去世,鄭家更跟足當地習俗,為防先人「迷路」在家設靈。對於香港人來說當然「大吉利是」,不過當地經紀話鄭翼雄乃星洲巨富,就算喺屋內離世亦無人怕,啲人最驚嘅都係鄭維強嗰口叫價。雖說Nassim Road好近植物公園,而且轉個彎就到購物熱點烏節路。之不過去年二月的成交價,都係二千銀呎坡紙,但鄭維強的叫價卻逾三千五百銀坡紙,貴足七成七!仲有,好似呢啲別墅,喺星洲叫free-hold land,係唔賣得俾非星洲公民,咁又少咗一批潛在買家嘞。下月截標,若有願者上釣,真係嚇死唔少坡佬喇。

燈神決戰金價之「癲」

塞浦路斯話要賣金還債,美國又嗌收水,嚇到金價一個星期內跌咗成千蚊港幣。另一邊廂,日本「紮行馬」印銀紙,好多「o架妹」即刻賣曬屋企嘅金條,換番啲Yen傍身及消費。白銀戰隊隊長孫柏文就話:「人人都賣金,係見底信號,買!」佢覺得白銀會跟黃金在三年內升四倍,仲話佢屋企有成三個大喼嘅白銀。之不過,佢老友沈振盈聽到,就標曬汗:「你同我祝佢好運啦,我好擔心佢,黃金已經進入熊市,會跌到去千一美金,佢今鋪真係好大鑊!」之但係,兩位都係出曬名嘅燈神,今鋪信邊個好呢?

金牙大狀講嘢永遠的空櫈

林奮強卒之就佢行會成員地位開聲,表示冇時間表復職,亦冇打算請辭,即係維持原判無限期休假。咁都得?試問香港有邊份工係一開波即無限期休假,更莫說係行會成員咁吃重嘅任命。林奮強喺舊年七月一日加入行會,四個月後喺十一月二日開始無限期休假,於今五個幾月矣。即係佢休假時間已經長過佢服務行會嘅時間矣。呢五個幾月嚟,行會繼續每個禮拜開會,林奮強休假顯然並無對其運作造成負面影響。此又不禁令人要問,行會係咪真有需要林生嘅參與先?如果係,咁點解俾佢無限期休假?如果唔係,咁又點解俾林生孭住個行會成員括弧無限期休假嘅招牌喺江湖行走?行會成員從來只有一個功能,就係為香港人嘅福祉出謀獻策。無限期休假中嘅林生顯然唔可以履行呢個責任,既唔填補林生嘅空缺,又唔叫林生借歪等第二個人頂上,梁振英真係有心幫香港人做嘢?唔似囉!

PermaLink: https://articles.zkiz.com/?id=54618

【iPhone7殺到】港攝影師作品「榮登」Apple盛會 搵唔搵到你自己?

1 : GS(14)@2016-09-09 05:42:55

如果你有留意Apple發佈會的話,應該都會發現到內裡有不少於香港拍攝的照片,當中一張是在天水圍,一眾精靈訓練員在玩《Pokemon Go》時的圖片,而這張圖片正正是由香港攝影師林亦非的作品,能夠「榮登」Apple的盛會,林也在自己的Facebook專頁分享了此圖,大家如果有去過天水圍捉精靈,又找不找到自己呢?另外發佈會上亦有其他香港的照片,分別是卜公公園及旺角花園街(應該係,除非唔係)的地方拍攝,雖然未知相關攝影師的身份,不過亦足以顯示出香港的確非常美麗,就連Apple都要用作試影呢!記者:方健銘


能夠「榮登」Apple的盛會,香港攝影師林亦非亦在自己的Facebook專頁分享了此圖。

發佈會上Apple亦展示出了一張應該是旺角花園街的試拍。

連卜公公園亦有份。



來源: http://hk.apple.nextmedia.com/su ... t/20160909/19765012
PermaLink: https://articles.zkiz.com/?id=308398

【母女對調3】阿女逆齡扮阿媽 買漏葱倒瀉湯搵唔到鑊鏟

1 : GS(14)@2017-05-18 02:14:52

母女調換身分,由女兒Jace洗衫抹地煲魚湯,陳媽媽笑言:「試過你就知味道!」

阿女逆齡扮阿媽 洗衫抹地煲魚湯

買餸、煲湯、洗衫、抹地,這些似乎是「係阿媽至做」的事,換作由平日衣來伸手、飯來張口的女兒負責,結果會怎樣呢?「我覺得會善後得好辛苦。」只見陳媽媽嘖一聲,反了個白眼,「會好混亂,要抹廚房,好辛苦咁做多次。」彷彿腦內已滿是女兒手忙腳亂快把廚房炸掉的畫面。陳媽媽雖非全職家庭主婦,家務卻由她獨自打理。她笑言丈夫和女兒Jace是「妲己」,「好似癱咗咁坐喺度唔郁!」於是,今次她藉着與女兒交換身份的機會,安排了三項任務給Jace完成,無非想女兒明白:「唔好成日倚賴阿媽啦,阿媽都好攰㗎!」



陳媽媽給Jace的三項任務,皆為她平日獨自負責的事。

第一任務是行街市買餸,媽媽提示要和檔主溝通,也可用平價買到靚貨。

第二任務是煲魚湯。Jace在廚房手忙腳亂,不禁慨嘆為何平時阿媽教煲湯時不聽書。

第一項任務是去街市買白鰂魚。陳媽媽邊寫任務紙,邊露出一抹「今次仲唔死」的奸笑,「咪以為好易啊,其實我都唔識揀靚嘢。去到街市要有禮貌同檔主溝通,佢哋就會幫你揀靚嘢。」Jace甫接過任務便一臉疑惑,「白鰂應該係魚吧?我連白鰂係點樣都唔知,試試吧。」平日甚少下廚的Jace,曾陪同媽媽去街市買餸,知道菜檔、魚檔的位置,中途雖忘了買葱,不過正職為主持的她發揮親和力,哄得菜檔主買薑搭條葱之餘,更從魚檔主那兒取得煲魚湯貼士,成功買齊材料,返家煲湯!不過廚房才是真正戰場,「我媽唔鍾意我行入呢個範圍,就算我會煮某啲餸,佢都會話:『你都唔識,等我嚟啦。』佢覺得我會搞到個廚房好混亂。」看來Jace確實了解媽媽的擔憂,而陳媽媽也確實了解女兒。只見Jace不但忘了買必備的魚袋,更倒瀉熱湯、弄掉番茄、被熱油燙到,在廚房內尖叫連連,「我媽見到咁樣應該會擰晒頭。」



第三任務是洗衫抹地,除消毒液似乎倒得太多,其他總算做得有板有眼。

Jace很了解媽媽口是心非的個性,「佢飲完魚湯一定好多嘢講,可能佢內心好開心嘅,但唔會係行sweet嘅路線。」

至於最後一個任務洗衫抹地,相比下似乎容易得多。陳媽媽投訴Jace經常更換衣服,卻不幫手清洗,讓她一日要洗兩三次,「好誇張!何況晾衫都係一門學問,所以等佢洗次衫,就唔會再換衫換得咁密。」只見Jace一手抽起洗衣籃,將衣服放進洗衣袋分類,似乎做得有板有眼。話口未完,她盯着消毒液沉思,低聲說:「唔理喇,就咁啦。」就直接把消毒液灌進洗衣機,盡顯豪氣。嗯,腦海裏已想像到那陣濃烈氣味。「叮噹!」是媽媽回來檢驗成果的時候。Jace把魚湯裝進暖水壺,原來這是平日媽媽為懶得翻煲湯水的Jace和爸爸常做的事,「佢煲好湯後,一係我哋即時喺屋企飲到,一係通常我都唔喺屋企,所以佢會裝入暖水壺,等我夜晚返到屋企用暖壺飲熱湯。」盛起熱騰騰的湯,撲鼻而來一陣魚鮮味。陳媽媽嚐了一口,初步給予正評:「齋飲湯唔睇過程都算合格,不過過程乾唔乾淨就唔知啦!」讓媽媽翻看過程,阿媽說女兒怎會用鉗煮魚,女兒反駁說找不到鑊鏟,阿媽沒好氣道:「你睇你幾愛呢個家,鑊鏟放喺邊都唔知!」你一言我一語,十足冤家打情罵俏,笑聲此起彼落,好不熱鬧。想起女兒事前預想媽媽的反應:「佢一定好多嘢講,可能佢內心好開心嘅,但唔會係行sweet嘅路線。」這次扮媽媽後,應該體驗到做媽媽的辛酸了吧?Jace卻搖頭稱否,「我做一次咋嘛,抱住玩樂心態,當然覺得好玩開心,但媽咪每日都做同樣嘅事,咁多年都係,我係唔會明白嗰種不斷重複做嘅辛苦。」女兒擔心自己和爸爸經常工作至夜深才返家,獨留媽媽做完家務看電視,讓她倍感寂寞。陳媽媽卻一臉不以為然:「OK嘅,我會自娛㗎嘛!」女兒的豪氣爽朗,明顯深得媽媽真傳。從前母親節,Jace甚少送禮,卻總會畫下心意卡一張,送給媽媽,陳媽媽開玩笑道:「係呀佢好孤寒㗎,送呢啲要使錢呀嘛。」Jace續說:「心意嚟㗎,有無搞錯。」媽媽遂認真道:「係,物輕情義重,好多人好羨慕。」今年母親節,有甚麼想和媽媽說的?Jace一手搭着媽媽膊頭,撒嬌說聲:「媽咪I love you。」媽媽點了點頭,仍是慣常的一臉冷酷,別過頭道:「得㗎啦,收到。」心裏應開出花來。記者:封愷瑜、鄧天蔚攝影:張志孟、蕭志南2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170515/20021452
PermaLink: https://articles.zkiz.com/?id=333418

【《蘋果》專訪】「呢十年,我搵唔到錢!」樂瞳心灰離無綫

1 : GS(14)@2017-06-18 21:45:05

■32B樂瞳希望以打女闖影圈,只要拍得夠型,她不介意少少性感。攝影:沈健程



無綫近年小生花旦不停流失,現年30歲的樂瞳,前日完約決定向外闖,07年加入無綫的她,奉獻最寶貴的十年青春,卻賺不到錢而心灰離場。樂瞳有意由公仔箱轉投大銀幕,希望演技得以發揮,曾做過三碟歌手的她也恨再戰樂壇,為自己訂下三年計劃:「我好勝、任性,試過先心息,我輸得起!」



女人青春有限,現年30歲的樂瞳,07年加入無綫,轉眼已打滾十年,前日完約的她義無反顧離開。樂瞳日前在將軍澳接受本報專訪,講到在無綫十年得與失,她劈頭就說:「呢十年,我搵唔到錢!」樂瞳續說:「但我得咗『樂瞳』呢個名(本名龔茜彤),同觀眾嘅愛戴。好多人喺街走埋嚟,話鍾意睇我做戲,我賺咗呢啲,但失咗我嘅青春。我最寶貴十年都喺公司,當年喺公司係妹妹仔階段,?家妹妹仔成熟咗,跳出嚟係淑女。」樂瞳強調要做「窈窕淑女」,而非「熟女」,所以仍要努力減肥。


自認任性

回帶樂瞳在無綫十年光景,最為觀眾印象深刻是11年參演《點解阿Sir係阿Sir》,她飾演反叛學生妹彈出,更被追捧成「宅男女神」,算是事業一個高峯:「好多人因為呢個角色認識我,如有另一角色令我再有高峯,我都會做好佢。」雖然樂瞳其後在劇集《當旺爸爸》、《護花危情》及《回到三國》等都有突出表現,但礙於未受無綫力捧,她承認過去不擅爭取機會。拍完最後一套劇集《平安谷之詭谷傳說》就決定離巢,樂瞳強調是深思熟慮:「公司十年有感情,但都想出去試吓自己能力,可唔可以喺電影圈發展,我係好勝、任性,試過先心息,我輸得起、跌得起。」樂瞳出道做過歌手,發展無疾而終,回復自由身的她當然想再在歌壇復活:「好多fans留言想我唱番歌,?家都有公司接觸同我出碟,我想有代表作,有機會開音樂會。」樂瞳憧憬影歌視依次序發展,她說:「未試過電影圈,我想將心力放多啲呢個範疇,跟住唱番歌,電視擺最後。拍戲我想挑戰做打女,唔介意少少性感。」樂瞳甩約馬上成搶手貨:「有幾間新公司傾緊,但要學多啲嘢裝備自己。我唔年輕,想呢行再放多三年時間,會逼自己做晒唔會後悔嘅嘢。」



■樂瞳11年於《點解阿Sir係阿Sir》演反叛學生妹彈出,算是她事業高

■笑容甜美的樂瞳,自爆被五名裙下之臣熱烈追求。

■前年樂瞳被本報讀者影到與富二代蜜遊泰國,但她卻稱現正單身。資料圖片


雪卵生仔

除緊張事業,樂瞳都等愛,前年被揭搭上金融才俊阿希,去年有報道指她戀上富二代David,入住千萬豪宅,有指她太高調令戀情畫上句號,訪問當日,她卻強調單身。樂瞳預告再投放三年發展演藝事業,莫非到時等嫁?她坦言:「隨緣,我年紀唔係輕,都想有自己家庭,唔想做高齡產婦。」樂瞳謂友人都熱烈討論雪卵子,她坦言考慮過:「我仲可以等多幾年。」她自爆現有追求者:「五隻手指數得晒,了解緊。」採訪:陳杰服裝提供:Mzjj


■樂瞳正努力keep弗,朝窈窕淑女目標進發。

■樂瞳憑劇集《陪著你走》入圍角逐15年無綫最佳女配角。劇照

■樂瞳自認任性,直言再給自己三年時間於娛樂圈發展。



來源: http://hk.apple.nextmedia.com/entertainment/art/20170616/20057281
PermaLink: https://articles.zkiz.com/?id=335893

Next Page

ZKIZ Archives @ 2019