ZKIZ Archives


【西貢故事】全港唯一搖櫓載人舢舨 74歲婆婆:我會一直做落去

1 : GS(14)@2016-07-15 05:16:13

妹姐的舢舨需要以人力搖櫓,一下一下搖動,船才會前進。



踏入暑假,西貢變得熱鬧起來,各種小艇舢舨在海面繁忙地穿梭。這隻舢舨注定與眾不同,它是一個傳奇,在海上緩緩地搖動,懶理其他快艇遊艇,仍堅持龜速行駛,細心看,舢舨沒有安裝摩打,只靠一支搖櫓不停擺動前進。


它不是做一場Show,卻是西貢人經常坐的交通工具。像西貢水上人吳偉強(Peter)有一架泊近岸邊的艇仔,若想由碼頭上自己的艇仔,便會打電話約這隻舢舨的主人──妹姐接載,由於岸邊密密麻麻地停泊了很多艇,艇與艇之間又泊得很近,摩打船靠近時,繩子等雜物容易扯入螺旋槳令其損壞,所以亦只有妹姐的人力舢舨才能到達,相對靈活得多,在西貢是獨市生意。妹姐有一個很特別的名字,叫「袁初一妹」,最初我亦半信半疑,直至她將身份證遞給我看,並說:「因為呢個名,我成日被人笑係日本人,水上人唔識字,為咗易記,就將出生日期用嚟改名,不過,我都唔肯定自己係咪初一出世,阿媽可能亂嚟嘅。」說罷,她哈哈大笑。舢舨是她一個人的舞台,用一支十六呎搖櫓,雙腳紮馬,雙手搖呀搖,眼看輕鬆得很。別以為搖櫓好簡單,記者試過撐5分鐘,剛好遇上強風,自問已出盡全力,但舢舨動也未動過一下。「你呢幾下都未認真拉嗰槳,你咁細力,船只會俾啲風吹番轉頭,行唔到啊!」妹姐半認真說。搖櫓撐船需要四肢用力,更要利用腰力將船推前,賺的都是勞力錢。妹姐每日做朝六午四,有時會看天做人,如果打大風落大雨,則會休息。由於不設最低消費,收入並不穩定。「有時路程太短,都費事定價錢,最低一兩蚊都試過收,甚至一日未發過市都試過,假期生意好啲,都會過一百蚊。」今年74歲的妹姐搖櫓大半生,年青時靠罟仔艇捕魚,到現在轉做舢舨載人,她說,這隻搖櫓舢舨是獨一無二。「如果呢隻舢舨爛咗,已經唔會再整到。搖櫓依家都無人識整,識整嘅已經走得就走。香港仔、南丫島、筲箕灣都搵唔到,係西貢只剩番我呢一隻。」雖然手腕勞損,雙手起繭,但她仍會堅持做下去。「人係要做嘢,要運動,好多人叫我不如返去享福,但如果手痛腳痛,有錢都享唔到福。我每日可以搖吓搖吓做運動,行得又食得,已經係一種福氣,所以我好珍惜呢個工作。」記者:何嘉茵攝影:伍慶泉



西貢水上人吳偉強(Peter)(紅衣服者)經常坐妹姐搖櫓的舢舨,是西貢人的交通工具。

舢舨有不少裝飾,都是由妹姐親自設計的。

今年74歲的妹姐堅持以人力搖舢舨,沒想過退下來。



來源: http://hk.apple.nextmedia.com/su ... t/20160715/19695682
PermaLink: https://articles.zkiz.com/?id=303782

Next Page

ZKIZ Archives @ 2019