2010-9-28 AD
|
||||||
|
正所謂衰開有條路，賣洗頭水賣到上市嘅霸王集團（1338），早排爆出二噁烷風波，消費者一聽到話洗頭水有致癌物質，點會唔驚，霸王7、8月嘅銷售立即大插水！ 啱啱先話情況有啲改善啫，今個月頭又再有兩款產品，俾國家食品藥品監督管理局捉佢虛假宣傳，話佢聲稱自己「堅固髮根，韌髮防落」有問題，搞到又要停牌澄清。 所以話，做消費品生意，品牌、商譽係最最緊要，一旦出事，真係有排修補o架！ 不過，霸王嘅老細陳啟源勝在做人夠樂觀，佢話可以化危為機，仲繼續大力推銷旗下嘅新產品。 中國區總決賽指定護膚品 公司噚日就宣佈，旗下嘅護膚品品牌本草堂，贊助咗第60屆世界小姐中國區總決賽，成為大會指定嘅護膚品，仲為啲佳麗搞咗個中草藥美容護膚課程，教吓佢哋點樣可以散發「中國美」。 其實霸王最鍾意就係搵大明星做代言人，好似霸王洗頭水有「動L」成龍；最新產品霸王凉茶就有全宇宙最好打嘅甄子丹；本草堂嘅代言人都唔弱，係天后王菲。 今次出動埋世界小姐，究竟霸王嚟緊可唔可以成功洗底？華華拭目以待！ 李華華 |
||||||