ZKIZ Archives


李卓人 方約恆 延續廿年男人浪漫拍住上搞智庫

1 : GS(14)@2016-10-10 04:25:02

■擔任議助廿載的方約恆(左)笑指李卓人「唔係好老闆」。邱仲權攝



【本報訊】立法會新界西選舉結果出爐後,敗選的李卓人哭成淚人,「本來我冇嘢㗎,一見到佢我就喊……」引淚人是方約恆,當日同樣哭紅了眼。1996年開始協助李卓人,前後夾攻20年;回歸前通過集體談判權,最低工資立法成功闖關,方約恆一直是李卓人背後的男人,直至李敗選始走到台前,攙扶老闆離場。廿年情緣不會就此煙消雲散,兩人稍後在智庫再續情緣。男人的浪漫,豈止豆腐火腩飯?雖然方約恆說,「佢唔係一個好老闆!」記者:許偉賢



■上月於立法會新界西敗選的李卓人,在方約恆攙扶下離場。

邀約於咖啡室訪問之時,方約恆不知李卓人會中途出現,「咦,點解你會喺度嘅?」問號配上的卻是依舊的冷靜。「佢成日都喊㗎喎……」50歲的方約恆續以淡然腔調,回應老闆因他「流馬尿」,「我就好少喊,但嗰時,真係㩒都㩒唔住」。方約恆畢業於香港大學社會學系,兼是研究生,好端端的公務員鐵飯碗不要,連搵真銀的商界也沒興趣,於1996年在蔡耀昌介紹下,選擇到劉千石、李卓人、梁耀忠及曾健成的聯合議員辦事處落腳,「呢個係我一生中最錯判嘅決定,哈哈」,碰巧李卓人同年要趕在立法局提出集體談判權法例,雖是新丁但仍獲派赴英,與協助英國撰寫此例的劍橋教授研究如何將法例在港適用。


爭集體談判權 最低工資


方約恆憶述此行磋商,教授打了兩通長途電話給李卓人之後便拍板定稿,草案最終竟然獲通過,方笑稱:「都有啲成功感嘅,咁都過到。」縱使最後被廢法,但也成了香港歷史。其後的最低工資立法,一爭長達10年;開波之初,方約恆曾想轉工,「覺得自己年紀唔細,再唔轉,留喺度變庇護工場咩……而且1997年後私人法案近乎冇得做,冇約束力嘅議案齋吹水,覺得冇乜突破可以做到」。出走,卻純粹是念頭,加上最低工資開了頭,「都想搞埋先」。結果方約恆議員助理身份維持長達20年,直至上月選舉主任宣佈李卓人落選,「當時真係冇諗自己份工點,點都唔死得嘅!」「選完之後,最先諗嘅梗係佢。」李卓人說來不無歉意,議員助理待遇一直偏低,去年有傳媒報道李卓人最高薪助理薪金近3.5萬元,相信不少港大生會抹一額汗,但方約恆對錢不以為然,稱「同佢心照」;在旁的李卓人哈哈笑,「男人之間乜都唔使講」。李卓人也將方約恆當成「人肉數據機」與「歷史資料庫」,「唔記得就問佢」。冷不防方約恆說李卓人不是好老闆,「佢唔會逼啲人做嘢,好hea又得,好有興趣做都得」,更自爆試過忘記撰寫港台節目《給香港的信》文稿,「甩咗底都冇鬧喎」。畢竟風雨同路20載,李卓人敗選後不久,即探問方約恆意向,最終決定在職工盟成立智庫,兩人繼續拍住上,「希望可以將佢咁多年嚟做嘅嘢傳承落去」。「吓,乜原來落實咗嗱?」方約恆聽罷半帶質疑問道後,下一句是「最快明年初先返到工噃」,原來要專注行山。「咁我代你返住先啦」,說完又是李卓人的哈哈哈。20年的默契,就是如此。




來源: http://hk.apple.nextmedia.com/news/art/20161009/19795485
PermaLink: https://articles.zkiz.com/?id=311227

Next Page

ZKIZ Archives @ 2019